02 Май 2018

Дастпарвари мактаби захираҳои олимпии шаҳри Хуҷанд, муҳассили МТМУ№18-и шаҳр Муҳаммадалӣ Абдураҳмонов дар Чемпионати Осиё-2018 дар шаҳри Бангкоки кишвари Тайланд сазовори медали биринҷӣ гардид.

Ба ин муносибат истиқболи расмии варзишгар дар назди Кохи «Суғдиён»-и шаҳр бо иштироки варзишгарон, хонандагон ва ҷавонони фаъоли шаҳр дар фазои тантанавӣ сурат гирифт.

Мудири бахши ҷавонон ва варзиши Мақомоти иҷроияи ҳокимияти давлатии шаҳри Хуҷанд Бахтиёр Исматҷонов ин дастовардро қадами устувор дар иштирок ба Чемпионати ҷаҳон оид ба бокс унвон намуда, миннатдории Раиси шаҳри Хуҷанд Маъруф Муҳаммадзодаро ба варзишгар   Муҳаммадалӣ Абдураҳмонов расонд.

Дорандаи медали биринҷии Чемпионати Осиё-2018  Муҳаммадалӣ Абдураҳмонов аз пешвозгирии самимонаи мухлисон сипосгузорӣ намуда, аз ҷумла зикр дошт, ки минбаъд низ дар мусобиқоти ҷаҳонӣ шарафи Тоҷикистонро боло мебардорад.

Ҷоиз ба зикр аст, ки Муҳаммадалӣ Абдураҳмонов бо кӯмаки молии Раиси шаҳри Хуҷанд Маъруф Муҳаммадзода дар Чемпионати Осиё-2018 дар шаҳри Бангкоки кишвари Тайланд байни 30 давлати дунё иштирок намуда, Парчами кишварро парафшон намуд. Ва ин дастоварди арзишмандтарини мактаби захираҳои олимпии шаҳри Хуҷанд арзёбӣ мегардад.

Дафтари матбуоти
Раиси шаҳри Хуҷанд