26 Август 2026
Дар МТМУ №18-и шаҳри Хуҷанд мулоқоти вакилони Маҷлиси намояндагони Маҷлиси Олии Ҷумҳурии Тоҷикистон Шӯҳрат Ғанизода ва Ғулом Ҳалимзода бо сокинони маҳалаҳои "Тути калон" ва "Чорчароғ" баргузор гардид.
Вакилони Маҷлиси намояндагони Маҷлиси Олии Ҷумҳурии Тоҷикистон Шӯҳрат Ғанизода ва Ғулом Ҳалимзода суханронӣ намуда, таъкид доштанд, ки Паёми навбатии Президенти Ҷумҳурии Тоҷикистон ба Маҷлиси Олӣ бори дигар собит сохт, ки маориф, илм ва фарҳанг ҳамчун рукнҳои асосии давлатдории миллӣ ва кафили ояндаи устувори миллат дар меҳвари сиёсати давлатӣ қарор доранд. Сарвари давлат аз рӯзҳои аввали роҳбарии худ рушди илму маорифро самти афзалиятнок эълон намуда, онро сармоягузории мустақим ба ояндаи дурахшони миллат арзёбӣ карданд.
Маориф ва илм на танҳо василаи омӯзиш, балки заминаи ташаккули инсонҳои соҳибмаърифат, ватандӯст ва худшинос мебошанд. Тавре дар Паём таъкид гардид, имрӯз зиёда аз 21 фоизи хароҷоти умумии буҷети давлатӣ ба соҳаҳои маориф ва илм равона мешавад. Танҳо дар соли 2026 барои соҳаи маориф қариб 14 миллиард сомонӣ пешбинӣ гардидааст, ки ин нишондиҳанда дар муқоиса ба солҳои қаблӣ афзоиши назаррасро нишон медиҳад. Ин сиёсати молиявӣ далели равшани он аст, ки давлат ба рушди сармояи инсонӣ аҳаммияти аввалиндараҷа медиҳад.
Бо дарназардошти афзоиши аҳолӣ ва пешгӯии расидани шумораи хонандагон ба чор миллион нафар дар 25 соли оянда, масъалаи омода намудани кадрҳои омӯзгорӣ, бунёди муассисаҳои нави таълимӣ ва мутобиқсозии низоми таҳсилот ба стандартҳои ҷаҳонӣ аҳаммияти стратегӣ пайдо мекунанд. Гузариш ба низоми дувоздаҳсолаи таҳсил ва такмили Стратегияи миллии рушди маориф то соли 2030 аз ҷумлаи иқдомоти муҳимме мебошанд, ки дар Паём ба онҳо таваҷҷуҳи хосса зоҳир шудааст.
Дар баробари маориф, рушди илм низ ҳамчун омили калидии пешрафти давлат баррасӣ мегардад. Бо ташаббуси Тоҷикистон эълон гардидани солҳои 2025–2034 ҳамчун «Даҳсолаи илмҳои криосфера» нишон медиҳад, ки илми тоҷик тадриҷан ба сатҳи байналмилалӣ ворид шуда истодааст. Омӯзиши пиряхҳо, захираҳои об ва тағйирёбии иқлим на танҳо аҳаммияти миллӣ, балки аҳаммияти ҷаҳонӣ дорад. Табдил додани Маркази омӯзиши пиряхҳо ба Институти омӯзиши пиряхҳо ва криосфераи Академияи миллии илмҳо заминаи мустаҳками рушди илмии ин самт хоҳад шуд.
Дар мулоқот муовини раиси шаҳри Хуҷанд Ҷамшед Набизода низ иштирок ва суханронӣ намуд.
Дафтари матбуоти
Раиси шаҳри Хуҷанд
