02 Декабр 2021
Дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд конференсияи илмию амалии ҷумҳуриявӣ дар мавзӯи “Роҳҳои баланд бардоштани сифати таълими фанҳои ҷомеашиносӣ ва забонҳо дар макотиби таҳсилоти олии равияҳои техникӣ” баргузор гардид.
Конфронсро муовини директор оид ба илм ва инноватсияи Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд Усмонҷон Ахмедов ифтитоҳ намуда аз ҷумла зикр дошт, ки дар сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон соҳаи маориф яке аз соҳаҳои афзалиятнок ба ҳисоб рафта, таваҷҷуҳи Ҳукумат ва давлат ба соҳаи маориф ва илм сол аз сол афзун мегардад. Маҳз бо ҳидоят ва ғамхориҳои Сарвари давлат маблағгузории соҳа дар солҳои охир ба маротиб зиёд гашта, дар соҳа дигаргуниҳои куллӣ ба амал омаданд. Ҳукумати кишвар якчанд иқдомҳои шоистаро амалӣ намудааст, ки онҳо бевосита ба ташаккули маърифати фарҳангӣ ва забондонӣ, тафаккур ва фарҳанги техникӣ, баланд гардидани сифат таълим ва тарбия дар МТОК равона гардидаанд. Аз ҷумла эълон гаштани солҳои 2020-2040 солҳои рушди фанҳои табиатшиносӣ, дақиқ ва риёзи дар соҳаи илму маориф, баргузор намудани озмунҳои “Илм-фурӯғи маърифат” ва “Фурӯғи субҳи доноӣ китоб аст”, “Тоҷикистон ватани азизи ман”, ташкили ҷоизаи давлатӣ барои омӯзгорон ва ходимони илмӣ дар самти омӯзиш ва рушди фанҳои табиатшиносӣ ва дақиқ тасдиқи суханҳои дар боло қайдшуда мебошад. Дар солҳои охир аз тарафи Ҳукумати мамлакат як қатор стратегия ва барномаҳои давлатӣ дар соҳаи илму маориф қабул шудааст, ки барои ба роҳ мондани кори таълиму тарбия, пешбурди илму маориф ва тарбияи кадрҳои миллӣ мусоидат кардааст. Дар Паёми навбатии худ ба Маҷлиси Олии Ҷумҳурии Тоҷикистон аз 26-уми декабри соли 2018 Президенти мамлакат муҳтарам Эмомалӣ Раҳмон қайд намуданд, ки “Ҳадафи Роҳбари давлат аз ин ташаббусҳо баланд бардоштани сатҳи саводу маърифатнокии мардум ва дар навбати аввал, наврасону ҷавонон, тақвияти ҳисси миллӣ, ватандӯстиву ватанпарварӣ, ҳувияти миллӣ, арҷгузорӣ ва омӯхтани забон, таърих, фарҳанги бостонии тоҷикон, тавсеаи доираи донишу ҷаҳонбинии илмиву техникӣ ва рушди илмҳои дақиқу табиӣ дар кишвар мебошад”.
Таъкид шуд, ки миллате, ки ба илму дониш ва фарҳангу маънавиёт арҷ мегузорад, миллати ояндадор ва тавонову соҳибтамаддун аст. Чунки рушди тамоми соҳаҳои ҳаёти кишвар ва сатҳу сифати зиндагии мардум, пеш аз ҳама, аз дараҷаи донишу маърифат, забондонӣ ва соҳибкасбу соҳибҳунар будани аҳли ҷомеа иртиботманд аст.
Бахусус, дар замоне, ки илму технология бо суръати кайҳонӣ пеш меравад ва ҳар рўз уфуқҳои нави таҳаввулоти техникиву технологӣ зуҳур карда, дар шабакаҳои иттилоотӣ паҳн мегарданд, аз мутахассисон донистани забонҳои хориҷӣ ва ҷустуҷӯ ва истифодаи донишҳои навро талаб мекунад. Омода намудани кадрҳои ҷавон бо чунин салоҳиятҳо ба рушди инноватсионии мамлакат ва амалӣ намудани ҳадафҳои страегии рушд мусоидат хоҳад кард.
Бо назардошти чунин талаботи замони муосир Президенти мамлакат дар назди мо - маорифчиён вазифагузорӣ намуданд, ки дар тамоми зинаҳои таҳсилот – аз муассисаҳои томактабӣ сар карда, то гимназияву литсейҳо ва зинаҳои дигари таҳсилот ба таври ҳатмӣ забонҳои хориҷӣ, махсусан, забонҳои русиву англисӣ омӯзонида шуда, назорати қатъии сифати таълим ба роҳ монда шавад.
Пешвои муаззами миллат таъкид медоранд: “Агар мо хоҳем, ки давлатамон пешрафтаву нерӯманд ва ҷомеаи кишварамон осудаву мутамаддин бошад, коре кунем, ки фарзандонамон босаводу донишманд бошанд, дастовардҳои навини илму технологияҳои инноватсиониро азхуд намоянд, ду забони хориҷӣ, бахусус русӣ ва англисиро ба мисли забони модарӣ донанд ва ҳамқадами замон бошанд”.
Аз дигар тараф, дар омода намудани мутахассисони ҷавон ва тарбияи онҳо дар руҳияи ватандӯстиву ватанпарварӣ, ҳувият ва ҳисси миллӣ, арҷгузорӣ ва омӯхтани забон, таърих, фарҳанги бостонии тоҷикон мавқеи фанҳои ҷомеашиносӣ хеле назаррас мебошад.
Аз ин лиҳоз, фикр мекунам, мавзуи конференсияи имрӯза хеле мубрам ва саривақтӣ буда, баргузории он бо иштироки васеи олимон ва мутахассисони соҳа барои боз ҳам рушди соҳаи маориф, баланд бардоштани сифати таълими фанҳои ҷомеашиносӣ, забонҳои давлатӣ ва хориҷӣ ҳиссаи худро мегузорад.
Иттилоъ дода шуд, ки Донишкадаи политехникии Донишгоҳи техникии Тоҷикистон ба номи академик М.Осимӣ ҷиҳати иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти баланд бардоштани сифати таълим, азхудкунонии технологияҳои муосири иттилоотиву коммуникасионӣ, такмили сатҳи забондонӣ, боло бардоштани тафаккури техникии ҷавонон ҳамаи захираҳои дохилиро сафарбар намуда, тамоми шароити заруриро барои илмомӯзии донишҷӯён фароҳам овардааст. Дар донишкада 36 озмоишгоҳҳои бо таҷҳизоти муосир ҷиҳозонидашуда, 2 сехи истеҳсолӣ, 15 синфхонаи компютерӣ, 4 кабинетҳои лингофонӣ, 3 китобхона фаъолият мебарад. Ҳамаи синфхонаҳо бо проектор ва тахтаҳои электронӣ таъмин карда шудааст, ки барои баланд намудани самараноки раванди таълим мусоидат кардааст. Дар донишкада якқатор чораҳои судманд ҷиҳати баланд бардоштани сифати таълим амалӣ шудааст, аз ҷумла ташкили шуъбаи идоракунии сифат ва банақшагирии стратегӣ, ба роҳ мондани фаъолияти экспертони сифат, мунтазам гузаронидани пурсиши донишҷӯён, такмили ихтисоси омӯзгорон дар донишгоҳҳои ватанӣ ва хориҷӣ, ташкили имтиҳонҳои ниҳоӣ тариқи маркази тестӣ бо истифодаи технологияҳои иттилоотию коммуникатсияонӣ ва ғайра.
Дар донишкада ҷиҳати ҷалби донишҷӯён ба корҳои илмию тадқиқотӣ, баланд бардоштани завқи китобхонӣ ва ташаккули тафаккури фарҳанги миллӣ ва тафаккури техникӣ махфилҳои илмӣ, ихтирокорӣ ва эъҷодӣ фаъолият мебарад, мунтазам озмунҳои фаннӣ ва касбӣ, конференсияҳои илмӣ баргузор карда мешавад.
Хурсандиовар аст, ки омӯзгорон ва донишҷӯёни донишкада 30- солагии Истиқлолияти давлатии Ҷумҳурии Тоҷикистонро бо дастовардҳои арзанда пешвоз гирфтанд. Соли ҷорӣ мудири кафедраи барномарезӣ ва низоми иттилоотии донишкада Хуршед Худойбердиев ва омӯзгори фанни физикаи литсейи донишкада Бобоҷонов Ҷӯрабой ҷоизаи давлатии Ҷумҳурии Тоҷикистон барои олимон ва омӯзгорони фанҳои табиатшиносӣ, дақиқ ва риёзиро, ки дар остонаи ҷашни соҳибистиқлолии мамлакат бори аввал доир гардид, мушарраф гардиданд.
Дар даври ниҳоии озмуни ҷумҳуриявии “Илм - фурӯғи маърифат”, ки дар он 15 нафар донишҷӯён ва 4 нафар омӯзгорони донишкада иштирок намуданд, омӯзгорон Худойбердиев Х.А. соҳиби ҷойи 3-юм. Охунов З.Ю. ва Шодиев Ш. соҳиби ҷойҳои ифтихории 4-ум гаштанд. Аз ҳисоби донишҷӯён 4 нафар соҳиби ҷойҳои ифтихории 4-ум гаштанд ва бо ифтихорномаи АМИТ сарфароз гардонида шудаанд.
Дар олимпиадаи Академияи миллии илмҳои Ҷумҳурии Тоҷикистон Икромов Манучеҳр аз фанни физика ва Ҷӯраев Қадриддин аз фанни технологияи информатсионӣ соҳиби ҷойҳои сеюм гаштанд. Дар олимпиадаи ҷумҳуриявии байни МТОК донишҷӯён Зоҳирова Меҳрангез аз фанни химия ҷои якум ва Ҷураев Қадриддин аз фанни технологияҳои иттилоотӣ ва Абдуллоев Шарифҷон аз фанни аз назарияи иқтисодӣ ҷойҳои дуюмро ба даст оварданд.
Донишҷӯи курси 3-юми Дилноза Қосимзода дар даври ҷумҳуриявии озмун таҳти унвони “Маданияти андозсупорӣ – баҳои бофарҳангии ҷомеа” мақоми дуюмро касб намуда, бо мукофоти пулӣ ва ноутбук қадрдонӣ карда шуд. Донишҷӯи курси дуюми донишкада Каримова Хушнуда барои иштирок дар даври ҷумҳуриявии озмуни “Фурӯғи субҳи доноӣ китоб аст” роҳхат гирифт.
Сипас тибқи барномаи конфронс маърӯзаҳои илмӣ ба самъи ҳозирин раоснида шуд.
Дафтари матбуоти
Раиси шаҳри Хуҷанд
