06 Апрель 2022
Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ва Раиси шаҳри Хуҷанд Фирдавс Шарифзода бо мақсади огоҳӣ аз раванди корҳои сохтмонию бунёдкорӣ дар соҳаи маорифи шаҳр ба муносибати 25 солагии Рўзи Ваҳдати миллӣ ва 30 солагии Иҷлосияи 16-уми Шўрои Олии Ҷумҳурии Тоҷикистон аз чанде иншоот боздид ва ошноӣ пайдо намуданд.
Нахуст аз раванди сохтмони ширхоргоҳ-кўдакистони №18-и шаҳри Хуҷанд шиносоӣ пайдо карда шуд.
Иттилоъ дода шуд, ки ин муассисаи таълимӣ ҳанўз соли 1959 сохта шуда, масоҳаташ 0, 33 га. –ро ташкил медиҳад. Корҳои сохтмонӣ дар кўдакистон бомаром идома дорад ва алҳол тибқи лоиҳа он 3 ошёна ва таҳхона иборат буда, дар атрофи он дигар иншооти зарурӣ барои тарбияи кўдакон низ бунёд карда мешавад. Фармоишгари иншоот Идораи сохтмони асосии Мақомоти иҷроияи ҳокимияти давлатии шаҳр буда, пудратчии иншоот ширкати «Сохтмонворидот» мебошад.
Баъди истифодаи ин муассисаи таълимӣ беш аз 180 нафар кӯдакон ба тарбия фаро гирифта мешаванд.
Кўдакистони бунёдшаванда бо назардошти талаботи замони муосир сохта мешавад ва дар он беҳтарин шароити тарбияву ба камолрасонии кўдакон муҳайё мегардад.
Зимни боздид аз МТМУ №28 иттилоъ дода шуд, ки бинои нави муассисаи таълимӣ бо маблағгузории Мақомоти иҷроияи ҳокимияти давлатии шаҳри Хуҷанд бо харҷи 18 миллион сомонӣ сохта мешавад. Тибқи лоиҳа иншоот аз чор ошёна ва таҳхона иборат буда, дорои 23 синфхона ва дигар иншооти ёрирасон мебошад. Фармоишгари иншооти сохташаванда Идораи сохтмони асосии шаҳри Хуҷанд, пудратчӣ Ҷамъияти дорои масъулияти маҳдуди “Сохтмонворидот” ва лоиҳакаш КФД “Суғдшаҳровар” мебошад. Мактаб барои 1280 нафар хонанда дар ду баст пешбинӣ шудааст. Алҳол дар иншооти номбурда то 100 нафар сохтмончиёни маҳаллӣ кору фаъолият доранд. Корҳои сохтмонӣ дар ошёнаи якуми он бомаром идома дорад.
Ҷамолиддин Абдуллозода ҳамчунин аз рафти сохтмони муассисаи таҳсилоти миёнаи умумии таълимаш бо забони русӣ, ки бо маблағгузории Федератсияи Русия дар маҳаллаи Темурмалики шаҳр ҷараён дорад, аз наздик шинос гардид.
Иттилоъ дода шуд, ки мактаб аз 3 ошёна ва таҳхона иборат буда, барои 1224 ҷой пешбинӣ гардида, дорои тамоми инфрасохтори таълимӣ мебошад. Фармоишгари татбиқи ин лоиҳаи азим бо супориши Ҳукумати Русия Бонки авруосиёии рушд амалӣ шуда, пудратчии генералӣ «ЗАРУБЕЖДИПСТРОЙ» дар ҳамҷоягии ширкати ватании ҶДММ «Нуроб» мебошанд. Алҳол дар сохтмони мактаб беш аз 300 нафар сохтмончиёни маҳаллӣ машғули кори доимианд. Интизор меравад, ки сохтмони мактаби мазкур тибқи нақша — то 1 сентябри соли 2022 ба анҷом расад.
Бояд қайд намуд, ки сохтмони мактаби мазкур тибқи барномаҳои Русия -ташаббуси муштараки Президенти Тоҷикистон муҳтарам Эмомалӣ Раҳмон ва Президенти Русия Владимир Путин амалӣ карда мешавад.
Ҷамолиддин Абдуллозода ба масъулини сохтмон ҷиҳати босифат анҷом додани корҳои сохтмонӣ ва истифодаи васеи маҳсулоти ватанӣ дастуру супоришҳо дод. Ба масъулини соҳаи шаҳрсозӣ дастур дода шуд, ки атрофи бинои таълимиро ба тартиб дароварда, барои ба талаботи замони муосир қомат афрохтани иншооти атроф тадбирҳо андешанд.
Таъкид гардид, ки дар ба шарофати Истиқлолияти давлатӣ дар қаламрави шаҳри Хуҷанд иқдомоти созандагӣ дар заминаи дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бомаром идома дорад ва ҳамагон дар ҳамбастагӣ ҷиҳати боз ҳам зебову пешрафта намудани шаҳри бостонии Хуҷанд ҳиссагузорӣ намоем.
Дафтари матбуоти
Раиси шаҳри Хуҷанд
