27 Август 2026
Маркази назорати давлатии санитарӣ-эпидемиологии шаҳри Хуҷанд дар остонаи соли нави таҳсили 2026-2027 бо мақсади риояи қоидаҳои беҳдоштӣ ва пешгирии бемориҳои сироятӣ дар ҳамкорӣ бо роҳбарони муассисаҳои таълимии шаҳри Хуҷанд силсилаи чорабиниҳоро пиёда намудааст.
Дар муассисаи таҳсилоти миёнаи умумии №28-и шаҳри Хуҷанд бо иштироки директорони муассисаҳои таълимӣ ва роҳбарони муассисаҳои томактабии шаҳр ҷаласа оид ба пешгирии бемориҳои сироятӣ баргузор гардид.
Дар ҷаласа масъалаҳои муҳим вобаста ба ҳифзи саломатии кӯдакону наврасон, пешгирии паҳншавии бемориҳои сироятӣ дар муассисаҳои таълимӣ ва томактабӣ, риояи қоидаҳои беҳдоштӣ ва санитарӣ мавриди баррасӣ қарор гирифтанд.
Зимни вохӯрӣ Азаматхӯҷа Воҳидов, сардори Маркази назорати давлатии санитарӣ-эпидемиологии шаҳри Хуҷанд таъкид намуд, ки барои пешгирии бемориҳои сироятӣ ҳамкории мунтазами муассисаҳои таълимӣ бо кормандони соҳаи тандурустӣ, назорати вазъи саломатии хонандагону тарбиятгирандагон ва баланд бардоштани маърифати санитариву гигиении онҳо муҳим мебошад.
Ба роҳбарони муассисаҳо ҷиҳати тақвияти корҳои фаҳмондадиҳӣ, риояи талаботи санитариву беҳдоштӣ, пешгирии сироятёбии кӯдакон ва сари вақт андешидани чораҳои зарурӣ дар ҳолатҳои эҳтимолии беморӣ тавсияҳои дахлдор дода шуданд.
Таъкид шуд, ки ҳадаф аз баргузории чунин вохӯриҳо баланд бардоштани сатҳи огоҳии масъулон ва пешгирии бемориҳои сироятӣ дар байни кӯдакону наврасон мебошад.
Тавре, аз Маркази назорати давлатии санитарӣ-эпидемиологии шаҳри Хуҷанд ба мо иттилоъ доданд, бо назардошти фаро расидани фаслҳои тирамоҳу зимистон ва баланд шудани хатари паҳншавии бемориҳои сироятии мавсимӣ, аз ҷумла: грипп ва сироятҳои роҳҳои нафас, гепатити А, бемориҳои рӯдаю меъда, бемориҳои сироятии кӯдакона ва ғайра иҷрои як қатор чораҳо ба роҳбарони муассисаҳои таълимӣ тавсия дода шуд.
Кормандони Марказ таъмини тозагӣ ва безараргардонии мунтазами синфхонаҳо, ошхонаҳо ва ҳоҷатхонаҳо, истифодаи ҳатмии собун ва маҳлулҳои зиддибактериявӣ барои шустани дастҳо; назорати қатъии сифати оби ошомиданӣ ва нигоҳдории дурусти маҳсулоти ғизоӣ; гузаронидани корҳои фаҳмондадиҳӣ миёни хонандагон ва аҳолӣ оид ба пешгирии бемориҳои сироятӣ; дар сурати пайдо шудани нишонаҳои беморӣ – фавран ҷудо ва ба муассисаи тиббӣ равон намудани шахси бемор аз тадбирҳои муҳими пешгирии паҳншавии бемориҳои мавсимӣ дар муассисаҳои таълимӣ медонанд.
Ҳамчунин аз волидайн хоҳиш карда мешавад, ки пеш аз фиристодани кӯдак ба мактаб, дар хона обро ҷӯшонанд ва ба зарфи пӯшида резанд. Дар хона ва назди кӯдак одати ҳамешагӣ — ҷӯшондани об пеш аз нӯшиданро роҳандозӣ намоянд.
Ҳамаи ин тадбирҳо имкон медиҳад, ки мо аз бемориҳои сироятӣ дур бошем, фарзандон ва худамонро аз мубталошави ба ҳаргуна бемориҳо эмин нигоҳ дорем.
Дафтари матбуоти
Раиси шаҳри Хуҷанд
