16 Ноябр 2021
Дар толори Муассисаи давлатии «Кохи Суғдиён»-и шаҳри Хуҷанд бо иштироки фаъолон ва намояндагони касбу кори гуногуни шаҳр бо ифтихору саодатмандию сарфарозӣ Рўзи Президенти Ҷумҳурии Тоҷикистон мутантан таҷлил карда шуд.
Раиси шаҳри Хуҷанд Фирдавс Шарифзода дар оғози суханронии худ ҳамагонро бо Рӯзи Президенти Ҷумҳуриии Тоҷикистон самимона табрику таҳният намуда, аз ҷумла зикр дошт, ки бо фараҳмандию шукргузорӣ аз сиёсати муваффақонаю дурбинонаи Асосгузори сулҳу ваҳдати миллӣ – Пешвои маҳбубу муаззами миллат, эҳёгари тамаддуни тоҷикони дунё муҳтарам Эмомалӣ Раҳмон ҳамаи Шумо – ҳозирини арҷманд ва кулли сокинони шаҳри бостонии Хуҷандро ба муносибати Рӯзи Президенти Ҷумҳурии Тоҷикистон самимона муборакбод намуда, бароятон тансиҳативу хонаободӣ ва ба диёри биҳиштосои Тоҷикистон сулҳу сафо ва ваҳдати ҷовидонаро таманно менамоям.
Таъкид шуд, ки бо назардошти эътирофи фазилати сиёсатмадориву давлатдории навини кишвар, таъмини сулҳу ягонагии мардуми сарзамин ва болоравии обрўву нуфузи мақоми Тоҷикистони соҳибистиқлоли мо дар арсаи байналмилалӣ, ки ин паёмадҳо дар маҷмўъ ба салоҳиятнокиву фаъолияти босамари Президенти мамлакат вобастагӣ дорад, дар қонунгузории кишварамон рўзи 16 ноябр – Рўзи Президенти Ҷумҳурии Тоҷикистон пазируфта шудааст.
Шахсиятҳои барҷастаи таърихӣ бо зиндагӣ ва амали неки худ дар сарнавишти ҳар як халқу кишвар нақши равшан гузошта, гузаштаи пурғановати халқу миллати худро барои ҷаҳониён муаррифӣ менамоянд, роҳи имрўзу фардоро чун машъали фурўзон нурфишонӣ мекунанд. Дар ин ҷода шахсияти Пешвои муаззами миллат муҳтарам Эмомалӣ Раҳмон ҳамчун чеҳраи барҷаста ва маъруфи сиёсии арсаи байналмилалӣ дорои нақшу мақоми хос мебошад. Аз ҷиҳати мустаҳкам шудани пояҳои давлатдории тоҷикон ва рушду нумўъ ёфтани тамоми бахшҳои ҷомеаи кишвар хизматҳои Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон хеле бузург аст. Дар таърихи навини халқи тоҷик дастовардҳои истиқлолияти кишвар ва амалҳои бунёдкоронаи ин шахсияти бузург бо ҳамдигар иртиботи қавӣ доранд.
Пешвои миллат муҳтарам Эмомалӣ Раҳмон дар ҳақиқат ҳам асосгузори сулҳу ваҳдати миллӣ ва пешвои сарнавиштсози тоҷикон мебошанд. Ба шарофати сиёсати бунёдкорона ва созандаи ин марди бузург Ҷумҳурии Тоҷикистон аз даргириҳои дохилӣ раҳоӣ ёфта, имрўз чун давлати соҳибихтиёр дар харитаи ҷаҳон ҷой гирифта, онро тамоми мардуми дунё мешиносанд ва эътироф мекунанд.
Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон замоне дар вазифаи раиси Шўрои Олии Ҷумҳурии Тоҷикистон ба остонаи сиёсати сатҳи баланд қадам гузоштанд, ки мамлакат дар вартаи ҳалокат қарор дошт.
Раиси шаҳр афзуд, ки набояд фаромӯш сохт, ки пас аз кўшишҳои пайгирона ва маслиҳату машваратҳои тўлонии нерўҳои солимфикри ҷомеа ниҳоят имконият даст дод, ки 16 ноябри соли 1992 дар шаҳри Хуҷанд ҷаласаи Шўрои Олӣ баргузор гардад. Ин ҷаласа, ки дар он паёми ваҳдат ва ягонагии миллати тоҷик ба таври қатъӣ садо дод, дар таърихи Тоҷикистони навин марҳилаи наверо боз намуд. Тоҷикистон соҳиби Ҳукумати қонунӣ гардид ва роҳбари арзандаи хешро интихоб намуд. Бори аввал дар таърихи Тоҷикистон шахсе ба маснади олии давлат баромад, ки воқеан миллӣ ва аз миёни мардуми заҳматкаш буд ва аз орзуву ормон ва дарди миллат огоҳии комил дошт.
Зикр шуд, ки Иҷлосияи таърихии 16-уми Шўрои Олии Ҷумҳурии Тоҷикистон ба фаъолияти қонунгузории давраи навини Тоҷикистони соҳибистиқлол ибтидо гузошт. Маҳз ба шарофати ин Иҷлосия шаҳрвандони Тоҷикистон таъмини соҳибихтиёрии давлатро дарк ва баробарҳуқуқию дўстии тамоми миллату халқиятҳоро эътироф карда, 6 ноябри соли 1994 Конститутсияи нави мамлакатро қабул намуданд. Қабули Конститутсия ва дар асоси он интихоб намудани Президенти Ҷумҳурии Тоҷикистон, вакилони халқ ба Маҷлиси Олӣ ва маҷлисҳои маҳаллӣ ва тасдиқу таъйини ҳамаи сохторҳои давлатӣ ҷумҳуриро ба сўи таҳкими ҳокимият ва бунёди ҷомеаи демократӣ, ҳуқуқбунёд ва дунявӣ ҳидоят менамуд.
Пешвои муаззами миллат муҳтарам Эмомалӣ Раҳмон дар солҳои аввали Истиқлолият, ки давраи ниҳоят вазнин, вале сарнавиштсоз буд, ба хотири таъмини сулҳу субот, барқарор кардани низоми конститутсионӣ, ба роҳ мондани фаъолияти рукнҳои фалаҷгардидаи давлатдорӣ ва ба даст овардани ҳамдигарфаҳмиву ваҳдати миллӣ, ташкилу амалӣ намудани низоми идоракунии соҳаҳои иқтисодӣ ва иҷтимоии кишвар саъю талош ва кўшишу заҳмати беандоза ба харҷ доданд.
Фирдавс Шарифзода гуфт, ки боиси ифтихор аст, ки Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон бо ташаббускориҳои наҷиб, ибрати шахсӣ ва иродаи нерўманди худ ҷиҳати таъмини амнияту осоиштагӣ, рушду нумўи мамлакат ҳамчун Пешвои миллат халқро ба созандагиву бунёдкорӣ ва худшиносии милливу ватанпарастӣ ҳидоят менамоянд. Ин аст, ки дар ҷомеаи ҷаҳонӣ сиёсати ваҳдатофари Пешвои муаззами миллатро чун намунаи олии ибрат дониста, сиёсатмадорони дунё онро бо дарки баланд пазируфтаанд.
Президенти мамлакат муҳтарам Эмомалӣ Раҳмон дурахшонтарин чеҳра, нахустин тоҷике дар таърихи навин мебошанд, ки дар маснади муаззами роҳбарӣ паёмҳои миллии моро дар паҳнои ҷаҳон интишор доданд ва бо хираду ҷасорати беназир Тоҷикистонро бо он ҳама сармояҳои бузурги фарҳангӣ дар бунёди давлати миллии демократӣ барои кулли кишварҳои дунё шинос намуданд.
Роҳе, ки то расидан ба мақоми Пешвои миллат муҳтарам Эмомалӣ Раҳмон бо камоли ҷавонмардӣ, ҳирадмандӣ ва сарбаландӣ тай намуданд, роҳи пур аз заҳмат буд. Тоҷикон бо ҳидояти ин фарзанди фарзонаи миллат, ки бо ҷасорат ва садоқати беандоза масъулияти дирўзу имрўз ва фардои миллатро бар дўш гирифта буд, давлати соҳибистиқлоли Тоҷикистонро бунёд ниҳоданд ва ҳама заминаҳо ва василаҳои рушди сиёсӣ ва маънавии онро фароҳам оварданд.
Аз замони ба даст овардани ваҳдати миллӣ сӣ сол аст, ки Тоҷикистон бо эътимоди қавӣ ба ояндаи дурахшони худ дар ҷодаи таҳкими истиқлолияти давлатӣ дар ҳалқаи кишварҳои мутамаддини ҷаҳон бо сарбаландӣ, шарофатмандӣ ва шоистагӣ пеш меравад.
Имрўз каломи Сарвари мамлакат муҳтарам Эмомалӣ Раҳмон дар бузургтарин ва баландтарин минбарҳои ҷаҳон садои миллати тоҷик аст, ки дар фазои сиёсии ҷаҳон бо ғуруру ифтихор, бо камоли шоистагӣ садо медиҳад. Бо ҳидояти ин шахсияти оламшумул миллати тоҷик дигарбора мақоми таърихӣ ва ҷаҳонии худро эҳё намуд.
Дар анҷоми суханронии худ шаҳрдор изҳори умедворӣ намуд, ки дар оянда низ Ватанамон ҳамеша обод, эътибораш доимо афзун ва ба бахти миллати мо Пешвои маҳбуб ва сарвари саодатофарини мо ҷовидона боқӣ бимонанд.
Барномаи фарҳангии аҳли санъати шаҳр бахшида ба Рўзи Президенти Ҷумҳурии Тоҷикистон ба чорабинӣ ҳусни дигар зам намуд.
Дафтари матбуоти
Раиси шаҳри Хуҷанд
