06 Март 2022

Дар Муассисаи давлатии таълимии "Мактаб барои хонандагони болаёқати шаҳри Хуҷанд" бо иштироки омўзгорон ва собиқадорони соҳаи маорфи шаҳр бахшида ба Рўзи модар тантанаи идона баргузор гардид.

Фирўза Нуруллозода, муовини Раиси шаҳри Хуҷанд номаи табрикотии Раиси шаҳри Хуҷанд Фирдавс Шарифзодаро ба муносибати Рўзи модар ба самъи Фирдавс зимни баргузории маҷлиси тантанавӣ бо иштироки устодону омӯзгорони муассисаҳои таълимии шаҳр ба муносибати таҷлили Рӯзи Модар ба самъи ҳозирин расонд, ки дар он аз ҷумла гуфта мешавад: “ Зан – модар мураббии аҳли олам ва устоди нахустини ҳар инсон мебошад.

Аз ин лиҳоз пос доштани иззату эҳтироми модар ва арҷ гузоштан ба мақому манзалати ў қарзи муқаддаси ҳар як инсон буда, подоши заҳмату бедорхобиҳои модар рафтори шоиста ва фазилатҳои неки ҳар як фарди солимфикр ва бонангу номус аст. Дар тамоми таърихи тўлонии миллати тоҷик низ рисолати офарандагиву тарбиятгарӣ, рўҳи озоду иродаи қавӣ, афкори наҷибу одоби ҳамида ва муҳаббату садоқати бепоёни зан – модар дар осори бузургони гузаштаву муосири тоҷик ситоиш гардидааст.

Бо арҷгузории самимона ва эҳтирому эътиқоди баланд ба хираду заковат ва бузургии Шумо – модарону бонувони иззатманд Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қайд намуданд: «Имрўз ҷомеаи Тоҷикистон дар симои зан на танҳо модар, хоҳар ва ҳамсар, балки сиёсатмадори шинохта, донишманди асил, сарвари муваффақ, соҳибкори саховатпеша, табиби ҳозиқ, корманди поквиҷдони мақомоти ҳифзи ҳуқуқ, ҳомии Ватан, бинокори номдор, мураббии наслҳо ва ҳамшираи меҳрубонро мебинад, ки ин мояи ифтихори ҳар яки мову Шумо мебошад.»

Таъкид шуд, ки имрўз занону модарони тоҷик ҳамсафу ҳамқадами замон буда, рисолати модариву қарзи шаҳрвандии худро дар густаришу такмил додани арзишҳои наҷибу волои инсонӣ, бахусус дар руҳияи баланди ватанпарастӣ тарбия намудани фарзандон, талқини андеша ва ҳувияти миллӣ, таҳкими худогоҳиву худшиносӣ ва ватандориву ватандўстӣ бо камоли масъулият адо менамоянд ва сазовори эҳтироми аҳли ҷомеа мебошанд. Воқеан, модар натанҳо азизтарин шахс барои ҳар як фарзанд, балки гаронбаҳотарин сарвати ҳар як халқу миллат мебошад. Барои мардуми соҳибфарҳанги тоҷик занону модарон чун сарчашмаи меҳру вафо, намунаи олии меҳрубонӣ, арзандатарин ҳастии ҳаёт буданду ҳастанд ва боқӣ хоҳанд монд. Аз ин ҷост, ки модарон арзандаи ҳамагуна эҳтирому дӯстдорӣ мебошанд, зеро онҳо меҳрубонтарин инсон барои ҳар як шахс ба ҳисоб мераванд.

Рушди соҳаи маориф аз самтҳои калидии сиёсати давлату Ҳукумати Тоҷикистон ба шумор меравад ва дар ин ҷода дар даврони соҳибистиқлолии мамлакат як қатор корҳои назаррас ба анҷом расонида шудаанд.

Бояд қайд намуд, ки айни ҳол дар шаҳр аз теъдоди умумии 2525 нафар омӯзгорони муассисаҳои таълимӣ 2215 нафар ё худ наздик 90 фоизро занону бонувон ташкил медиҳанд, ки ҳамарӯза бо таълиму тарбияи шоистаи фарзандони мардуми куҳанбунёдамон, омода намудани кадрҳои болаёқату соҳибмаърифат, худшиносу худогоҳ, созандаву ободкор ва муҳимтар аз ҳама, насли давомдиҳандаи кору пайкори халқи шарафмандамон машғул мебошанд.

Зикр бояд намуд, ки Ҳукумати Ҷумҳурии Тоҷикистон давоми солҳои охир баробари бомаром амалӣ намудани ислоҳоти ҳамаи зинаҳои таҳсилот бо мақсади ба меъёрҳои байналмилалӣ мутобиқ гардонидани он корҳои зиёдеро ба анҷом расонида истодааст, ки дар ин самт фаъолияти пурсамару натиҷабахши Шумо бахусус занонону бонувони маорифчиёни шаҳри Хуҷанд хеле назаррас мебошанд.

Сипас сардори Раёсати маорифи вилояти Суғд Осим Каримзода низ бонувонро бо Рузи модар табрику таҳният гуфта, таъкид дошт, ки бо такя ба нерўи созандаи Шумо – занону бонувони ватандўсту соҳибмаърифат, ҳама якҷо бо заҳмати содиқонаи худ дар соли 2022 – юм соли ҷашнгирии 25 – умин солгарди Рӯзи Ваҳдати миллӣ ва 30 – юмин солгарди Иҷлосияи тақдирсози 16 Шӯрои Олии Ҷумҳурии Тоҷикистон, ки воқеан ҷашнҳои бузургу муқаддаси миллиамон маҳсуб меёбад, дастовардҳои соҳаи маорифро боз ҳам афзун намуда, бо комёбиҳои нав пешвоз мегирем.

Сипас ба як қатор фаъолони соҳа Ифтихорнома, сипоснома ва туҳфаҳои хотиравӣ тақдим карда шуд.

Сипас барномаи пуршукуҳи фарҳангӣ бо иштирок ҳунармандони маъруфи кишвар ва хонандагону тарбиятгирандагони муассисаҳои таълимии шаҳр ба аҳли омӯзгорони шаҳр манзур карда шуд.

Дафтари матбуоти
Раиси шаҳри Хуҷанд