10 Октябр 2015

Дар асоси дастури Президенти Ҷумҳурии Тоҷикистон Эмомалӣ Раҳмон Мақомоти иҷроияи ҳокимияти давлатии шаҳри Хуҷанд давоми фасли тирамоҳ барои таъмини тамоми қишрҳои иҷтимоии мардум ба махсулоти кишоварзӣ ва захира намудани онҳо тадбирҳои судманд меандешад.
Ҳамчунин ин амал барои фароҳам овардани имконияти дастрасӣ ба маводи хӯрока бо нархҳои дастрас ва захира намудани маводи ғизо дар мавсими зимистон бо маҳсулоти ниёзи аввала мусоидат менамояд.
Имрӯз низ дар майдони «Ситораҳои Хуҷанд» деҳқонону кишварзони вилоят маҳсулоти худро ба сокинони шаҳр пешниҳод намуданд. Шаҳрвандони маркази вилоят имкон доштанд чанд намуди маҳсулоти мевагию полезиро аз қабили картошкаю сабзӣ, пиёзу себу ангурро бо нархҳои нисбатан арзон ба ҳаҷми 15фоиз ва гӯшту равған ва  биринҷро бошад бо нархҳои то 20 фоиз арзон нисбат ба бозорҳои шаҳр харидорӣ намоянд. Ҳамчунин ба харидорони намоиш-фурӯш ғалладонигию тухм низ пешкаш карда шуд, ки ба миқдору ҳаҷми  кифоя ба фурӯш гузошта шуд.