06 Сентябр 2022
Дар толори Мақомоти иҷроияи ҳокимияти давлатии шаҳри Хуҷанд бо иштироки Раиси шаҳри Хуҷанд Фирдавс Шарифзода, муовини Раиси вилояти Суғд Даврон Зоҳидзода, комисари ҳарбии вилояти Суғд Давлатшоҳ Мирзозода, роҳбари дастгоҳи Раиси шаҳр, муовини Раиси шаҳр, раисони маҳаллаҳо, комисари ҳарбии шаҳр, намояндагони мақомоти ҳифзи ҳуқуқ, роҳбарони муассисаҳои тандурустӣ ва дигарон ҷаласаи васеи Комиссияи даъватӣ ҷиҳати омодагии сафарбаркунии ҷавонон ба хизмати ҳарбии даъвати тирамоҳии соли 2022 баргузор гардид.
Раиси шаҳри Хуҷанд Фирдавс Шарифзода ҷаласаро ҳусни оғоз бахшида, таъкид намуд, ки дар партави сиёсати хирадмандонаи Пешвои муаззами миллат муҳтарам Эмомалӣ Раҳмон сол то сол шароити хизмат дар қисмҳои низомӣ беҳтар шуда, дар ин радиф шумораи ҷавонони бо хоҳиши худ ба хизмати ҳарбӣ раванда рӯ ба афзоиш дорад. Мақомоти иҷроияи ҳокимияти давлатии шаҳри Хуҷанд ба масъалаи тарбияи ҳарбӣ – ватандӯстии ҷавонон эътибори махсус зоҳир менамояд ва мунтазам дар қисмҳои ҳарбӣ рӯзи дарҳои кушод мегузаронад. Дар доираи рӯзи дарҳои кушод ҷавонон ва волидони онҳо имкон доранд, ки бо шароити хизмат ва зиндагии аскарону афсарон аз наздик шинос шаванд.
Сипас, ҷиҳати омодагӣ ба даъвати тирамоҳии соли 2022 Раиси Комиссияи даъвати наваскарон ба хизмати ҳарбии шаҳр, муовини Раиси шаҳри Хуҷанд Бахтиёр Боқизода ҳисобот дода, аз ҷумла иттилоъ дод, ки Ҳукумати мамлакат дар доираи барномаҳои рушди Қувваҳои Мусаллаҳи кишвар ва ҷиҳати ба мактаби воқеъии омодасозии муҳофизони Ватан табдил додани ҷузъу томҳои низомӣ аз ҳамаи захираву имконот истифода мекунад. Зеро дар марҳилаи имрўзаи рушди давлатдории миллӣ фазои орому осудаи Ватан ва таъмини амнияти Давлат ва ҷомеа аз сатҳи масъулиятшиносӣ ва садоқати низомиён аз сарбози қаторӣ то афсари олирутба вобаста мебошад. Мувофиқи моддаи 43-и Конститутсияи мамлакат ҳифзи Ватан, ҳимояи манифати давлат, таҳкими Истиқлолият, амният ва иқтидори мудофиавии он вазифаи муқаддаси шаҳрванд аст.
Таъкид гардид, ки хизмат дар сафи Қувваҳои мусаллаҳи мамлакат барои насли ҷавон на танҳо қарзи шаҳрвандӣ ва шарафи инсонӣ, балки муҳимтарин мактаби обутоб аст. Маҳз дар ҳамин ҷо ҷавонписарон шуҷоату мардонагӣ омӯхта, муқаддастарин арзиши ҳаёт — дӯст доштан ва содиқона муҳофизат кардани хоки поки Ватани азизро ёд мегиранд.
Комиссари шаҳр Қурбоналӣ Сулмонзода доир ба корҳои анҷомдодашуда ҳисобот дода, аз ҷумла зикр дошт, ки ҳар ҷавонмарди синни аз ҳаждаҳ боло аллакай ҳимоятгари оилаи худ, дўстону ҳамсолони худ, маҳалли худ, зодгоҳу давлати худ мегардад. Ҷисму рўҳи қавии ҳар ҷавонмард аз поктинатию бовиҷдонии ў, ғурури баланди миллӣ доштанаш гувоҳӣ медиҳад. Чун ба ҷавонони ин синну сол менигарем, яқин боварӣ ҳосил мекунем, ки дар ҳақиқат, ватанамон ҷавонони шуҷоъ, ҷасур ва бонанг дорад. Илова ба ин, бо итминони комил гуфта метавонем, ки Тоҷикистони азизу муқаддаси моро ҷавонону мардони бовиқор нигаҳ медоранд. Аз он ифтихор дорем, ки волидайни нексиришт фарзандони паҳлавону қавиирода, нотарсу далер ва шуҷоъро тарбия дода, барои ҳимояи Ватан-Модар, хоҳарону додарон, дўстон ва дигар шахсони мўҳтоҷ раҳнамо мешаванд.
Дар ҷараёни ҷараёни ҷаласа муовини Раиси вилояти Суғд Даврон Зоҳидзода, комисари ҳарбии вилояти Суғд Давлатшоҳ Мирзозода, Раиси шаҳри Хуҷанд Фирдавс Шарифзода аз масъулини дахлдор доир ба корҳои анҷомдода пурсиш ба амал оварда, ҷиҳати ҷоннок намудани фаъолияти комиссияи даъват, бахусус дар самти бақайдгирии шаҳрвандони синни даъват, ҷалби муҳассилин ба мактаби муттаҳидаи техникии ҷамъияти ташкилоти мададгори мудофиаи шаҳри Хуҷанд ва ғайраҳо дастуру супоришҳои мушаххас доданд.
Аз раисони маҳаллаҳо даъват ба амал оварда шуд, ки ҳамоҳангиро бо комиссияи даъвати ҳарбӣ, бахусус комиссирати ҳарбӣ ҷоннок намуда, бо роҳандозии корҳои тарғиботӣ ташфиқотӣ бо мақсади баланд бардоштани ҳисси ҳарбӣ ватандӯстии шаҳрвандон баҳри иҷрои нақшаи даъвати тирамоҳии ҳарбӣ мусоидати фаъол намоянд.
Зикр шуд, ки хизмат дар сафҳои Қувваҳои мусаллаҳи Ҷумҳурии Тоҷикистон ифтихор ба ҳар ҷавони синни даъватӣ маҳсуб меёбад. Ифтихор аз он бояд кард, ки ватани мо соҳиби Артиши миллӣ буда, қодир аст дар он ҷавонони бонангро аз ҷиҳати ҷисмонӣ пурқувват, аз ҷиҳати сиёсӣ пухтаву зирак омода гардонад. Ду сол хизмат дар Артиши миллии Ҷумҳурии Тоҷикистон кафолати зиндагии осоиштаи хонадони ҳар хизматчӣ, орому осоиштагии кишвар ва ояндаи дурахшони кўдакону ҷавонон мебошад.
Дафтари матбуоти
Раиси шаҳри Хуҷанд