16 Май 2024
Недоступен ни однин перевод.
Дар толори Коллеҷи тиббии шаҳри Хуҷанд ба номи Ю.Б. Исҳоқӣ бо иқдоми маъмурият ва кумитаи иттифоқи касабаи ин муассисаи таълимӣ бахшида ба фаъолияти меҳнатии собиқадори меҳнат Абдуваҳҳоб Шарипов конфронси адабӣ таҳти унвони «Зиндагиномаи ибратомӯз барои ҷавонон» баргузор гардид.
Дар конфронс устодон, донишҷӯён, собиқадорони коллеҷ, аз ҷумла собиқ директорон Эшон Маҳмудов, Мақсуд Иномҷонов, Мирзо Азизов, Абдумаҷид Абдуллоев, Муътабар Раҷабова, Мунаввара Мамадова, Мавҷуда Қодирова, Моҳӣ Қодирова, Хурсандой Ашӯрова, Маъсуда Ғаниева, Мавлуда Аҳророва ва дигарон иштирок доштанд.
Нахуст аз ҷониби директори Коллеҷи тиббии шаҳри Хуҷанд Алимат Мавлонзода роҳи тайкардаи ибратбахши Абдуваҳҳоб Шарипов ба самъи ҳозирин расонида шуд.
Иттилоъ дода шуд, ки рисолати зиндагӣ чунин буда, ки ҳар кас ба қадри ҳиммату имконияти хеш дар рушду такомул ва ғанӣ сохтани маърифати инсонӣ ҳиссагузорӣ мекунад. Яке аз чунин нафарон Аълочии тандурустии ИҶШС, дорандаи Медали шуҷоат барои меҳнат Абдуваҳҳоб Шарипов мебошад. Устод аз ҷумлаи нафароне мебошад, ки аз оғози фаъолияти корӣ дар Муассисаи давлатии таълимии Коллеҷи тиббии шаҳри Хуҷанд ба номи Ю.Б. Исҳоқӣ дар ҳамаи самтҳои муассиса меҳнати шоён намудааст. Устод бо фаъолияти кории назаррас ва бо хизматҳои арзандааш ба мақому мартабаи баланд расидааст. Роҳи тайкардааш барои имрӯзиён намунаи ибрати омӯзиш аст.
Зикр шуд,ки ифтихори мо, устодони муассиса, шогирдон, аз он аст, ки устоди мушфиқу меҳрубон ва дар таълиму тарбия сахтгир, сахтгирӣ барои беҳбудии кор ва беҳбудӣ барои ояндаи неки ҷомеа нигаронидашуда, ки кам инсонҳое, имрӯз дар ҷомеаи меҳнатӣ дарёфт мешаванд, ки ба кору фаъолияти худ содиқ бошанд.
Абдуваҳҳоб Шарипов аз зумраи онҳое, маҳсуб меёбад, ки бо барӯмандӣ ва шахсияти нотакрори худ маҳбуб гаштаанду дар дилу дидаи мо устодону шогирдон ҷой гирифтаанд. Фаъолияти кории устод аз моҳи августи соли 1973 пас аз хатми факултети химия ва биологияи Донишкадаи давлатии омӯзгории шаҳри Хуҷанд дар омӯзишгоҳи тибби шаҳри Хуҷанд, имрӯза Коллеҷи тиббии шаҳри Хуҷанд ба номи Ю.Б. Исҳоқӣ ба ҳайси омӯзгор оғоз гардидааст.
Абдуваҳҳоб Шарипов дар кафедраи химия ва биология ҳамчун омӯзгори фанни биология дарс мегуфт. Истеъдод, маҳорати касбии баланд доштан ба ӯ имконият медиҳад, ки мудири факултети фелдшериро ба ӯҳда гирад.
Сипас аз тарафи раиси Кумитаи иттифоқи касабаи кормандони соҳаи тандурустӣ ва ҳифзи иҷтимоии аҳолии вилояти Суғд Олимхӯҷа Маллаев дар бораи фаъолияти кумитаи иттифоқи касаба дар вилояти Суғд ва саҳми собиқадорон дар соҳаи тандурустӣ ва пешравии он маълумот дода, зиндагиномаи Абдуваҳҳоб Шарипов ҳамчун намунаи ибрат барои ҷомеа арзёбӣ гардид.
Таъкид шуд,ки мавсуф дар вазифаи кумитаи иттифоқи касаба низ сарбаландона адои хизмат намудааст.Дар самтҳои тарбия, ки дар филиалҳои коллеҷ, ки дар ноҳияҳо ҷой доштанд, ҳамчун мутахассиси тарбия фаъолияти назаррас дорад. Солҳои раиси кумитаи иттифоқи касаба буданаш Хобгоҳи коллеҷи тиббии шаҳри Хуҷанд байни давлатҳои Иттиҳоди Шӯравӣ ҷои аввалро сазовор гардида буд, ки ин худ нишонаи меҳнати софдилона ва бо масъулияти баланд иҷро намуданро дорад. Дар асл ин гуна зиндагӣ ва фаъолияти шоиста ҳамзамон худ дарс аст, дарси ибрат, дарси одамият. Имрӯз шумораи сифатҳои нек ва корҳои пурарзиши устод басо фаровон аст.
Сипас дар вазъияти тантанавӣ Абдуваҳҳоб Шарипов бо нишони сарисинагии Кумитаи иттифоқи касабаи Чумҳурии Тоҷикистон қадршиносӣ карда шуд.
Дар чорабинӣ Мунисахон Умарова раиси кумитаи иттифоқи касабаи Коллеҷи тиббии шаҳри Хуҷанд ба номи Ю.Б. Исҳоқӣ низ баромад намуда, аз хислатҳои накӯи Абдуваҳҳоб Шарипов маълумот дод.
Дар конфронс собиқ ҳамкорон, шогирдон низ баромад намуда, аз зиндагиномаи ибратбахши Абдуваҳҳоб Шарипов нақлҳо карданд.
Абдуваҳҳоб Шарипов барои ташкили чунин конфронс ба роҳбарияти Коллеҷи тиббии шаҳри Хуҷанд арзи миннатдорӣ баён намуда, зикр дошт, ки дар оянда низ баҳри хизмат ба Ватану миллат омода аст.
Қисмати фарҳангии чорабинӣ анҷомбахши конфронс буд.
