22 Июл 2016
Дар толори маҷлисҳои «Кохи Рӯдакӣ» бо иштироки соҳибкорони ватанӣ ва намояндагони соҳибкории вилояти Нижегородски Федератсияи Русия вохӯрӣ доир гардид.Дар ин вохӯрӣ муовини Раиси вилояти Суғд Анвар Яъқубӣ, Раиси шаҳри Хуҷанд Шариф Шарифзода ва ҷонишини Губернатор, ҷонишини раиси мақомоти ҳокимияти вилояти Нижегородск, вазири саноат, савдо ва соҳибкории вилояти Нижегородски Федератсияи Русия Люлин Евгений Борисович иштирок карданд ва сухан ронданд.
Вохӯриро Раиси шаҳри Хуҷанд Шариф Шарифзода ифтитоҳ бахшида, меҳмононро ба шаҳри бостонии Хуҷанд хайрамақдам гуфт. Зимни суханрониаш аз дӯстии халқҳои тоҷику рус, аз он ҷумла шаҳри Хуҷанд бо шаҳрҳои вилояти Нижегородск изҳори хушнудӣ карда, зикр сохт, ки халқи тоҷик аз азал мардуми меҳмоннавозу меҳнатқарин ва сулҳҷӯ буду ҳаст. Ҳамчунин, Шариф Шарифзода диққати меҳмононро ба вазъи иқтисодиву иҷтимоӣ, рушду такомули соҳаи саноати шаҳри Хуҷанд, аз ҷумла, саноати хӯрокворӣ ва бофандагӣ, рушди соҳаи туризму варзиш ҷалб сохта, барои ҳамкорӣ омода будани худро изҳор намуд.
Муовини Раиси вилояти Суғд Анвар Яъқубӣ низ оид ба муносибатҳои дӯстонаи кишварҳои Тоҷикистону Русия, дар хусуси ҳамкориҳои дуҷониба дар ҳамаи соҳаҳои муҳими хоҷагии халқ сухан кард.
Ҷонишини Губернатор, ҷонишини раиси мақомоти ҳокимияти вилояти Нижегородск, вазири саноат, савдо ва соҳибкории вилояти Нижегородски Федератсияи Русия Люлин Евгений Борисович оид ба соҳаи саноати мошинасозӣ, тайёрасозӣ, киштисозӣ, саноати кимиёвӣ, радиоэлектроника, соҳаи металлургӣ ва туризм маълумоти муфассал пешниҳод карда, барои ҳамкории минбъда тайёр будани худро баён сохт.
Дар навбати худ соҳибкорони вилояти Нижегородски Федератсияи Русия ва соҳибкорони шаҳри Хуҷанд бо маърӯза ва муаррифии ташкилоту коргоҳҳои худ назди ҳозирин сухан карданд.
Похомов Александр Владиславович, ки муовини сардори марказ-сардори раёсати фурӯши минтақавии ИОМ, ташкилоти «Группа ГАЗ»-и Федератсияи Русия мебошад, оиди ташкилот ва маҳсулоти истеҳсолмекардаи коргоҳаш маълумоти муфассал дод. Аз он ҷумла, иброз намуд, ки «Группа ГАЗ» дар истеҳсоли мошинҳои боркашон, мусофирбар ва микроавтобусҳо ба пешравиҳои назаррас ноил гашта, дар миқёси Федератсияи Русия яке аз мақомҳои аввалро соҳиб аст. Ин ташкилот дар 8 минтақаи кишвари Русия 13 нуқта дошта, беш аз 40 ҳазор мутахассиси сатҳи ҷаҳонӣ дар онҳо кор мекунад. Агар маҳсулоти дар соли 2013 истеҳсолкардаи ташкилот ба 23 кишвари ҷаҳон содир шуда бошад, дар соли 2015 миқдори кишварҳои содиротӣ 39 ададро ташкил кард. Ташкилот бо беҳтарин заводҳои мошинистеҳсолкунандаи ҷаҳон, аз қабили Шкода, Мерседес-Бенс, Шевролету Волтсваген ҳамкории мустаҳкам дорад. Микроавтобусҳои ин коргоҳ дар номинатсияи «Дурнамои сол -2015» ва «Беҳтарин нақлиёти Русия дар соли 2016» ғолиб омадаанд.
«Группа ГАЗ»- ҳамчунин воситаҳои нақлиёти калонҳаҷм, аз қабили мошинҳои борбардор, автобусҳои мусофиркашон, микроавтобусҳои боркашон ва мусофирбар, нақлиёти махсуси сохтмонӣ ва хизматрасониро вобаста ба талаботи ҷаҳонӣ истеҳсол карда, воситаҳои нақлиётии мазкур ба ҳамаи стандартҳои байналмилалӣ ҷавобгӯ мебошад.
Муовини вазири саноат, савдо ва соҳибкории вилояти Нижегородск Сазонов Игорь Гаврилович оид ба соҳаҳои саноати вазнин ва сабуки вилояти Нижегородск муфассал сухан кард. Аз он ҷумла, ба иштирокчиёни вохӯрии мазкур аён гашт, ки вилояти Нижнегордск дар боло рафтани сатҳи иқтисодии Федератсияи Русия саҳми арзанда доранд. Дар ин вилоят 74 фоиз автобус, 46 фоиз нақлиёти калонҳаҷми боркашон, 17 фоиз қубурҳои оҳанин, 15 фоиз маснуоти киштисозӣ, 10 фоизи коғази кишвари Русия истеҳсол гардида, 6 фоиз маҳсулоти нафти ин вилоят коркард мешавад.
Маърӯзачӣ қайд кард, ки дар вилояти Нижнегородск коргоҳи «Лукойл», заводи истеҳсоли метал, техникаи нақлиёти махсус, химияи нафтӣ, саноати тайёрасозӣ, киштисозӣ, саноати атомӣ, саноати радиоэлектронӣ, саноати сабуки ҷангал ва муассисаҳои илмӣ фаъолияти пурсамар доранд, ки барои ҳамкорӣ бо соҳибкорони тоҷик омода ҳастанд.
Соҳибкорони тоҷик, аз қабили муассиси ҶСК «Силкоат-боя», Дадохон Очилов, намояндаи ҶСК «Дӯстӣ Амирхон» Домуллоҷон Ҷабборов, директори ҶСК «Таҷпроф» Ҷамшед Ҷалолов, директори ҶСК «Сатн» Илҳом Бобоев ва чанд тани дигар аз кишвари Русия иҷрокунандаи вазифаи директори шӯъбаи фурӯши ширкати «Группа ГАЗ» Носов Евгений Владиславович, директори генералии ООО «НПО Гидравликаи саноатӣ» Шишулин Юрий Владимирович, директори тиҷоратии ООО «Технологияҳои нави саноатӣ» Румянцев Владимир Никалаевич оид ба маҳсулоти истеҳсолшуда ва нақшаҳои ояндаи ҳамкорӣ ба ҳозирин иттилоъ доданд.
Раиси шаҳри Хуҷанд Шариф Шарифзода ва ҷонишини Раиси вилояти Нижегородски Федератсияи Русия Люлин Евгений Борисович барои дар оянда ҳамкорӣ кардани соҳибкорони тоҷику рус тамоми имкониятҳоро фароҳам оварда, барои боз ҳам мустаҳкамтар гардонидани дӯстиву ҳамкории халқиятҳояшон ҷидду ҷаҳд хоҳанд кард, гуфта шуд дар фарҷоми вохӯрӣ.
Мавзуна Ваҳобова
