15 Июл 2019

Дар толори Кумитаи иҷроияи ҲХДТ дар вилояти Суғд ҷаласаи васеи кумиҷроияи ҲХДТ дар шаҳри Хуҷанд оид ба ҷамъбасти натиҷаҳои фаъолият дар нимсолаи аввал ва вазифаҳо барои нимсолаи дуюми соли 2019 баргузор гардид.

Раиси кумиҷроияи ҲХДТ дар шаҳри Хуҷанд Наим Маликисломӣ ҷаласаро ифтитоҳ намуда, иттилоъ дод, ки дар рӯзномаи маҷлис 5 мавзуъ, аз ҷумла: ҷамъбасти натиҷаҳои фаъолият дар нимсолаи аввали соли 2019 баҳри баррасӣ ва амалӣ намудани қарорҳои маҷлиси кумитаҳои иҷроияи Марказӣ, вилоятӣ ва шаҳрии ҳизб; ахбороти комиссияи тафтишотӣ оид ба фаъолияти молиявии кумиҷроия дар нимсолаи аввали соли 2019; ҳисоботи роҳбари гурӯҳи вакилии ҲХДТ дар Маҷлиси вакилони халқи шаҳри Хуҷанд; тасдиқи фармоиши раиси Кумитаи иҷроияи ҲХДТ дар шаҳри Хуҷанд аз 24 майи соли 2019 оид ба Ситоди «Обуна -2020» ва меъёри обуна ба рӯзномаҳои ҳизбии «Минбари халқ», «Сухани халқ» ва “Шафақ”; тасдиқи қарорҳои маҷлиси Раёсати кумиҷроияи шаҳрӣ оид ба таъсиси ташкилотҳои ибтидоӣ ва қабули аъзо ба сафи ҳизб; тасдиқи нақшаи корӣ барои нимсолаи дуюми соли 2019; даъвати Конференсияи XХII ҳисоботӣ - интихоботии Кумитаи иҷроияи ҲХДТ дар шаҳри Хуҷанд; ва масъалаҳои ҷорӣ.

Аз рӯи масъалаи якум, яъне ҷамъбасти натиҷаҳои фаъолият дар нимсолаи аввали соли 2019 баҳри баррасӣ ва амалӣ намудани қарорҳои маҷлиси кумитаҳои иҷроияи Марказӣ, вилоятӣ ва шаҳрии ҳизб ҳисоботи раиси Кумитаи иҷроияи ҲХДТ дар шаҳри Хуҷанд Наим Маликисломӣ баромад карда аз ҷумла афзуд, ки дар ин давра 1229 нафар шахсони арзанда ба сафи ҳизб ҷалб шуданд. Айни замон шумораи ҳизбиён дар миқёси шаҳр ба 17 ҳазору 300 нафар расидааст ва аз ин шумора 11 ҳазору 221 нафарро занон ва 8 ҳазору 351 нафарро ҷавонон ташкил медиҳанд. Дар давраи ҳисоботӣ 6 адад корхонаву муассисаҳо ташкилоти ибтидоии ҳизбӣ таъсис доданд. Ба ҳолати моҳи июл шумораи ташкилотҳои ибтидоӣ дар шаҳри Хуҷанд ба 232 адад расид. Инчунин, 5 адад кумитаҳои иҷроияи ибтидоӣ фаъолияти худро идома дода истодаанд.

Ҷамшед Абдуқаюмзода, муовини раиси шаҳри Хуҷанд зимни суханронии худ аз ҳамкории босамари мақомоти иҷроияи маҳаллии ҳокимияти давлатӣ, саҳми аъзоёну фаъолон ва алоқамандони ҳизб дар раванди бунёдкорию созандагӣ ва ҳалли мушкилоти мардум ёдовар шуда, изҳори қаноатмандӣ карда, аз ҷумла баён дошт, ки аъзоёни ҳизб таблиғгари фаъоли ҷомеа буда, дар баргузории чорабиниҳои сиёсиву фарҳангӣ нақши калон доранд. Бо ташкили шӯъбаҳои кор бо занону ҷавонон мавқеи ҳизбро дар байни ин қишрҳои ҷомеа мустаҳкамтар намуданд. Гузашта аз ин, шӯрои собиқадорон дар назди Кумитаи иҷроияи ҲХДТ дар шаҳри Хуҷанд таъсис дода шуд ва минбаъд аз рӯи маслиҳату роҳнамоии пирони кор ва соҳибхирадон фаъолияти ҳизб пеш меравад. Мо аз иқдомҳои пайвастаи кумитаи иҷроияи ҲХДТ дар шаҳри Хуҷанд бобати пешгирии амалҳои ифротгароиву террористӣ, даъват ба зиндагии ростин, истиқбол менамоем, балки ин ташаббусро минбаъд дастгирӣ хоҳем кард.

Дар рафти музокира раиси ташкилоти ибтидоии «Ориён», директори Коллеҷи омӯзгорӣ Манучеҳра Кенҷазода, раиси ташкилоти ибтидоии «Маркази хун» Мирзонеъмат Наҷмиддинов ва раиси ташкилоти ибтидоии «Пӯлод Толис» Наима Раҳматова маърӯза карданд.

Муовини раиси Кумитаи иҷроияи ҲХДТ дар вилояти Суғд Аминҷон Шарифзода зимни суханронии худ, аз ҷумла гуфт, ки Кумитаи иҷроияи ҲХДТ дар шаҳри Хуҷандро аз ҷумлаи беҳтарин кумиҷроияҳои ҳизбии вилоят буда, фаъолияти намунавии он мояи пайравист.

Дар баробари зикри муваффақиятҳо номбурда камбудиҳои ҷойдоштаро зикр намуд, ҷиҳати ислоҳи саривақтии онҳо, боз ҳам тақвият бахшидани фаъолият маслиҳатҳои судманд дод ва ҳизбиёнро ба истиқболи сазовори ҷашнҳои мубораки 25-солагии ҲХДТ ва 30–солагии Истиқлолияти давлатии Ватанамон даъват кард.

Аз рӯи масъалаи дуюми рӯзномаи маҷлиси ҳисоботӣ раиси комиссияи тафтишотии кумиҷроия Абдумавлон Азимов маърӯза кард ва оид ба фаъолияти молиявӣ ба таври муфассал гузориш дод. Аз аъзоёни ҳизб даъват ба амал овард, ки дар мавриди пардохти ҳаққи узвият масъулиятшинос бошанд.

Бо баррасии масоили дигар ба ҷаласа ҳусни анҷом бахшида шуд.

Дафтари матбуоти
Раиси шаҳри Хуҷанд