03 Сентябрь 2025
Недоступен ни однин перевод.
Дар толори Маркази ташаккули тарзи ҳаети солими шаҳри Хуҷанд силсилаи машғулиятҳои омӯзишӣ дар мавриди ворид намудани иммунизатсия бар зидди вируси папиломаи одам, ки ба пешгирии бемории саратони гарданаки бачадон равона гардидааст, оғоз гардид, ки дар он кормандони тибби шаш марказҳои саломатии шаҳри Хуҷанд иштирок намуданд.
Иммунизатсия бо истифода аз ваксинаи Гардасил, ки дар Иёлоти Муттаҳидаи Амрико истеҳсол мегардад, гузаронида мешавад. Ваксинаи мазкур қариб 20 сол мешавад, ки дар мамлакатҳои гуногуни ҷаҳон истифода мегардад ва дар ин муддат самарабахшии худро дар самти пешгирии навъҳои саратоновари вируси папиломаи инсон исбот намуд. Таҷриба нишон медиҳад, ки ин вирус сабаби асосии ба вуҷуд овардани саратони гарданаки бачадон буда, ин бемории саратонӣ дар Ҷумҳурии Тоҷикистон дар байни бемориҳои саратонии занон дар ҷои дуюм меистад.
Ваксинаи мазкур дар доираи иммунизатсияи нақшавӣ ба духтарони 10 сола ва дар соли аввали вориднамоии иммунизатсия ба тақвими миллӣ ба духтарони 11-14 сола тавсия дода мешавад. Сабаби фарогирии синну соли мазкур дар он аст, ки дар ин давра иммунизатсия хеле самарбахш буда, ҷавоби иммунии қавиро таъмин месозад.
Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таи чанд соли охир тамоми чораҳоро ҷиҳати ворид намудани иммунизатсия бар зидди вируси папиломаи одам андешид ва имрӯз ба қаноатмандӣ гуфтан мумкин аст, ки дар Тоҷикистон низ имконияти таъмин намудани дастрасии занон ба ин ваксина пайдо шуд.
Иммунизатсия бар зидди вируси папиломаи одам воситаи асосии пешгирии бемориҳои пеш аз саратонӣ, инчунин саратони гарданаки бачадон, ки яке аз бемориҳои асосии саратонӣ миёни занон дар Ҷумҳурии Тоҷикистон маҳсуб меёбад, ба шумор меравад. Ин беморӣ на танҳо барои ҳаёти занон хатарнок мебошад, инчунин дар бисёри ҳолатҳо ба вайроншавии солимии репродуктивӣ сабаб мегардад.
Қайд гардид, ки аллакай 148 давлати дунё, аз ҷумла ИМА, Канада, ҳамаи кишварҳои иттиҳоди Аврупо ва ҷумҳуриҳои Осиёи Марказӣ, ба монанди Қазоқистон, Ӯзбекистон, Туркменистон ва Қирғизистон, инчунин давлатҳои мусулмонӣ, аз ҷумла Баҳрайн, Бангладеш, Индонезия, Қатар, Малайзия, Аморати Муттаҳидаи Араб, Арабистони Саудӣ ва Туркия дар Тақвими миллии иммунизатсияи худ ваксинатсияро бар зидди вируси папиломаи одам ворид намудаанд.
Ҷумҳурии Тоҷикистон ба ҳаракати умумиҷаҳонӣ вобаста ба ҳифзи солимии духтарону занон пайваст мегардад, ки он қадами муҳим дар самти пешгирии бемориҳои саратонӣ ва дар умум мустаҳкам намудани солимии миллат маҳсуб меёбад.
Дафтари матбуоти
Раиси шаҳри Хуҷанд
