12 Феврал 2019
Дар маҷлисгоҳи МТМУ №8-и шаҳри Хуҷанд бо мақсади пешгирии омилҳои номатлуби иҷтимоӣ миёни ҷавонон ва наврасон, аз қабили ҷинояткорӣ, терорризму экстремизм, шомилшавӣ ба ҳизбу ҳаракатҳои иртиҷоӣ, зӯроварӣ, ҳамзамон тарбияи ҷавонон дар руҳияи созандагиву бунёдкорӣ ва тарғиби идеологияи солим бо иштироки намояндагони Мақомоти иҷроияи ҳокимияти давлатии шаҳр, прокуратура, ҷавонон, хадамоти муҳоҷират ва муҳассилини мактаби номбурда мулоқот баргузор гардид.
Беҳруз Қурбонзода, ёрдамчии прокурори шаҳри Хуҷанд, номзади илмҳои ҳуқуқшиносӣ, дотсент дар маърӯзаи худ доир ба хатари терорризму эстремизм маълумоти муфассал дода, аз ҷумла зикр дошт, ки афзоиши хатарҳои терроризм ва экстремизм сабаби ташвиши ҷомеаи ҷаҳонӣ гардидааст. Аз таҳдидҳои ин зуҳуроти номатлуби аср Тоҷикистон низ истисно нест. Ва мубориза бо ин зуҳурот фақат кори мақомоти қудратӣ ҳисоб нашуда, аз ҳар фарди худогоҳу хештаншинос масъулияти ҷиддӣ тақозо мекунад. Яке аз роҳҳои асосии мубориза бо терроризм ва экстремизм баланд бардоштани маърифату дониши мардум, хусусан ҷавонон мебошад. Барои пешгирии ин зуҳуроти номатлуб дар Паёми навбатии Пешвои миллат муҳтарам Эмомалӣ Раҳмон дастурҳои мушаххас пешниҳод шудаанд, ки бояд сармашқи фаъолияти ҳамагон бошад.
Мавсуф таъкид намуд, ки азбаски ҷавонон неруи бузург ҳастанд, дар ҳама давру замон аз ин неру душманони миллат истифода карда, онҳоро барои амалӣ гардонидани ҳадафҳои нопоки хеш моил месозанд. Танҳо ҷавонони солимфикру босавод метавонанд ояндаи дурахшони миллати худро фароҳам созанд. Ва дар ташаккули насли ҷавон волидайн нақши муҳим доранд. Бояд падару модари дурбину некандеши мо дар тарбияи насли ҷавон дар рӯҳияи ватандӯстиву худшиносӣ, пешгирии шомилшавӣ ба ҳизбу ҳаракатҳои ифротгаро саъю талоши бештар ба харҷ диҳанд.
Иттилоъ дода шуд, ки решакан намудани зуҳуроти номатлуб- терроризм ва экстремизм, ки хатари рақами аввали ҷомеаи ҷаҳонист, аз масъулияти волидайн вобастагии зич дорад. Қабули Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» низ аз ин дидгоҳ мавриди амал қарор дода шудааст, то ин ки мо дар тарбияи фарзандони хеш масъулият дошта бошем. Иҷро нашгудани муқаррароти қонуни мазкур ба шаҳрвандон ҷавобгариро пешбинӣ намудааст.
Беҳруз Қурбонзода иброз дошт, ки Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо таъкид намудаанд, ки «Имрӯз терроризм ва экстремизм ҳамчун вабои аср ба амнияти ҷаҳон ва ҳар як сокини сайёра таҳдид карда, барои башарият хатари на камтар аз силоҳи ядроиро ба миён овардааст». Сарвари давлати мо ҳамчун ташаббускори ҳалли масоили глобалӣ аз минбарҳои бонуфузи байналмилалӣ ҷомеаи ҷаҳониро аз пайомадҳои даҳшатбори терроризму ифротгароӣ ҳушдор дода, ҳамагонро ба муборизаи муштарак алайҳи ин зуҳуроти номатлуб даъват намудаанд.
Рисолати ҳар як шаҳрванд аст, ки ҳушёрии сиёсиро аз даст надода, барои ободии Ватан бо дилу нияти пок заҳмат кашад. дар ҷомеаи имрӯза терроризм ҳамчун зуҳуроти хатарзо ба амнияти ҷомеъа ва ҷони инсонҳо таҳдид намуда, қурбониҳои зиёде ба миён овардааст. Ҳарчанд ин вабои аср дар гузашта низ домангири ҷомеъаи инсонӣ буд, вале охири асри ХХ он дар ҳошияи равандҳои ҷаҳонишавӣ бо суръат ташаккул ёфта, ба яке аз хатарҳои мудҳиштарин табдил ёфтааст. Дар поёни маърӯзаи худ Беҳруз Қурбонзода, ёрдамчии прокурори шаҳри Хуҷанд бо овардани мисолҳои дақиқи қонуншиканӣ аз ҷониби хонандагон, даъват ба амал овард, ки бо донишу рафтори намунавӣ ба камол расида, баҳри ободии сарзамини хеш саҳмгузорӣ намоянд ва падару модарашон аз онҳо ифтихор намоянд.
Дар ҷараёни мулоқот ҳамзамон намояндагони Мақомоти иҷроияи ҳокимияти давлатии шаҳри Хуҷанд, хадамоти муҳоҷират, ҷавонон ва дигарон баромада намуда, доир ба мавзуъи матраҳшуда андешаҳои хешро баён доштанд.
Мулоқот дар фазои озоду ошкоро ва ҳусни тафоҳум анҷом ёфт.
Дафтари матбуоти
Раиси шаҳри Хуҷанд