Раиси Маҷлиси вакилони халқи шаҳри Хуҷанд, Раиси шаҳри Хуҷанд Фирдавс Шарифзода иҷлосияро ҳусни оғоз бахшида, иттилоъ дод, ки дар он муовини Раиси вилояти Суғд Анвар Яъқубӣ, вакилони шаҳрӣ, муовини аввали Раиси шаҳр, муовинони Раиси шаҳр, ҳамчунин роҳбарони воҳидҳои сохтории мақомоти иҷроияи ҳокимияти давлатии шаҳр, мақомотҳои ҳифзи ҳуқуқ, корхонаҳои саноатӣ, раисони маҳаллаҳо, сохторҳои корхонаи воҳиди давлатии коммуналии «Сарраёсати ободонӣ ва хоҷагии манзилию коммуналӣ»-и шаҳр иштирок доранд.

Сипас, муовини Раиси шаҳри Хуҷанд, вакили Маҷлиси вакилони халқи шаҳр Бахтиёр Боқизода аз рӯйи масъалаи якуми рӯзномаи иҷлосия, яъне “Дар бораи рафти татбиқи қарори Ҳукумати Ҷумҳурии Тоҷикистон аз 27 майи соли 2020, таҳти рақами 293 “Дар бораи Барномаи саноатикунонии босуръати Ҷумҳурии Тоҷикистон барои солҳои 2020-2025” баромад намуда, аз ҷумла афзуд, ки Ҷумҳурии Тоҷикистон дар замони Истиқлоли давлатӣ дар соҳаҳои гуногун, бахусус, дар соҳаи саноат ба дастовардҳои назаррас ноил гардид. Дар раванди татбиқи ҳамаҷонибаи ҳадафи чоруми миллӣ-саноатикунонии босуръати кишвар “Солҳои рушди саноат” ва истиқболи шоистаи 35-солагии Истиқлолияти давлатии Ҷумҳурии Тоҷикистон дар шаҳр як қатор корхонаҳои саноатии хурду миёна мавриди баҳрабардорӣ қарор гирифт.Таъсиси корхонаҳои нави саноатӣ имкон медиҳад, ки сокинон бо ҷойи корӣ таъмин ва иқтисодиёти кишвар баланд гардад. Боиси қайд аст, ки дар бунёди корхонаҳои саноатӣ саҳми соҳибкорони ватанӣ калон буда, бо истифода аз имкониятҳои мавҷуда, дастрасӣ ба ашёи хоми ватанӣ, воридоти техникаву технологияи муосир соҳибкорон маҳсулоти воридотивазкунандаву рақобатпазирро истеҳсол ва ба содирот равона карда истодаанд.

Соҳаи саноат дар иқтисодиёти ҳар як кишвар нақши муҳим дорад, зеро рушди ин соҳа дар таъмини иқтидори захиравии иқтисодиёт ва равандҳои такрористеҳсолии он, фароҳамсозии вазъи устувори иҷтимоӣ, ҳамчунин баланд бардоштани сатҳи некўаҳволӣ ва сатҳу сифати зиндагии аҳолӣ нақши калидӣ мебозад. Аз лиҳози муҳимияти соҳаи саноат дар рушди иқтисодиёти миллӣ дар айни замон аз ҷониби Пешвои миллат масъалаи саноатикунонии соҳаҳои иқтисодиёт ба мақоми аввал гузошта шудааст. Шаҳри Хуҷанд яке аз шаҳрҳои калони саноатии ҷумҳурӣ ба ҳисоб рафта, дар ҳаҷми умумии маҳсулотҳои дар вилоят истеҳсолшаванда ҳиссаи арзанда мегузорад.

Сипас оид ба масъалаи мазкур котиби комиссияи доимии Маҷлиси вакилони халқи шаҳр оид ба масъалаҳои саноат ва энергетика, коммуникатсия, шаҳрсозӣ ва нақлиёт, вакили Маҷлиси вакилони халқи шаҳри Хуҷанд аз ҳавзаи интихоботии Раззоқ, № 1 Хуршед Ғафуров ба музокира баромада, андешаҳои хешро баён дошт.

Аз тарафи Раиси шаҳр Фирдавс Шарифзода ба комиссияи доимии Маҷлиси вакилони халқи шаҳр нисбати масъалаи матраҳгардида, вазифагузорӣ карда шуд, аз ҷумла таъкид гардид, ки дар ҳамкорӣ бо бахши саноат ва энергетика барои тақвият бахшидани фаъолият дар самти татбиқи иқдоми Пешвои муаззами миллат дар бораи эълон гардидани солҳои 2022 – 2026 “Солҳои рушди саноат” чораҳои амалӣ андешида шавад. Дар якҷоягӣ бо раисони маҳаллаҳо бобати вусъати корҳои фаҳмондадиҳӣ ҷиҳати истиқболи сазовори 35-солагии Истиқлоли давлатӣ дар самти бунёду азнавсозии роҳҳои дохиливу маҳаллаҳои аҳолинишин бо истифода аз имконияту ташаббусҳои созандаи соҳибкорону шахсони саховатманд байни аҳолӣ корбарӣ карда шавад.

Зимни баррасии масъалаи дуюми рўзнома “Ҳисоботи комиссияи доимии Маҷлиси вакилони халқи шаҳри Хуҷанд оид ба масъалаҳои аграрӣ, идораи замин, захираҳои об, экология ва шуғли аҳолӣ”, ки аз ҷониби вакли шаҳрӣ Инъомҷон Поччоев ироа гардид, шунида шуд.

Вакилони шаҳрӣ ҳисоботи вакили Маҷлиси вакилони халқи шаҳри Хуҷанд аз ҳавзаи интихоботии Мевағул, № 32 Носир Ғафурзодаро оид ба амалисозии ваколати вакилӣ шуниданд.

Дар баррасии масъалаи чорум вакилон ба буҷети шаҳри Хуҷанд барои соли 2024 таъғирот ворид намуданд.

Зимни баррасии масъалаи панҷуми рўзнома дар бораи номгузории объектҳои физикию ҷуғрофӣ раиси комиссияи номгузорӣ ва ивази номи иншооти таърихию ҷуғрофӣ, муовини Раиси шаҳр Муяссара Қаҳҳорӣ баромад намуда, оид ба номгузории як қатор кӯчаҳои маҳаллаҳои навбунёд ва Чашмаи арзана ба номи Арбобони давлатӣ ва олимони номдор маълумот дод.

Вакили шаҳрӣ, муовини Раиси шаҳр Сӯҳроб Самадзода «Дар бораи тасдиқ намудани нақшаҳои муфассали банақшагирии маҳаллаҳои шаҳри Хуҷанд» баромад намуда, иншооти сохташавандаро ба муносибати 35 солагии Истиқлоли давлатӣ дар шаҳр муаррифӣ намуд.

Сипас вакилон як қатор қарорҳои қабулнамудаи Раиси шаҳрро тасдиқ намуданд.

Муовини Раиси вилояти Суғд Анвар Яъқубӣ дар ҷараёни кори иҷлосия баромад намуда, ҷиҳати мавзуъи баррасишуда фикру андешаҳояшро баён дошта, барои рушди минбаъдаи корҳо, суръатбахшии соҳаи саноати шаҳр ба масъулини дахлдор дастуру супоришҳо дод.

Раиси Маҷлиси вакилони халқи шаҳри Хуҷанд, Раиси шаҳри Хуҷанд Фирдавс Шарифзода дар охири иҷлосия баромад намуда, таъкид дошт, ки соҳаи саноат ва инноватсия яке аз манбаъҳои муҳимтарини рушди минбаъдаи кишвар ба ҳисоб рафта, пешрафти он имкон медиҳад, ки сарчашмаҳои иловагии даромади буҷети давлатӣ пайдо гардида, барои аҳолӣ ҷойҳои нави корӣ фароҳам оварда шаванд. Асосгузори сулҳу ваҳдати миллӣ- Пешвои муаззами миллат муҳтарам Эмомалӣ Раҳмон дар ироаи Паём аз 28 декабри соли 2023 қайд карданд, ки “Бо дарназардошти аҳамияти бузурги соҳаи саноат дар рушди минбаъдаи мамлакат, мо солҳои 2022 – 2026-ро «Солҳои рушди саноат» эълон намудем. Ҷиҳати амалисозии ин иқдом тайи ду соли охир дар кишвар беш аз 1200 коргоҳу корхонаи нави истеҳсолӣ бо 11 ҳазор ҷойи корӣ таъсис дода шуда, ҳаҷми истеҳсоли маҳсулоти саноатӣ нисбат ба соли 1992-юм 4,6 баробар афзоиш ёфта, ба зиёда аз 46 миллиард сомонӣ расонида шуд. Танҳо дар ҳафт соли охир ин нишондиҳанда 2,4 баробар зиёд гардидааст.

Бо садо додани Суруди миллӣ ба кори Иҷлосия ҳусни анҷом бахшида шуд.