Иҷлосияи сеюми Маҷлиси вакилони халқи шаҳри Хуҷанд, даъвати ҳафтум баргузор шуд

Дар кори иҷлосия муовини Раиси вилоят Анвар Яъқубӣ, вакилони Маҷлиси вакилони халқи шаҳри Хуҷанд, муовинони Раиси шаҳр, роҳбари дастгоҳи Раиси шаҳр, ҳамчунин роҳбарони воҳидҳои сохтории мақомоти иҷроияи ҳокимияти давлатии шаҳр, мақомотҳои ҳифзи ҳуқуқ, раисони маҳаллаҳо, сохторҳои корхонаи воҳиди давлатии коммуналии «Сарраёсати ободонӣ ва хоҷагии манзилию коммуналӣ»-и шаҳр иштирок намуданд.

Роҷеъ ба масъалаи якуми рўзнома оид ба рафти иҷрои Амри Президенти Ҷумҳурии Тоҷикистон аз 6 майи соли 2022, № АП-188 оид ба ҷашн гирифтани 35-солагии Истиқлоли давлатии Ҷумҳурии Тоҷикистон, муовини Раиси шаҳри Хуҷанд, вакили Маҷлиси вакилони халқи шаҳри Хуҷанд аз ҳавзаи интихоботии Рифъат Ҳоҷиев, № 28 Сӯҳроб Самадзода маърӯза намуд.

Иттилоъ дода шуд, ки мутобиқи Амри Президенти Ҷумҳурии Тоҷикистон аз 6 майи соли 2022, №АП-188 бо мақсади омодагии ҳамаҷониба ба ҷашни 35-солагии Истиқлоли давлатии Ҷумҳурии Тоҷикистон бо амри Раиси шаҳр аз 20 июни соли 2022, №77 аз ҳисоби роҳбарони ташкилоту идораҳо ва воҳидҳои сохтории мақомоти иҷроияи ҳокимияти давлатии шаҳр гурўҳи корӣ таъсис дода шуда, нақшаи чорабиниҳои шаҳрӣ оид ба корҳои ободонию бунёдкорӣ ба муносибати 35-солагии Истиқлоли давлатии Ҷумҳурии Тоҷикистон тасдиқ карда шуд.

Баҳри тақвияти корҳои ободониву бунёдкорӣ ва амалӣ гардонидани нақшаи чорабинии мазкур, ки аз 360 банд иборат буда, сохтмон, бунёд ва таъмиру таҷдиди зиёда аз 950 иншооти гуногуни соҳаҳои хоҷагии халқи шаҳр ба назар гирифта шуда, то ба имруз беш аз 1000 адади онҳо бунёд карда шудааст, ки он нисбат ба нақшаи пешбинишуда 105 фоизро ташкил медиҳад.

Таъкид гардид, ки Мақомоти иҷроияи ҳокимияти давлатии шаҳри Хуҷанд дар оянда низ, тамоми имкониятҳоро баҳри рушду такомули самтҳои иҷтимоию иқтисодӣ ва корҳои ободонию созандагиро пеша намуда, барои бо дастовардҳои назаррас пешвоз гирифтани ҷашни 35-солагии Истиқлоли давлатии Ҷумҳурии Тоҷикистон тадбирҳои муассир меандешад.

Дар музокира вакили шаҳрӣ Инъомҷон Поччоев баромад намуда, фикру мулоҳизаҳои хешро баён дошт.

Сипас, Раиси Маҷлиси вакилони халқи шаҳри Хуҷанд, Раиси шаҳр Фирдавс Шарифзода гурўҳи кории назди мақомоти иҷроияи ҳокимияти давлатии шаҳри Хуҷанд оид ба таҳияи нақшаи иловагии корҳои ободонию бунёдкорӣ ба муносибати 35-солагии Истиқлоли давлатии Ҷумҳурии Тоҷикистонро вазифагузорӣ намуд. Ҳамзамон масъулини дахлдор то ҷамъбасти ҷашни 35-солагии Истиқлоли давлатии Ҷумҳурии Тоҷикистон ҷиҳати тақвияти корҳои ободонию бунёдкорӣ муваззаф гардиданд.

Дар баррасии масъалаи дуюми рўзнома Ҳисоботи вакили Маҷлиси вакилони халқи шаҳри Хуҷанд аз ҳавзаи интихоботии Қорираҳмат Қурбон, № 4 Набиҷон Абдуразоқов оид ба амалисозии ваколати вакилӣ» шунида шуд.

Муовини Раиси шаҳри Хуҷанд, вакили Маҷлиси вакилони халқи шаҳри Хуҷанд аз ҳавзаи интихоботии Рифъат Ҳоҷиев, № 28, аъзои комиссияи доимии Маҷлиси вакилони халқи шаҳр оид ба масъалаҳои саноат ва энергетика, коммуникатсия, нақлиёт ва шаҳрсозӣ Сӯҳроб Самадзода нақшаҳои муфассали банақшагирии маҳаллаҳои шаҳри Хуҷандро ба вакилон муаррифӣ ва тасдиқи онро пурсид.

Вакилон баъди баррасӣ якдилона онро тасдиқ намуданд.

Дар ҷараёни иҷлосия як қатор қарорҳои Раиси шаҳри Хуҷанд тасдиқ гардид.

Анвар Яъқубӣ, муовини Раиси вилояти Суғд дар кори иҷлосия баромад намуда, роҷеъ ба мавзуъи матраҳшуда андешаҳои хешро баён дошт.

Раиси Маҷлиси вакилони халқи шаҳри Хуҷанд, Раиси шаҳри Хуҷанд Фирдавс Шарифзода кори иҷлосияи сеюми Маҷлиси вакилони халқи шаҳри Хуҷанд, даъвати ҳафтумро натиҷагирӣ намуда, аз ҷумла таъкид дошт, ки сокинони шаҳри Хуҷанди бостонӣ ва соҳибкорони бонангу номус ҷиҳати истиқболи сазовори ҷашни 35- солагии Истиқлоли давлатӣ тамоми донишу таҷриба ва кӯшишу ғайраташонро барои зиндагии орому осуда ва босаодати халқамон сафарбар намуданд, ки дар натиҷа нақша пеш аз мўҳлат иҷро шуд.

Зикр шуд, ки аслан мафҳуми созандагию бунёдкориро ҳам ба сохтани иморат, бунёди шаҳру деҳот ва ҳам ба тафаккури покизаи инсонӣ, обод кардани иморати зиндагӣ, бунёдгузории ҳаёти нав низ нисбат медиҳанд. Аз ин хотир, рў ба созандагӣ овардани мамлакат, бунёди даҳҳо иншооти таъйиноти иҷтимоию маишӣ ва фарҳангӣ, торафт ободу зебо гардонидани манзилу макон нишони тинҷию осоиш, устувории сулҳу амонӣ ва хотири ҷамъи мардум аст. Шукри онро мекунем, ки ин рисолат тавассути сиёсати пешгирифтаи Асосгузори сулҳу ваҳдати миллӣ- Пешвои муаззами миллат муҳтарам Эмомалӣ Раҳмон, дастуру супоришҳои Раиси вилояти Суғд Раҷаб Аҳмадзода ва заҳматҳои ватандўстонаи ҳар яки мо бо мазмуну мантиқи нав идома меёбад.

Асосгузори сулҳу ваҳдати миллӣ- Пешвои муаззами миллат муҳтарам Эмомалӣ Раҳмон дар ироаи Паём аз 28 декабри соли 2024 қайд карданд, ки “Мо вазифадорем, ки ба хотири пешрафти давлати соҳиб-истиқлоламон, ободии Ватани аҷдодиамон ва мунтазам беҳтар гардидани сатҳу сифати зиндагии ҳар як хонадони мардуми шарафманди Тоҷикистон ҳар рўз ва ҳамеша саъю талош намоем. Хусусан, мо бояд тамоми саъю талоши худро ба хотири амалӣ намудани корҳои ба ифтихори 35-солагии Истиқлоли давлатӣ пешбинигардида, яъне ободии Ватанамон, пешрафти давлатамон ва боз ҳам беҳтар гардидани шароити зиндагии мардумамон равона созем”.

Дар робита ба суханони ҳидояткунандаи Пешвои миллат фаъолияти дастаҷамъонаи ҳар яки мо, вакилон ва фаъолони шаҳр ба он нигаронида шавад, ки мо бояд мисли ҳамеша сарҷамъу муттаҳид бошем, Ватанамонро сидқан дўст дорем, онро соҳибӣ кунем, ҳисси баланди миллӣ дошта бошем, аз тоҷик будани худ ифтихор намоем ва доимо дар фикри ободии Ватан, миллат ва давлати хеш бошем.