26 Июл 2022
Дар толори Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд роҷеъ ба фаъолияти муассисаи таълимӣ дар шаш моҳи соли ҷорӣ бо иштироки васеи рӯзноманигорон нишасти матбуотӣ баргузор гардид.
Дилафрӯз Саидӣ, директори донишкада нишастро ҳусни оғоз бахшида, иттилоъ дод, ки дар чор факултети донишкадаи донишкада – информатика ва энергетика, сохтмон ва нақлиёт, муҳандисӣ – технологӣ ва муҳандисӣ - иқтисодӣ аз рӯи 29 ихтисоси зинаи бакалавриат, 5 ихтисоси шакли таҳсилашон фосилавӣ ва аз рӯйи 18 ихтисоси бакалавриатура таҳсилоти олии дуюм тариқи фосилавӣ, 18 ихтисоси зинаи магистратура, 9 ихтисоси зинаи докторантура (PhD), инчунин 13 курсҳои кӯтоҳмуддати омӯзишӣ аз ҷумла омӯзиши забонҳои хориҷӣ 178 нафар устодон ба 4121 нафар донишҷӯ дарс мегӯянд. Аз миқдори умумии донишҷӯён 6 нафар шаҳрванди хориҷӣ мебошанд, ки аз руйи ихтисосҳои гуногун дар донишкада таҳсил карда истодаанд. Таъкид шуд, ки дар Донишкада низоми дохилидонишгоҳии таъминоти сифат мавҷуд аст, ки аз рӯйи он омилҳои баландбардоштани сифати таълим назорат карда мешавад.
Зикр шуд, ки сол ба сол бо дастгирии Пешвои муаззами миллат муҳтарам Эмомалӣ Раҳмон ва иҷрои нақшаи дурнамои донишкада он сатҳи сифатан рушд расида истодааст. Масалан соли 2014 миқдори донишҷӯён 3651 нафар бошад, имрӯз ба 4121 нафар расидааст, ки ҳамаи онҳо баъди хатми донишкада соҳиби ҷойҳои кории муносиб ва арзанда мегарданд. Сифати таҳсил низ дар ин давра зиёд гардида, миқдори хатмкунандагони дипломи аъло 4 маротиба афзудааст.
Дар давраи аз соли 2015 то 2021 - 30 нафар рисолаи номзадӣ ва 2 нафар рисолаи докториро ҳимоя намуданд, 173 нафар омӯзгорон курсҳои такмили ихтисосро дар Донишкадаи такмили ихтисоси омӯзгорони муассисаҳои таҳсилоти олии касбии назди Донишгоҳи миллии Тоҷикистон гузашта, соҳиби диплом гардиданд. Ҳиссаи омузгорони унвони илмидошта дар Донишкада 45,5%-ро ташкил медиҳад, ки меъёр ба донишкадаҳо 35,0 % муайян шудааст. Агар ин нишондиҳанда дар соли 2010 ба 33,5% баробар бошад, пас дар соли 2022 ба сатҳи 45,5% расидааст. 20 нафар устодони унвони илмидоштаи то синни 35 дар донишкада фаъолияти меҳнатӣ доранд, ки ин 25,5%-ро ташкил мекунад.
Иттилоъ дода шуд, ки дар 7 соли охир зиёда аз 80 патент ва шаҳодатномаи зеҳнӣ, аз ҷумла 19 нахустпатент ва 64 шаҳодатномаҳои зеҳнӣ ба даст омадааст. Бояд қайд намуд, ки соли 2019 дар ин самт хеле пурбарор буд, зеро 40 адад шаҳодатномаи зеҳнӣ ва 5 нахустпатент ба даст оварда шуд, аз он ҷумла 36 шаҳодатномаи зеҳнӣ доир ба сохтани модулҳои системаи иттилоотии идоракунии донишкада ба даст оварда шудааст.
Дар соли ҷорӣ донишҷӯёни Донишкада дар олимпиадаи ҷумҳуриявӣ байни донишҷӯёни МТОК фаъолона иштирок намуда, 3 нафар (технологияи иттилоотӣ, назарияи иқтисодӣ ва забони давлатӣ) сазовори 2-ҷойи дуюм ва 1-ҷойи сеюм гаштанд.
211 дарсҳои ба навор гирифта шуда маводҳои дарсӣ ба намуди тайёр дар сомонаи ВМИҶТ ва ҳамчунин дар канали youtube-и омӯзишии Вазорат паҳн карда шудааст.
Агар соли 2010 миқдори умумии озмоишгоҳҳо 20 адад бошад, имрӯз ба 43 адад расонида шудааст, ки барои сифатан беҳтар тайёр намудани кадрҳо мусоидат менамояд. Танҳо дар соли 2021-2022 дар донишкада 5 озмоишгоҳҳои нав ва 1 маркази таълимӣ ташкил карда шудаанд: 3- озмоишгоҳ дар самти зеҳни сунъиӣ , 1 озмоишгоҳи технологияи молиявӣ, озмоишгоҳи ҳифзи ёдгориҳои таърихӣ, як маркази таълимӣ, ки аз озмоишгоҳи дузандагӣ ва синфхонаи компютерӣ оид ба лоиҳакашии автоматикунонидашудаи либос иборат мебошад.
Дилафрӯз Саидӣ ҳамзамон доир ба дигар паҳлуҳои фаъолияти донишкада ба рӯзноманигорон иттилои бештар дод.
Дар қисмати саволу ҷавоб рӯзноманигорон доир ба ҷараёни таълиму тарбия ва инноватсия аз директори донишкада пурсон шуда, ҷавобҳои мушаххас ба даст оварданд.
Дафтари матбуоти
Раиси шаҳри Хуҷанд
