Номаи табрикотии Раиси шаҳри Хуҷанд Фирдавс Шарифзода ба муносибати Рӯзи Парчами давлатӣ

Ба муносибати ин санаи таърихӣ аз номи Мақомоти иҷроияи ҳокимияти давлатии шаҳри Хуҷанд бо камоли эҳтиром ва самимият сокинон ва меҳмонони ин зебошаҳрро бо Рўзи Парчами давлатӣ табрику муборакбод менамоям.

Воқеан, Парчами давлатии Тоҷикистони соҳибистиқлол бо таваҷҷўҳ ва дар заминаи парчамҳои қадимии миллӣ, аз ҷумла, дирафши ковиёнӣ омода шудааст. Пўшида нест, ки интихоби рангҳои парчам тасодуфӣ нест. Ҳар яки он маънои амиқ дорад. Агар ранги сурх – рамзи ягонагии кишвар, сулҳу дўстии миёни миллатҳо ва ҷоннисориҳои мардум ба хотири ҳифзи марзу бум бошад, ранги сафед – рамзи покӣ, фаровонии барфу кўҳҳои баланди кишвар ва бойигарии асосии мамлакат пахта аст. Ранги сабз – рамзи водиҳои сабзпўш, сарзамини кишоварзӣ, ҳамчунин, рамзи шукуфоии кишвар буда, инъикоси тоҷ ва ҳафт ситора дар Парчами давлатии Тоҷикистон аз соҳибдавлат ва соҳибихтиёр будани Ҷумҳурии Тоҷикистон шаҳодат медиҳад.

Парчами Ҷумҳурии соҳибистиқлоли Тоҷикистон ҳамчун рамзи бахту саодат, сарсабзию хуррамӣ ва сарбаландии миллату давлати тоҷикон, мақсаду ҳадафҳои созандаи ин миллати тамаддунофарро дар баландтарин минбару қасрҳои байналхалқӣ ҷилвагар менамояд. Дар бинои Созмони Милали Муттаҳид ва дигар созмону ташкилот ва муассисаҳои бузурги ҷаҳонию минтақавӣ Парчами Тоҷикистони соҳибистиқлол дар радифи парчамҳои дигар давлатҳои дунё парафшон аст.

Дарвоқеъ, парчам ба сифати яке аз рамзҳои асосии давлатдорӣ ба ҳисоб рафта, таҷлил гардидани Рўзи Парчами давлатӣ дар қаламрави кишвар нишони садоқати имрўзиён ба анъанаҳои қаҳрамононаи авлоду аҷдоди сарбаландамон ва арҷгузорӣ ба арзишҳои умумимиллӣ арзёбӣ гашта, он метавонад дар замири ҳар фарди ватандўст ва сокини Тоҷикистони азиз эҳсоси дўст доштан ва парастиш кардани ин марзу бумро дучанд намояд.

Тавре Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар яке аз суханрониҳояшон зикр кардаанд: «Парчами миллӣ ифодагари иқболу истиқлол, нангу номус, ватандўстиву ватанпарастӣ ва ҳувияти миллии мардуми кўҳанбунёду фарҳангии мо буда, мақсаду мароми неки тоҷиконро дар ҷилои рангҳои худ инъикос намудааст».

Дар ҷаҳони муосир ҳар давлати мустақилу соҳибихтиёр тавассути парчами он муаррифӣ мегардад. Аз ин рў, эҳтиром ва арҷ гузоштан ба парчам маънои эҳтирому арҷгузорӣ ба арзишҳои деринаи таърихӣ ва фарҳангиву маънавии миллӣ ва гузашта аз ин, эҳтироми миллат ва давлату давлатдорӣ мебошад, зеро парчам дар баробари Конститутсия, Нишон ва Суруди миллӣ, аз ҷумлаи муқаддасоти милливу давлатӣ маҳсуб меёбад.

Бо назардошти нақши созандаву муассири парчам дар тарбияи ҳисси худ-огоҳиву худшиносӣ ва ватандўстиву ватанпарастии насли наврасу ҷавон, тибқи дастури Пешвои муаззами миллат мўҳтарам Эмомалӣ Раҳмон дар шаҳри Хуҷанд майдони Парчами давлатӣ ҳанўз аз баҳори соли 2014 мавриди баҳрабардорӣ қарор дода шудааст.

Ба шарофати сиёсати хирадмандонаи Асосгузори сулҳу ваҳдати миллӣ – Пешвои миллат, Президенти мамлакат мўҳтарам Эмомалӣ Раҳмон ва дастгирии Раиси вилояти Суғд Раҷаббой Аҳмадзода хуҷандиёни меҳнатқарину ватандўст бо шукргузорӣ аз даврони соҳибистиқлолии кишвар ва фазои орому осуда Парчами ватанро боло бардошта, дар рушди ҳамаҷонибаи соҳоти кишвар саҳм мегузоранд.

Итминони комил дорам, ки минбаъд низ ҳар фарди бонангу номус ва ватандўсту ватанпарвари Хуҷандшаҳр ин анъанаи некро идома дода, бо донишу малака, дастоварду пешрафт обрўву нуфузи Тоҷикистонро дар арсаи олам боло мебардорад.

Бори дигар Шумо, ҳамдиёрони азизро бо ҷашни муқаддас - Рўзи Парчами давлатӣ самимона шодбод гуфта, орзуманди онам, ки ливои миллат то ҷовидон парафшон бошад ва мардуми меҳнатқарину созанда бо заҳмату талошҳои ҳамешагӣ зиндагии шоиста дошта бошад.

Ҷашни муқаддаси миллӣ муборак, ҳамдиёрон!