05 Ноябр 2018

Бо дастуру ҳидоятҳои Асосгузори сулҳу Ваҳдати миллӣ, Пешвои миллат, Президенти мамлакат мӯҳтарам Эмомалӣ Раҳмон шаҳри Хуҷанд яке аз шаҳрҳои зеботарини минтақа мубаддал гардидааст.

Бунёду азнавсозии  як қатор иншооти муҳими иҷтимоию иқтисодӣ ва фарҳангӣ, муҳайё сохтани инфрасохтори сайёҳӣ аз рисолати муҳими шаҳрдорӣ арзёбӣ гардидааст. Дар як муддати кӯтоҳ дар шаҳр баҳри фароғати шаҳрвандон маконҳои зебои фароғатӣ бунёд ва ба истифода дода шуд, ки он ба мардум зиндагии шоиставу арзандаро фароҳам овардааст.

Ҳамчун тадбирҳои меҳварӣ ва муҳим ҷиҳати беҳдошти вазъи иҷтимоии аҳолӣ давоми 8 соли охир  ба зиёда аз 6 ҳазор нафар оилаҳои эҳтиёҷманди шаҳри Хуҷанд қитъаи замини наздиҳавлигӣ дода шуд. Ва дар ин ҷойҳо асосан сохтмони манзил оғоз гардидааст.

Мутаасифона гурӯҳе аз шаҳрвандон дидаву дониста бар хилофи қонунгузории замин амал намуда, бидуни ҳуҷҷатҳои расмиёти замин дар қитъаҳои алоҳидаи шаҳр ғайриқонунӣ сохтмон намуда истодаанд.

Субҳи дирӯз тибқи супориши Раиси вилояти Суғд Раҷаббой Аҳмадзода, ки зимни боздид аз минтақаҳои шаҳри Хуҷанд ироа гардид, бо ҷалби гуруҳи кории иборат аз мақомоти назоратии замин ва шуъбаи меъморию шаҳрсозӣ дар маҳаллаи Чашмаи арзана аз сохтмони ғайриқонунии 14 хонаҳои шаҳрвандон ҷилавгирӣ намуданд. Бояд қайд намуд, ки тибқи талаботи моддаи 104-и  Кодекси замини Ҷумҳурии Тоҷикистон қитъаҳои замини худсарона ишғолкардашуда бе ҷуброни хароҷоте, ки дар муддати ғайриқонунӣ истифодабарӣ сарф шудааст, мувофиқи таъиноташон баргардонида мешаванд.

Ҷойгир намудани ҳамагуна бинову иншоот танҳо дар асоси нақшаи генералӣ ва нақшаи муфассали тарҳрезии маҳал, ки дар онҳо ҷойгиршавии бинову иншоот дарҷ гардидааст, бо риояи талаботи қоидаву меъёрҳои сохтмон ба роҳ монда мешавад.

Ҷоиз ба зикр аст, ки бархе шаҳрвандон ба нусхаи қарорҳои сохтаи гуруҳе аз фиребгарон бовар намуда, дар ин мавзеъ ғайриқонунӣ сохтмон намудаанд ва ё худсарона боа мри шифоии нафаре манзил бунёд намудаанд, ки бар хилофи қонунгузории замин аст.

Шаҳрвандон бояд дарк кунанд ва донанд, ки мувофиқи талаботи моддаи  26-и Кодекси замини Ҷумҳурии Тоҷикистон додан ва вобастакунии қитъаҳои замин ба уҳдаи  мақомоти иҷроияи маҳаллии ҳокимияти давлатии  шаҳр вогузор гардидааст. Аз ин лиҳоз ба ваъдаҳои бардурӯғу дасисабозиҳои ашхоси фиребгар бовар накарда, танҳо дар асоси қонунҳои амалкунанда соҳиби қитъаҳои замини наздиҳавлигӣ гарданд. Ва танҳо дар сурати ба даст овардани қарори дахлдори Мақомоти иҷроияи ҳокимияти давлатии шаҳр ва сертификати ҳуқуқи истифодаи замин ба сохтмон оғоз намоянд.

Дафтари матбуоти
Раиси шаҳри Хуҷанд