04 Апрель 2020

Субҳи имрӯз дар Донишкадаи политехникии Донишгоҳи техникии Тоҷикистон бо иштироки васеъи корхонаҳои саноатии шаҳр ва устодону хатмкунандагони донишкада ярмаркаи «Интихоби мутахассисони арзанда» баргузор гардид. Дар саҳни ҳавлии донишкада беш аз 60 корхонаҳои саноатии шаҳри Хуҷанд дар гӯшаҳои алоҳида молу маҳсулоти хешро муаррифӣ намуданд.

Хуршед Мақсудов, муовини директори донишкада зимни ифтитоҳи ярмаркаи «Интихоби мутахассисони арзанда» номаи табрикотии директори донишкада Дилафрӯз Саидиро ба самъи ҳозирин расонд, ки дар он аз ҷумла зикр гардидааст: «Ҳамасола дар донишкадаи мо баргузории чорабинии «Ярмаркаи интихоби мутахассисони арзанда» ба ҳукми анъана даромадааст. Ин тадбири муҳим ба хотири боз ҳам қавитар намудани робитаи донишкада бо ташкилоту корхонаҳо роҳандозӣ гардида, барои таъмини ҷойи корӣ ба хатмкунандагон ва ҳамчунин интихоби кадрҳои болаёқат ба роҳбарони коргоҳҳо мусоидат менамояд. Дар сиёсати давлат ва Ҳукумати Ҷумҳурии Тоҷикистон омода намудани мутахассисони касбӣ ва фароҳам овардани ҷойҳои нави корӣ дар мадди аввал қарор дорад. Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо дар баромадҳои худ таъкид медоранд, ки бобати фароҳам овардани ҷойи корӣ муассисаҳои таҳсилоти олӣ ва миёнаи касбӣ кӯшиш ба харҷ диҳанд».

Таъкид гардид, ки эълон гардидани солҳои 2020-2040 «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» аз таваҷҷуҳи Президенти мамлакат муҳтарам Эмомалӣ Раҳмон ба илмҳои дақиқ буда, баҳри расидан ба ҳадафҳои олии стратегии мамлакат мусоидат хоҳад намуд. Пешвои муаззами миллат дар яке аз баромадҳои хеш зикр дошта буданд, ки бояд курсҳои кӯтоҳмуддати омӯзиши касбу ҳунарро таъсис дода, ҷавонони бешуғлро ба он фарогир кунем, то онҳо тавонанд ҳунар омӯхта, соҳибкасб шаванд. Мутобиқ ба ин дастури Пешвои муаззами миллат муҳтарам Эмомалӣ Раҳмон соли хониши 2017- 2018 бо дастгирии Вазорати маориф ва илми Ҷумҳурии Тоҷикистон дар донишкада курсҳои кӯтоҳмуддат дар доираи лоиҳаи «Рушди таҳсилоти олӣ»-и Вазорати маориф ва илми Ҷумҳурии Тоҷикистон тибқи созишномаи дуҷонибаи Ҷумҳурии Тоҷикистон ва бонки умумиҷаҳонӣ ташкил гардиданд. Дар натиҷа зиёда аз 500 нафар ниёзмандон соҳиби сертификат гардида, имрӯз дар соҳаҳои таъмини барқ, нақлиёт ва дӯзандагӣ фаъолияти пурсамар бурда истодаанд.

Иттилоъ дода шуд, ки соли гузашта донишкадаро 813 нафар хатм карда, тибқи маълумотҳои оморӣ зиёда аз 96, фоизи хатмкунандагон сохиби ҷойи кори доимӣ гардиданд. Аз он ҷумла тариқи ярмаркаи “Интихоби мутахассисони арзанда” зиёда аз 94 хатмкунандагон соҳиби ҷойи корӣ шуданд. Соли равон бошад донишкадаро 818 нафар донишҷӯён хатм хоҳанд кард. Мутмаъинам, ки дар ярмаркаи мазкур низ хатмкунандагони болаёқат соҳиби ҷойи кори доимӣ мегарданд.

Таъкид гардид, ки роҳбарияти донишкада бо мақсади қавитар сохтани ҳамкорӣ бо ташкилоту муассисаҳо тасмим гирифтааст, ки бо роҳбарони ташкилоту корхонаҳо силсиламулоқотҳо доир намуда, барои пешравии кор, робитаҳоро мустаҳкам намояд. Зимни вохӯриҳо бо роҳбарони соҳаҳои кишоварзӣ, роҳу нақлиёт, маҳсулоти хӯрока, энергетика, сохтмон ва меъморӣ мушкиливу муаммоҳо гуфта шуд. Зикр шуд, ки ҷараёни таҷрибаомӯзиҳо тақвият мехоҳад. Натиҷаи ҳамин ҳамкориҳо буд, ки донишкада дар назди ташкилоту муассисаҳои корхонаи муштараки “Ҷавонӣ”, коргоҳҳои “САТН”, “Тиниал”, “Суғдшаҳрофар-М” бонкҳои “Арванд”, “Эсхата”, шабакаҳои барқии вилояти Суғд, филиали Суғдии Институти боғпарварию сабзавоткории Академияи илмҳои кишоварзии Тоҷикистон, ҷамъияти саҳҳомии “АРЗ -4” ва “Асотсиатсияи АББАТ” кафедраҳои сайёри худ таъсис дод.

Иттилоъ дода шуд, ки соли ҷорӣ ин анъана идома ёфта, дар назди ҶДММ “Суғдшаҳрофар” - кафедраи дизайн ва меъморӣ, дар назди ҶДММ "МТИИ Ассотсиатсияи АВВАТ" - кафедраи автомобилҳо ва идораи нақлиёт таъсис ёфта, ҳамкориҳо бо ҶСП ТАҚҲ “Имон” ба сифати нав бароварда шуданд. Мо аз он изҳори қаноатмандӣ мекунем, ки бо ширкатҳои сохтмонии «Тиниал», «Равзана пласт», «Старпласт», бонкҳои «Спитаменбонк», «Бонки Эсхата» «Бонки байналмилалӣ», «Имон Интернешнл», коргоҳҳои истеҳсолии «Дӯсти Амирхон», «Зода», «Яхмоси 33» , «Файзи Расул», «Ҷавонӣ», Ҷаъмияти саҳомии «Сорбон», «Барқи тоҷик» робитаи хуби ҳамкорӣ дорем ва ин робитаи мо минбаъд низ бо дигар ташкилоту коргоҳҳо бештар хоҳад шуд. Донишкадаи политехникии Донишгоҳи техникии Тоҷикистон сол аз сол вазъи пояи моддиву техникии худро беҳтар намуда, вазифаи асосиаш омода сохтани мутахассисони воқеан ҳам арзандаи соҳаҳо ва саҳм гузоштан ба чор ҳадафи стратегии мамлакат мебошад. Дар ин ҷода таъсиси озмоишгоҳҳои замонавӣ барои тақвияти дониши устодону донишҷӯён заминаи мусоид фароҳам меорад. Мусаллам аст, ки солҳои 2019- 2021 аз ҷониби Пешвои муаззами миллат Солҳои рушди деҳот, сайёҳӣ ва ҳунарҳоли мардумӣ эълон гардидааст, ҳадафи асосии ҳамаи ин корҳои донишкада тайёр намудани муттахассисони саводноки соҳаи саноати хӯрокаи ба талаботи замони муосир ҷавобгӯ ва таъмини амнияти озуқаворӣ мебошад. Ҳамчунин назди мо иҷрои вазифаҳои мушаххас -кушодани ихтисосҳои нав вобаста ба талаботи бозори меҳнат, таъсиси шӯрои дифои рисолаҳои номзадӣ ва докторӣ дар назди донишкада, вусъати забономӯзӣ ва боз ҳам мутобиқтар намудани шароити таълим ба талаботи ҷаҳонӣ меистад.

Сипас, сардори Сарраёти Агентии омори назди Президенти Ҷумҳурии Тоҷикистон дар вилояти Суғд Ҳокимбек Накҳатзода, муовини директори генералии ширкати “Арча—мебел Нарзулло Дадобоев ва дигарон баромада намуда, ташкил ва баргузории ярмаркаи «Интихоби мутахассисони арзанда» ба манфиати тарафайн арзёбӣ намуданд.

Шуъбаи кор
бо ВАО