12 Май 2023
Недоступен ни однин перевод.
Бахшида ба Рўзи байналмилалии ҳамшираҳо дар Коллеҷи тиббии шаҳри Хуҷанд ба номи Юсуфхон Исҳоқӣ Конфронси илмӣ-амалӣ баргузор гардид.
Нотиқон зимни баромади худ таъкид доштанд, ки ҳадафи стратегии давлату Ҳукумат дар соҳаи тандурустӣ бо роҳи ташвиқу тарғиби тарзи ҳаёти солим таъмин намудани солимии аҳолӣ, беҳтар гардонидани нишондиҳандаҳои дарозумрии инсон, паст намудани сатҳи беморӣ, маъюбӣ, фавти модару кӯдак, пешгирӣ кардани бемориҳои гуногуни сироятӣ, баланд бардоштани сифати кумаки тиббиву санитарӣ, назорати бехатарии маводи доруворӣ ва тарбияи кадрҳои баландихтисоси соҳа мебошад. Яъне солимии миллат боигарии давлат аст. Зикр шуд, ки ҳамасола 12 май дар тамоми олам рӯзи ҳамшираҳои шафқат таҷлил мешавад. Пешаи ҳамшираи тиббӣ яке аз инсондӯстортарин пешаҳо дар олам аст.
Дар раванди муолиҷа ҳамшираи шафқат баландтарин нақшро амалӣ месозад. Иҷрои таъйиноти духтур, нигоҳубини бемори вазнин, гузаронидани амалиёти зиёди мураккаб ва масъулиятнокро маҳз ӯ ба зимма дорад. Ҳамшираи шафқат ҳамчунон дар пажӯҳиш ва таҳқиқи беморӣ ва омода кардани бемор барои амалиёти фаврӣ бевосита иштирок мекунад. Ин ҳама талаботи баланд ба замми донишу таҷриба боз сифатҳои баланди одобу муомилаву забондониву хушгуфториро аз ҳамшираи тиббӣ тақозо доранд. Ҳамшираи тиббӣ дар таҳқиқи беморӣ, омодасозии ӯ ба амалиёти фаврӣ ва назорат ба беморон нақши бузург мебозад. Ин амалиёт бидуни шубҳа аз ӯ касбияти баланд, дақиқиву зиракӣ, қобилияти ёфтани муносибати дуруст бо беморону хешовандони онҳоро талаб мекунад.
Ҳушёриву зиракӣ, дастгирии рӯҳонӣ, муносибати гарму меҳрубонӣ ба бемор баъзан бештару беҳтар аз доруҳо даркоранду таъсиргузоранд. Беҳуда нест, ки дар замонҳои қадим ҳамшираҳои тиббиро ҳамшираҳои шафқат меномиданд. Ин унвон на фақат симои касбӣ, балки ҳамчунин симои ахлоқиву маънавии онҳоро таҷассум менамуд. Пешаи ҳамширагӣ аз қадим ҳамеша инъикоси шафқат ва хайрхоҳӣ буда, ҳамеша бо чунин фаҳмишҳо, мисли некӣ, сабру таҳаммули беохир, ҳунари нигоҳубини бемор алоқамандӣ дошт.
Дар конфронс Абдувосит Ғафуров, мудири шуъбаи кор бо ҷавонон ва варзиши шаҳр, нмояндаи ҲХДТ дар вилояти Суғд ва дигарон низ суханронӣ намуданд.
Дафтари матбуоти
Раиси шаҳри Хуҷанд
