22 Май 2021
Дар толори калони Донишкадаи политехникии Донишоҳи техникии Тоҷикистон ба номи академик Муҳаммад Осимӣ дар шаҳри Хуҷанд ҳамоиши ҷавонон бахшида ба Рўзи ҷавонон баргузор гардид.
Нахуст номаи муборакбодии директори донишкада, номзади илмҳои техникӣ Дилафрўз Саидӣ аз ҷониби муовини директор оид ба корҳои тарбияи Гулшан Довудов ироа гардид, ки дар он аз ҷумла зикр шудааст: “ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҷавонон ҳамчун нерӯи созанда ва фардосози миллат аз рӯзҳои аввали соҳибистиқлолӣ эътимоди қавӣ дошта, дар яке аз баромадҳояшон таъкид дошта буданд: “Ватанро дӯст доштан, аз он ифтихор кардан, барои ҳимояи он омода будан, ба қадри сулҳу субот, осудагиву ваҳдат ва истиқлолият расидан, шукронаи соҳибватаниву соҳибдавлатиро ба ҷо овардан аз ҷумлаи арзишҳое мебошанд, ки ҷавонони мо бояд онҳоро дастури зиндагии ҳаррӯзаи худ қарор диҳанд ва итминон дошта бошанд, ки танҳо дар ҳамин сурат мо метавонем кишвари воқеан ободу пешрафта ва тавоно бунёд намоем”.
Боиси ифтихор аст, ки Сарвари давлат дар сиёсати ҷавонпарваронаи хеш барои фароҳам овардани шароити мусоиди таълиму тарбия, тақвияти дониш ва малака майдони фарохро боз намуданд.
Таъкид шуд, ки таъсиси квотаҳо барои ҷавонони дурдаст барои дохил шудан ба муассисаҳои таҳсилоти олии касбӣ, стипендияҳои президентӣ, ҷоизаҳои ба номи “Исмоили Сомонӣ”, “Дурахшандагон” ба номи “Султон Умаров”, роҳандозӣ шудани Барномаву стратегияҳои давлатӣ ва даҳҳо дигар бозгӯи таваҷҷуҳи рӯзафзуни Сарвари давлат нисбати ҷавонон мебошад. Дар ин росто бо мақсади тақвияти дониш ва маънавиёт, бедор намудани завқи зебоипарастӣ ва ҷалби ҷавонон ба илмҳои риёзӣ, техникаву технологияи муосир бо ташаббус ва ҳидоятҳои созандаи Пешвои муаззами миллат озмунҳои “Фуруғи субҳи доноӣ китоб аст”, “Тоҷикистон Ватани азизи ман”, “Илм фурӯғи маърифат” таъсис ёфтанд, ки соҳибистеъдодҳоро ба ҳам овард. Ин иқдом дар қатори ҳазорон – ҳазор ҷавонони бедордил ва навовар ҷомеаи меҳнатии моро барои боз ҳам рушд бахшидани илму муосири миллӣ, татбиқи амалии лоиҳаҳо бештар водор кард. Чанде пеш дар донишкада озмунҳои “Илм фурӯғи маърифат” ва “Беҳтарин ихтиръкорон” дар сатҳи баланд доир шуда, иштирокчиёни фаъол бо Ифтихорномаю тӯҳфаҳои арзишманд қадрдонӣ шуданд. Ҳамзамон донишҷӯёни донишкада дар чандин озмуну олимпиадаҳо, мусобиқаҳои варзишӣ шарафи донишкадаро ҳимоя намуданд, ки ин бешубҳа ифтихори мост ва роҳбарияти донишкада онҳоро сазовор қадршиносӣ мекунад.
Аз ҷавонони саодатёри донишкада даъват ба амал оварда шуд, ки бештар аз илмҳои муосир огоҳии комил дошта бошанд, аз маҳорат ва корбарии устодони соҳибзавқ истифода баранд, вақтро беҳтарин дӯсти худ шуморанд. Зеро роҳбарияти донишкада донишҷӯёни соҳибистеъдод, навовар, донишманду варзишкорро ҳамеша дастгирӣ хоҳад кард. Ин амали шумо барои роҳ надодан барои шомилшавӣ ба ҳизбу ҳаракатҳои ғайриқонунӣ ва бекорӣ сипари боэътимод ҳоҳад шуд. Ҳар он амалҳои нангини террористиву экстремистие, ки имрӯз дар гӯшаву канори олам рух медиҳанд, аксаран дасти ҷавонон аст, ки аз бедонишиву гумроҳӣ ба ин роҳ рафтаанд. Мо бояд ба қадри сулҳ ва оромиву осоиштагӣ расем ва ба қавли Сарвари давлат миллатамонро соҳибӣ намоем ва шароити мусоиди таълимро самаранок истифода барем.
Сипас ба як қатор донишҷўёни фаъол ва комёб ифтихорнома ва дипломҳои мусобиқоти гуногун тақдим карда шуд.
Аз ҷумла, дар доираи моҳвораи ҷавонон барои шарафёб шудан ба Ҷоми директори донишкада мусобиқаҳои ваарзишии шашка, шоҳмот, баскетбол, футбол ва дигар намудҳо доир шуданд ва ғолибон бо Ифтихорнома ва тӯҳфаҳои хотиравӣ тақдиронида шуданд.
Барномаи рангини фарҳангӣ табъи ҳозиринро болида намуд.
Дафтари матбуоти
Раиси шаҳри Хуҷанд
