15 Декабр 2016

Дар толори Кохи фарҳанги шаҳри Хуҷанд маҷлиси фаъолони шаҳри Хуҷанд бо иштироки намояндаи МИҲД вилоят- муовини Раиси вилояти Суғд Анвар Яъқубӣ, роҳбарони воҳидҳои сохтории Мақомоти иҷроияи ҳокимияти давлатии шаҳр, намояндагони ҳифзи ҳуқуқ, ташкилоту муассисаҳои шаҳр  ва намояндагони воситаҳои ахбори умум иштирок карданд.
Раиси шаҳри Хуҷанд Шариф Шарифзода ба кори ҷаласа оғоз бахшид. Муовини Раиси шаҳр Маъруф Муҳаммадҷонзода «Оид ба вазъи иқтисодию иҷтимоии шаҳри Хуҷанд дар моҳҳои январ- ноябри соли равон» маълумот дод. Мавсуф ҳини маърӯза зикр дошт, ки роҳбарияти Мақомоти иҷроияи ҳокимияти давлатии шаҳр ва зерсохторҳои он баҳри амалисозии дастуру супоришҳои Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон Эмомалӣ Раҳмон, Раиси вилоят Абдураҳмон Қодирӣ кӯшида, ба нишондиҳандаҳои назаррас ноил гардиданд. Давоми 11 моҳи соли равон 502 қарор аз ҷониби Раиси шаҳр Шариф Шарифзода ба тасвиб расид ва ба воситаи «Равзанаи ягона» рӯзҳои чаҳоршанбею шанбе 1188 нафар шаҳрвандро қабул ва розу ниёзи онҳо шунида шуд.
Корхонаҳои саноатӣ дар ин давра ба маблағи 691430,8 ҳазор сомонӣ маҳсулот истеҳсол карданд, ки нисбат ба ҳамин давраи соли 2015-ум 17,8 фоиз зиёд аст. Аз 161 корхонаи саноатии ҳисоботдиҳанда 17 адад нисбат ба сатҳи соли рафта бештар маҳсулот истеҳсол карданд.пасравии истеҳсоли маҳсулот ба назар расид. 18 корхона тамоман кор накард.
Сармоягузории асосӣ аз ҳисоби ҳамаи манбаъҳои сармоягузорӣ ба маблағи  185546,5 ҳазор сомонӣ истифода шуд. Ҳаҷми асосии корҳои иҷрошуда аз ҳисоби маблағи буҷетӣ 80380,6 ҳазор сомонӣ, ки  аз тарафи Маъмурияти коргоҳи сохташавандаи Хукумати шаҳри Хуҷанд ба маблағи 3835,5 ҳазор сомонӣ, Идораи сохтмони асосии вилояти Суғд ба маблағи  61672,0  ҳазор сомонӣ, Дирексияи иншоотҳои сохташавандаи назди Президенти Ҷумҳурии Тоҷикистон ба маблағи 627,8 ҳазор сомонӣ ва Идораи сохтмони асосии шаҳри Хуҷанд 16445,3 ҳазор сомонӣ кор иҷро карда шуд.
Маъруф Муҳаммалҷонзода ҳамчунин дар бораи ба кор андохтани фондҳои асосӣ, корҳои пудратии иҷрошуда, робитаҳои ҳамкории саноатчиён бо сармоягузорони дохилию хориҷӣ, фаъолияти иқтисодии хориҷӣ, соҳаҳои маорифу тандурустӣ, таъсиси коргоҳҳои атласу адрасбофӣ, тақсимоти замин ба оилаҳои ниёзманд, дастгирии оилаҳои камбизоат, пардохтаи нафақа ва ёрдампулӣ маърӯза кард.
Дар музокира мудири бахши саноат ва энергетика Мӯъминҷон Муҳаммадзода, сардори нозироти андоз Мунаввар Раҷабов, сардори Раёсати молия Абдусалом Бобоҷонов, муовини шуъбаи маориф Маҳмудҷон Абдурашидов, сардори бахши тандурустӣ Абдумуталлим Каримов, сардори КВД «Сарраёсати ободонӣ, хоҷагию манзилӣ»-и шаҳри Хуҷанд Зафар Бобоев иштирок карда, доир ба фаъолияти 11 моҳаи муассисаҳояшон маълумот доданд. Асосан ба камбудиҳои соҳаҳо эътибори ҷиддӣ  дода шуд. Хусусан фаъолияти номӯътадили корхонаҳои саноатӣ мавриди таҳлил қарор гирифта, набудани маблағ барои гардиши молӣ ва талабот ба маҳсулоти истеҳсолшаванда сабаб оварда шуд. Баҳри фаъолияти мунтазами корхонаҳо омӯхтани имкониятҳои мавҷуда ва дарёфти сармоягузор дастуру маслиҳатҳо дода шуданд.
Давоми соли равон дар шаҳр иҷро нагардидани нақшаи чаҳор намуди андоз қайд шуда, дарёфти сарчашмаҳои андозбандӣ, дуруст ба роҳ мондани ба қайдгирии молу мулки корхонаю муассисаҳо ва амволҳои ғайриманқул, соҳибони воситаҳои нақлиёт зикр гардид.
Дар соҳаи маориф бошад, коста гардидани интизоми толибилмон, ба ҷинояткорӣ даст задани наврасон, риоя нашудани қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» мавриди муҳокима қарор гирифт.
Дар соҳаи тандурустӣ бахшида ба «Соли фарди солим» корҳои анҷомдодашуда номбар гардида, сабабҳои зиёдшавии бемориҳои сироятӣ, таъминоти муассисаҳои тиб  бо кадрҳо, тайёр кардани мутахассисони донандаи таҷҳизоти замонавӣ мавриди баррасӣ қарор дода шуд.
Хусусан танқиди сахт нисбати фаъолияти сохторҳои КВД «Сарраёсати ободонӣ, хоҷагию манзилӣ» аз ҷумла, комбинати ободонӣ, муассисаи кабудизоркунӣ, қитъаҳои истифодаи  манзили соҳили рост ва чап, паст будани сифати таъмири роҳҳо баён гашта, андешидани чораҳои фаврӣ барои ислоҳи камбудиҳо масъулин вазифадор карда шуданд.
Муовини Раиси вилоят Анвар Яъқубӣ сухан карда, зикр дошт, ки пешравиҳо дар соҳаҳои хоҷагии халқи шаҳри Хуҷанд дида мешавад. Ба ин муваффақият саҳми мардуми оддии шаҳр низ басо назаррас аст. Заҳмати шабонарӯзии кормандони соҳаҳои мухталиф буд, ки шаҳри Хуҷанд ба ифтихори 25-солагии Истиқлолияти давлатии Ҷумҳурии Тоҷикистон дар миқёси кишвар яке аз беҳтарин шаҳрҳо дониста шуд. Лекин баробари  пешравиҳо камбудиҳо низ ба чашм мерасад, ки бояд барои ислоҳаш тадбирҳо андешид. Асосгузори сулҳу ваҳдати миллӣ- Пешвои миллат Эмомалӣ Раҳмон дар Паёми ҳарсолаи худ дар бобати муҳайё сохтани зиндагии шоиста барои мардуми кишвар ҳарф мезананд, аз ин рӯ имрӯз бояд дар фикри оянда бошем. Баробари бунёд кардани биноҳои баландошёна ва ҳавлиҳои истиқоматӣ доир ба сохтмони мактабу боғча ва муассисаҳои тиббӣ дар микроноҳияҳо тадбирҳо андешем. Бо ин мақсад сармоягузорони дохиларо пайдо намоем. Дар самти ривоҷи корхонаҳои саноатӣ, сохтмон кӯшем.
Шаҳри Хуҷанд дарвозаи шимоли Тоҷикистон маҳсуб меёбад. Аз ин рӯ моро зарур аст, ки ба рушди шаҳрсозӣ ва туризм эътибор диҳем, он гаҳ ба пешравӣ ноил хоҳем шуд. Анвар Яъқубӣ тамоми соҳаҳоро таҳлил намуда, андешаҳояшро бобати пешравиҳои соҳа баён дошт.
Раиси шаҳр Шариф Шарифзода дар хусуси фаъолияти босамари корхонаҳои навтаъсиси саноатӣ, аз ҷумла, корхонаҳои коркарди гӯшту шир, истеҳсоли масолеҳи сохтмонӣ ва зиёд кардани шумораи коргоҳҳои воридотивазкунанда ҳарф зада, нисбати ҷоннок намудани фаъолияти корхонаҳои аз замони  шӯравӣ амалкунанда изҳори нигаронӣ намуд. Дар боби ғанӣ гардонидани буҷаи андоз дар нуқтаҳои савдо  истифодаи мошинҳои назорати  хазинавӣ, ҳамроҳи комиссия дида баромадани андоз аз  моликияти ғайриманқул пешниҳодҳо дод. Дар соҳаи маориф беҳтар  кардани таълиму тарбия ва тайёр намудани хонандагони болаёқат, эътибор зоҳир намудан ба интизому роҳ надодан ба ҷиноятсодиркунии толибилмон, тадбирҳои судманд андешидан баҳри омодасозии мутахассисони варзида дар соҳаи тиб, ҳамзамон беҳдошти фаъолияти муассисаҳои ободонию кабудизоркунӣ ибрози назар кард.
Дар анҷоми маҷлиси фаъолон Раиси шаҳр барои рушди соҳаҳои хоҷагии халқ дар соли 2017-ум вазифагузориҳо кард.

Монаднисои Қурбон,
«Тирози ҷаҳон»