17 Август 2015
Ба ин муносибат дар назди бинои Китобхонаи оммавии ба номи Тошхоҷа Асирӣ «Ярмарка-фурӯши лавозимоти мактабӣ» доир гардид. Дар он Раиси шаҳри Хуҷанд Раҷаббой Аҳмадзода иштирок кард.
Тамоми хонандагону волидон ва устодони мактабҳои миёнаи умумӣ барои иштирок ва харидани лавозимоти мактабӣ ба ярмарка омада буданд. Дар ярмарка аз қаламу дафтар то либосҳои шинаму замонавии мактабӣ пешкаши волидон ва хонандагон гардид. Раиси шаҳр Раҷаббой Аҳмадзода бо фурӯшандагони ярмарка сӯҳбат карда, аз маҳсулоти пешкаш намудаи онҳо изҳори қаноатмандӣ кард. Маълум гардид, ки нарху навои лавозимоти мактабии дар ярмарка пешкаш шуда, нисбати нархи бозор 20 фоиз арзонтар аст.
Сипас дар қисмати расмии чорабинӣ Раҷаббой Аҳмадзода сухан карда, иброз намуд, ки дар ҳама давру замон мактабу маориф мақом ва мавқеи хосаро соҳиб аст. Бо қаноатмандӣ қайд кардан лозим аст, ки муассисаҳои маорифи шаҳр ин рисолати худро иҷро карда меоянд.
-Хонандагони лаёқатманди мактабҳои шаҳр дар Олимпиадаи ҷумҳуриявӣ иштирок карда, ба гирифтани 15 мақоми ифтихорӣ мушарраф гардиданд, ки ин нишондиҳандаи беҳтарин дар миқёси ҷумҳурӣ аст,-гуфт Раиси шаҳр зимни суханронӣ ва ҳамзамон афзуд, ки,- бобати ташаккул додани шавқу завқи хонандагон ба омӯзиши илму маърифат, ҷалби бештари онҳо ба тадқиқоти илмӣ, навиштани мақолаю гузоришҳо ва дар ин замина дарёфт намудани хонандагони болаёқату соҳибистеъдод озмуни ҷумҳуриявии сессияи «Академияи хурди илмҳо» баргузор гардид, ки аз 43 нафар хонандагони дар озмун иштирокдошта, 16 нафар ҷойи якум, 3 нафар ҷойи дуюм, 1 нафар ҷойи сеюм, 14 нафар аъзо-корреспонденти ҳақиқӣ, 9 нафар узви вобастаи академияи мазкур пазируфта шуданд.
Аз суханони Раиси шаҳр Раҷаббой Аҳмадзода аён гардид, ки айни замон дар мактабҳои шаҳр 76 синфхонаҳои компютерӣ барои баланд бардоштани сифати таълиму тарбия мавриди истифода қарор дода шудаанд ва ҳамаи онҳо ба шабакаи интернет пайваст мебошанд.
Омӯзгорон ва толибилмони муассисаҳои таълимии шаҳри Хуҷанд ҳамасола баҳри иҷрои дастуру супоришҳои ҷаноби олӣ, Президенти кишвар, муҳтарам Эмомалӣ Раҳмон ва Раиси вилояти Суғд, муҳтарам Абдураҳмон Қодирӣ кӯшишу ғайрат намуда, баҳри дар амал татбиқ намудани Дастурамали вазорати маориф дар бораи либоси тавсиявии хонандагони муассисаҳои таълимӣ иқдомҳои нав ба навро пеш гирифта истодаанд.
Мақомоти иҷроияи ҳокимияти давлатии шаҳри Хуҷанд бо мақсади таъмини хонандагони мактабҳо бо либоси ягонаи мактабӣ ва бедор намудани завқи зебоипарастӣ дар ниҳоди хонандагон тасмим гирифт, ки ҳар як мактаб дар намуди алоҳида соҳиби либоси мактабии худ гардад.
Мутобиқи талаботи Дастурамали либоси тавсиявии хонандагони муассисаҳои таълимӣ дар ҳамкорӣ бо ҷамъиятҳои дорои масъулияташон маҳдуди “Нассоҷи Хуҷанд” “Текстил-Сити”, “Модерн”, “Шероз”, “Раҳимӣ”, “20-солагии Истиқлолият”, “Наргис”, “Асри тиллоӣ”, “Банорас”, “Парки технологии Донишкадаи политехникии Донишгоҳи техникии Тоҷикистон”, “Алёнка”, “Бофанда” ва соҳибкорони инфиродӣ “Мансурова”, “Ҷамолов”, “Юсупова Гулрухсор”, “Турсунова” ҳамаи толибилмон бо либоси мактабӣ таъмин гашта истодаанд.
Дар соли хониши нав дар муассисаҳои таълимии шаҳр 33 ҳазору 642 нафар хонандагон таҳсил мекунанд, ки аз онҳо то имрӯз 5 ҳазору 560 нафар толибилмон бо либоси ягонаи мактабӣ таъмин мебошанд.
Дар рафти чорабинӣ Раиси шаҳри Хуҷанд Раҷаббой Аҳмадзода аз номи Президенти Ҷумҳурии Тоҷикистон, ҷаноби олӣ, мӯҳтарам Эмомалӣ Раҳмон ба 200 нафар кӯдакони камбизоат ва ятим либосҳои ягонаи мактабӣ тақдим намуд. Изҳори умед кард, ки ин дӯстрӯякон бо баҳои аъло таҳсил намуда, номбардори миллату Ватан мегарданд ва дар оянда барои ободии кишвари азизамон хидмати шоиста менамоянд.
Дар чорабинӣ нависанда Маъруф Бобоҷон, раиси шӯрои падару модарони мактаби таҳсилоти миёнаи умумии №8 Рафоат Тошева ва хонандаи гимназияи №1 Дилноза Нурмуҳаммадова сухан карда, миннатдории хешро ҷиҳати дастгирии ҳамаҷониба ва ғамхории беандоза ба давлату ҳукумат баён доштанд.
Бо ҳамин «Ярмарка-фурӯши лавозимотҳои мактабӣ» ба кори худ шурӯъ кард ва он то санаи 1-уми сентябр дар назди бинои Китобхонаи оммавии Тошхоҷа Асирӣ амал мекунад.