10 Август 2026
Дар маҳаллаи "Суғдиён-и шаҳр бо иштироки сокинон мулоқоти судманд баргузор гардид.
Дар мулоқот Моҳира Каримова, мутахасиси шуъбаи кор бо маҳаллаҳои шаҳри Хуҷанд, Назокат Юсупова, намояндаи Кумитаи иҷроияи ҲХДТ дар шаҳри Хуҷанд, Мунзифа Раупова, намояндаи Агентии меҳнат ва шуғли аҳолии шаҳри Хуҷанд, ноиби имом-хатиби масҷиди ҷомеаи "нури ислом" Абдусамеъ Зайниев иштирок намуда, вобаста ба масъалаҳои муҳими сиёсиву иҷтимоӣ ва тарбиявӣ суханронӣ карданд.
Зимни мулоқот масъалаҳои пешгирии ҷинояткорӣ дар байни ҷавонон, мубориза бо шомилшавии шаҳрвандон ба гурӯҳҳои экстремистиву террористӣ, пешгирии нашъамандӣ, баланд бардоштани маърифати ҳуқуқӣ, муқовимат бо бегонапарастӣ, муҳоҷирати меҳнатии қонунӣ, тарбияи ҷавонон дар рӯҳияи ватандӯстиву худшиносии миллӣ, инчунин ҷалби ҷавонон ба хизмати ҳарбӣ ва даъвати онҳо ба сафи Қувваҳои Мусаллаҳи Ҷумҳурии Тоҷикистон мавриди баррасии ҳамаҷониба қарор гирифтанд.
Иштирокчиёни мулоқот ҳамзамон аҳаммияти риояи талаботи қонунҳои Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ва «Дар бораи масъулият барои таълиму тарбияи кӯдак»-ро таъкид намуда, сокинонро ба эҳтироми арзишҳои миллӣ, тарбияи дурусти фарзандон, баланд бардоштани масъулияти шаҳрвандӣ ва саҳмгузорӣ дар таҳкими суботу амнияти ҷомеа даъват карданд.
Дар ҷараёни мулоқот зикр гардид, ки ҳар як сокини кишвар бояд барои ҳифзи сулҳу оромӣ, ваҳдати миллӣ, эҳтироми қонун ва рушди Тоҷикистони соҳибистиқлол саҳми арзандаи худро гузорад. Ҳамчунин оид ба омодагии ҳамаҷониба ва сазовор истиқбол гирифтани ҷашни бузурги миллӣ – 35-солагии Истиқлоли давлатии Ҷумҳурии Тоҷикистон андешаронӣ шуда, сокинон ба иштироки фаъолона дар корҳои ободониву созандагӣ, тозагии муҳити зист ва ҳифзи дастовардҳои даврони соҳибистиқлолӣ ҳидоят гардиданд.
Дар анҷоми мулоқот миёни сокинон ва масъулин мубодилаи афкор сурат гирифта, ба саволҳои иштирокчиён посухҳои мушаххас пешниҳод шуданд.
Дафтари матбуоти
Раиси шаҳри Хуҷанд
