Фирдавс Шарифзода устодон ва донишҷӯёни Коллеҷи тиббии шаҳри Хуҷандро бо фарорасии соли нави таҳсил табрик намуд

Дар чорабинӣ намояндаи Мақомоти иҷроияи ҳокимияти давлатии вилояти Суғд Ҳабибулло Хайруллозода низ иштирок карда Паёми табрикотии Раиси вилояти Суғд Раҷаббой Аҳмадзодаро ба самъи ҳозирин расонд, ки дар он аз ҷумла гуфта шудааст: “Дар оғози соли таҳсил ҳамчун анъана Рӯзи дониш бо дарси сулҳ оғоз мегардад, зеро ин ду мафҳум, яъне дониш ва сулҳ мафҳумҳое мебошанд, ки бо ҳамдигар пайванди ногусастанӣ доранд. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ин бора таъкид намудаанд: "Дарси сулҳ ба маънои дигар, дарси ватандӯстӣ ва шинохти сабақҳои таърих ба хотири фардои ободи Тоҷикистони азиз мебошад".

Боиси таъкид аст, ки дар партави сиёсати маорифпарваронаи давлату ҳукумат имрӯз дар қаламрави вилоят 952 муассисаи таҳсилоти миёнаи умумӣ, 10 муассисаи таҳсилоти олии касбӣ, 22 муассисаи таҳсилоти миёнаи касбӣ ва 21 литсейи касбии техникӣ фаъолият бурда, дар таълиму тарбияи насли ояндасоз, тайёр намудани мутахассисони соҳибмалака ва рушди илм нақши муассир мегузоранд”.

Раиси шаҳри Хуҷанд Фирдавс Шарифзода зимни суханронии худ зикр намуд, ки “ Дар сиёсати созанда ва маънавибунёди Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон низоми маориф ва таҳсилот дар мақоми аввал қарор дорад ва мактабу маориф доимо такягоҳи давлат ва тарғибгари ғояҳои навини он ба ҳисоб меравад. Маориф яке аз самтҳои афзалиятноки инкишофи давлат ба ҳисоб рафта, бе маорифи пешрафта ва низоми дурусти таҳсилот ба ҳадафҳои муҳиму созандаи давлатдорӣ расидан душвор аст. Ҳукумати Ҷумҳурии Тоҷикистон аз нахустин марҳилаи ташаккулёбии Истиқлоли миллӣ ба рушди илму маориф ва нерўҳои ақлонии мамлакат таваҷҷўҳи беандоза зоҳир менамояд. Барҳақ, Пешвои муаззами миллат аҳли илму маориф ва қувваи солими зеҳниро хазинаи тиллоии миллат номида, дар ҳама амалу пайкор, ҳолатҳои тақдирсози душвор, ниятҳои наву таърихӣ ва муҳимтарин масоили ҳаёти сиёсию иқтисодӣ ва илмию фарҳангӣ, донишу таҷриба ва таклифу пешниҳодҳои аҳли маориф ва зиёро самаранок истифода менамоянд.

Фирдавс Шарифзода гуфт, ки омӯзгорон рисолати касбиву ҷонии хешро софдилонаю содиқона ба иҷро мерасонанд ва ба ҳама гуна арҷгузорию қадршиносӣ шоистаянд, зеро баҳри боло рафтани сатҳи таълиму тарбия, шукуфоии имрўзу фардои кишвар ва афзудани обрўю эътибори ҷумҳуриамон дар арсаи ҷаҳон пайваста меҳнати фидокорона менамоянд.

Пешвои муаззами миллат мўҳтарам Эмомалӣ Раҳмон дар шаъну шарафи омўзгорон дар яке аз суханрониҳояшон чунин фармудаанд: «Миллате, ки омўзгори асил надорад, ҳеҷ гоҳ ба ягон мартаба нахоҳад расид. Ифтихор ва сари баланди мост, ки тоҷикон аз қадим соҳиби китобу қалам, илму маърифат ва олиму омўзгор буданд, ҳастанд ва дар оянда низ хоҳанд монд».

Маврид ба қайд аст, ки ғамхориҳои рўзафзуни Ҳукумати мамлакат, хосатан Президенти кишвар мўҳтарам Эмомалӣ Раҳмон ва Раиси вилояти Суғд Раҷаббой Аҳмадзода нисбат ба соҳаи маориф, беҳдошти сифати таълиму тарбияи насли наврас, фароҳам овардани шароит ва имкониятҳои мусоиди таҳсил тавассути бунёди таълимгоҳҳои нав, таъмиру тармими бинои мактабҳо, бо таҷҳизоти техникии навтарин таъмин намудани онҳо аз ин шаҳодат медиҳад.

Дар анҷоми суханронии худ Раиси шаҳр гуфт, ки оғози соли нави таҳсил дар остонаи сол-гарди Истиқлоли давлатии Ҷумҳурии Тоҷикистон ва ҷашни 30-солагии қабули қонуни асосии кишвар Конститутсияи Ҷумҳурии Тоҷикистон сурат мегирад. Умедворем, ки шумо – ҷавонон бо ифтихор аз шуҷоату мардонагии аҷдодони худ бо ҳисси баланди худогоҳию худшиносии миллӣ ва ватандўстию ватандорӣ минбаъд низ пояҳои бинои мўҳташами Истиқлол ва сулҳу суботро устуворӣ ва таҳким мебахшед. Бо истифода аз шароити фароҳамовардаи давлат хуб таҳсил карда, барои соҳибмаърифату соҳибкасб шудан азму талош менамоед. Бо чунин таманниёти нек, бори дигар оғози фараҳбахши соли нави таҳсилро ба кулли устодону омўзгорони азиз ва донишҷўён таҳният гуфта, бароятон тансиҳатӣ, азму иродаи қавӣ ва дар роҳи тарбияи насли соҳибилму бомаърифат барору комёбиҳо таманно менамоям.

Алимат Мавлонзода, директори Коллеҷи тиббии шаҳри Хуҷанд аз дастгирии доимии Давлату Ҳукумат, Мақомоти иҷроияи ҳокимияти давлатии вилоят ва Мақомоти иҷроияи ҳокимияти давлатии шаҳри Хуҷанд ёдоварӣ намуда, таъкид дошт, ки ҷомеаи меҳнатӣ ва кулли донишҷӯёни ин муассисаи таълимӣ ҳамеша ҷонибдори сиёсати маорифпарваронаи Пешвои муаззами миллат муҳтарам Эмомалӣ Раҳмон буда, дар оянда низ бо донишу фаъолияти назарраси хеш дар рушду пешрафти кишвари маҳбубамон саҳми назаррас мегузоранд.