23 Феврал 2022
Дар Кохи “Суғдиён”-и шаҳри Хуҷанд бахшида ба 29 – умин солгарди таъсисёбии Қувваҳои мусаллаҳи Ҷумҳурии Тоҷикистон маҷлиси тантанавӣ баргузор гардид.
Раиси шаҳри Хуҷанд Фирдавс Шарифзода афсарону сарбозон ва собиқадорони Қувваҳои мусаллаҳи Ҷумҳурии Тоҷикитсонро бо иди касбиашон табрику таҳният гуфта, аз ҷумла таъкид дошт, ки баробари соҳиби истиқлолияти давлатӣ шудани Ҷумҳурии Тоҷикистон аз ҷумлаи аввалин иқдоми Ҳукумати кишвар ба вуҷуд овардани Қувваҳои Мусаллаҳ буд.
Зеро ягон давлат бе Артиши миллии муқтадир ва муҷаҳҳаз пойдор нест. Ҳукумати мамлакат бо назардошти вазъияти тағйирёбандаи ҳарбӣ – сиёсии ҷаҳони имрўза ба таъмини моддӣ – техникӣ, пуррагардонии сафи Қувваҳои Мусаллаҳ ва мустаҳкам намудани иқтидори мудофиавии кишвар эътибори хоса медиҳад. Дар ин ҷода, аз як тараф бо роҳи ташкил, пуррагардонӣ ва ҷобаҷогузории қисму воҳидҳои ҳарбӣ дар самти муҳими ҳарбӣ – стратегӣ, аз тарафи дигар бо роҳи муҳайё сохтани шароити мусоид барои сарбаландона иҷро намудани вазифаҳо дар ҳама ҳолатҳои фавқулодда таваҷҷўҳи хоса зоҳир мегардад.
Зикр гардид, ки хизматчиёни ҳарбии сохторҳои низомӣ ва ҳайати шахсии мақомоти ҳифзи ҳуқуқи мамлакат дар таъмини сулҳу суботи устувор, амнияти давлат, таҳкими ваҳдати миллӣ, ки асоси пешрафту тараққиёти кишварамон мебошад, нақши барҷаста ва бузург доранд. Имрўзҳо, Тоҷикистони соҳибистиқлоли мо рў ба рушд оварда, рўзгори мардум обод гаштааст ва сокинони кишвар шукри осмони софу мусаффо ва сулҳи бебозгашт карда, ба ояндаи дурахшон дилпурона менигаранд. Дар натиҷаи ғамхорию дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои мусаллаҳи Ҷумҳурии Тоҷикистон муҳтарам Эмомалӣ Раҳмон Қувваҳои мусаллаҳи кишвар соҳиби инфрасохтори замонавӣ, техникаву таҷҳизоти муосири ҳарбӣ ва кадрҳои миллии афсарии дорои тахассуси олӣ мебошанд.
Дар ин радиф баҳри татбиқи дастуру супоришҳои Сарвари давлат бо азму кўшишҳои назарраси Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон муҳтарам Раҷаббой Аҳмадзода такмили фаъолияти қисмҳои низомии ҳудуди вилояту шаҳр, беҳтар гардонидани шароити зиндагии афсарону сарбозон дар сатҳи баланд ба роҳ монда шудааст.
Таъкид шуд, ки бо таваҷҷўҳи пайваста айни замон Артиши миллӣ амнияти давлату миллат ва ҳифзи марзу буми Ватанамонро пурра таъмин намуда истодааст. Зеро, бо қудрату тавоноӣ ва омодагии комил Қувваҳои мусаллаҳ дар ҳимоя, пешгирӣ ва мубориза бар зидди ҳама гуна хавфу хатар ва таҳдидҳо бо садоқату мардонагӣ вазифаи пурмасъули хешро иҷро менамоянд. Мардуми соҳибистиқлоли Тоҷикистон бо Қувваҳои Мусаллаҳи хеш чун нерўи тавоно ва таъмингари осоиши ҳаёт ифтихор мекунанд.
Раиси шаҳр гуфт, ки ҳифзи Ватан, ҳимояи манфиатҳои давлат, таҳкими дастовардҳои истиқлолият ва мустаҳкам намудани иқтидори мудофиавии мамлакат натанҳо қарзи хизматчиёни ҳарбӣ, балки вазифаи муқаддаси ҳар як шаҳрванд аст.
Маҳз бо боварию эътимоди қавӣ Пешвои муаззами миллат муҳтарам Эмомалӣ Раҳмон зимни суханронии хеш иброз намудаанд: «Мардуми шарифи Тоҷикистони соҳибихтиёр дар симои хизматчиёни ҳарбии Қувваҳои мусаллаҳи мамлакат фарзандони бонангу номус ва далеру шуҷои худро мебинанд, ки ба савганди ҳарбӣ ва халқу Ватани худ ҳамеша содиқу вафодор ҳастанд.»
Қувваҳои мусаллаҳ бояд ҳомиёни воқеии кишвар ва амнияти мардум бошанд ва ҳамчун нерўи тавонои мудофиавӣ ташаккулу такомул ёфта, халқу давлатро боэътимод созанд, ки марзу буми кишвар таҳти муҳофизати ҳушёронаи онҳо қарор дорад.
Мо фарзанди як модарем, зодаю парвардаи як хокем ва хизмат намудан барои Ватани хеш ин қарзи фарзандии ҳар яки мову Шумо ба ҳисоб меравад.
Фирдавс Шарифзода дар анҷоми суханронии худ изҳори умедворӣ намуд, ки хизматчиёни ҳарбии Қувваҳои мусаллаҳи Тоҷикистон бо қудрату нерў ва қобилияту зиракии хеш ҳамеша ба иҷрои рисолати муқаддаси худ, яъне, ҳифзи Ватан – Модар ва дифоъ аз манфиатҳои давлату миллат омодаанд. Бо боварӣ метавон изҳор намуд, ки афсарону сарбозони далеру шуҷои Ватани азизамон ба савганди ҳарбии худ ҳамеша содиқ монда, рисолати фарзандии худро дар назди Ватан, миллат ва давлати худ минбаъд низ содиқона адо мекунанд ва тамоми донишу таҷриба, малакаву маҳорати худро ба хотири ҳифзи давлатдории навини миллати тоҷик, яъне давлати демократӣ ва ҳуқуқбунёду дунявии Тоҷикистон сафарбар сохта, дар соли 2022 – соли ҷашнгирии 25 – умин солгарди Рӯзи Ваҳдати миллӣ, 30 – юмин солгарди Иҷлосияи тақдирсози ХVI Шӯрои Олии Ҷумҳурии Тоҷикистон, ки воқеан ҷашнҳои бузургу муқаддаси миллиамон маҳсуб меёбад бо хизмати содиқона, интизоми намунавӣ ва омодабошии баланд истиқбол мегиранд.
Сипас ғолибони озмуни шаҳрии “Суруди сарбоз” бо диплом ва туҳфаҳои хотиравии Раиси шаҳри Хуҷанд қадршиносӣ гардиданд. Ҳамин тавр, қисми ҳарбии 0235 қушунҳои сарҳадӣ мақоми аввал, қисмҳои низомии 3501 қушунҳои дохилӣ ва 0151056 –и Гвардияи миллӣ ҷойи дуюм ва қисми низомии 14356-и Вазорати мудофиа ва горнизони ҳарбии вилояти Суғд мақоми сеюмро ба даст оварданд. Ба як қатор сарбозон ва афсарон низ туҳфаҳои отиравӣ тақдим карда шуд,
Барномаи фарҳангӣ бо фарогирии сурудҳои ватандӯстонаю меҳанпарварона ба чорабинӣ ҳусни анҷом бахшид.
Дафтари матбуоти
Раиси шаҳри Хуҷанд
