Муовини Раиси шаҳри Хуҷанд Муяссара Қаҳҳорӣ чорабиниро ифтитоҳ намуда, аз ҷумла зикр дошт, ки ҳар халқу миллат бо бузургону абармардони хеш ифтихору сарбаландӣ доранд. Қадршиносӣ намудани хизматҳои шоёни ходимони барҷастаи давлатию ҷамъиятӣ, Арбобони намоёни илму фарҳанг, зиёиёни пешқадам – умуман шахсиятҳои хирадпеша ва ба дараҷаи сиёсати давлатӣ баровардани онҳо, яке аз падидаҳои даврони Истиқлолият, натиҷаи сиёсати давлат ва Ҳукумати Ҷумхурии Тоҷикистон мебошад. Зиндагиномаи ҳар як шахсиятҳои маъруфи Тоҷикистон як мактаби таҷрибаи ҳаёт мебошад. Омўзиши ҳаёту фаъолияти онҳо дар тарбияи эҳсоси наҷиби ватандўстӣ, садоқату хизмат ба Ватан ва худшиносии миллӣ зарур аст.

Пос доштани хотираи арбобони давлатӣ, ҷамъиятиву сиёсӣ, ходимони илм, маориф, фарҳанг ва муҳофизони Ватан ба ҳукми анъана даромадааст.Номгузории яке аз кўчаи номнадоштаи маҳаллаи Ваҳдат, микроноҳияи 26 ва пардабардорӣ аз лавҳаи ёдбуди шахси накўном, муҳандис-бинокори шоистаи Ҷумҳурии Тоҷикистон Абдуваҳҳоб Қаюмов дар ҳаёти ичтимоиву фарҳангии шаҳру вилоят рўйдоди воқеан хотирмон мебошад.

Зикр карда шуд, ки тибқи дархости пайвандон ва қарори Маҷлиси вакилони халқи шаҳр аз 12-уми июни соли 2024, таҳти №320 оид ба номгузорӣ намудани номи яке аз кўчаи номнадоштаи маҳаллаи Ваҳдат, микроноҳияи 26-уми шаҳри Хуҷанд ба номи Абдуваҳҳоб Қаюмов ба тасвиб расидааст.

Иттилоъ дода шуд, ки Абдуваҳҳоб Қайюмов 1-уми майи соли 1943 дар ноҳияи Конибодоми вилояти Суғд таваллуд ёфтааст. Ў таҳсили худро соли 1950 то соли 1954 дар мактаби миёнаи №11-уми ноҳия оғоз намуда, бо сабаби ивазшавии манзили истиқоматӣ, таҳсили худро дар мактаби миёнаи №1-уми шаҳри Ваҳдат идома додааст. Пас аз хатми мактаби миёна соли 1960 ба Донишгоҳи политехникии шаҳри Душанбе дохил гардида, соли 1965 ин донишгоҳро бо ихтисоси муҳандис-бинокор хатм намудааст.

Абдуваҳҳоб Қайюмов фаъолияти меҳнатиашро соли 1965 ба ҳайси муҳандиси Раёсати обу канали ноҳияи Мастчоҳ оғзоз кардааст. Соли 1968 пас аз адои хизмати ҳарбӣ ҳамчун муҳандис дар ташкилоти сохтмонии ПМК -17 трести Селстрой-2 давом дода, тўли солҳои 1973 то 1976 дар вазифаи сармуҳандиси СПМК-11-уми ноҳияи Ашт, дар давоми солҳои 1976-1978 ба ҳайси ҷонишини сардори МПМК трести Ленинободселстрой, баъдан аз соли 1979 то соли 1982 сардори ташкилоти зикргардида, аз соли 1982 то соли 1986 дар трести Селстрой-4 ва соли 1986 то соли 1988 дар вазифаи сардори ташкилоти сохтмонии трести Селстрой-3, аз соли 1988 то соли 1998 сармуҳандиси трести Селстой-4, баъдан то соли 2005 сардори шуъбаи истеҳсолии трести Селстрой-4, аз соли 2005 то соли 2008 сардори шуъбаи истеҳсолии Суғдинвестрой, аз соли 2008 то соли 2010 сардори шуъбаи истеҳсолии ҶДММ “Бунёд” дар вазифаи муҳандис-нақшагир фаъолият бурдааст.

Барои хизматҳои шоёну фаъолияти пурсамари бисёрсолаи Абдуваҳҳоб Қаюмов бо қарори Совети Олии депутатҳои Президиуми Олии Иттифоқи Шўравӣ бо медали Собиқадори меҳнат ва бо якчанд сипосномаву ифтихорномаҳо сарфароз гардонида шудааст.

Абдуваҳҳоб Кайюмов санаи 3–юми ноябри соли 2023 дар синни 80 солагиаш вафот кардааст.

Сипас, намояндаи Мақомоти иҷроияи ҳокимияти давлатии вилоят М. Ғафуров, раиси собиқадорони соҳаи сохтмони вилоят Тоҳир Ўрунов, собиқадори меҳнат Насимхон Мавлонов, сардори кўчаи мазкур Раҳматулло Охунов Раҳматулло ва фарзанди марҳум Абдуваҳҳоб Қаюмов – Баҳодур Қаюмов баромад намуда, аз хизматҳои шоёни мавсуф ёдоварӣ намуданд.

Дар вазъияти тантанавӣпарда аз рӯйи лавҳаи ёдгорӣ бардошта шуд.