03 Июль 2025
Недоступен ни однин перевод.
Санаи 3-юми июли соли 2025, дар доираи иҷрои нақшаи муштараки чорабиниҳои сохторҳои дахлдори шаҳри Хуҷанд ҷиҳати таҳкими рушди иҷтимоӣ ва робита бо ҷомеа, дар чойхонаи "Қӯшҳавз"-и кумитаи маҳаллаи Ҷаббор Расулов мулоқоти судманди намояндагони мақомоти давлатӣ бо сокинони маҳалла баргузор гардид.
Дар мулоқот муовини Раиси шаҳри Хуҷанд Ҷамшед Набизода, Раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Мунзифа Ҷабборӣ, намояндаи мақомоти амниятии шаҳр Шаҳром Бахтиёрзода, сардори Агентии меҳнат ва шуғли аҳолии шаҳр Султон Ғафуров ва ходими дин Илҳомиддин Раҳматов иштирок ва суханронӣ намуданд.
Муовини Раиси шаҳр Ҷамшед Набизода дар суханронии худ аҳамияти ободии Ватан ва ҳифзи сулҳу суботи пойдорро махсус таъкид намуда, изҳор дошт, ки маҳз ҳамбастагии миллӣ ва ҳисси баланди ватандӯстӣ моро ба сӯи фардои дурахшон раҳнамун месозад.
Раиси Кумитаи иҷроияи ҲХДТ дар шаҳри Хуҷанд Мунзифа Ҷабборӣ дар баромади худ вобаста ба масъалаҳои мубрами рӯз, аз ҷумла хатари терроризму экстремизм, ҳимояи арзишҳои миллӣ ва зарурати риояи фарҳанги либоси миллӣ изҳори назар кард. Ӯ зикр намуд, ки ҳифзи муқаддасоти фарҳангӣ ва эҳтиром ба урфу одатҳои миллии тоҷикон яке аз вазифаҳои муҳими ҳар шаҳрванди худшиносу ватандӯст мебошад.
Шаҳром Бахтиёрзода, намояндаи мақомоти амниятӣ, зимни баромади худ дар бораи масъалаҳои таъмини амнияти миллӣ, пешгирии ҷинояткорӣ ва таҳкими волоияти қонун дар ҷомеа андешаронӣ кард.
Дар навбати худ, ходими дин Илҳомиддин Раҳматов доир ба масъалаҳои танзими анъана ва ҷашну маросимҳо, риояи меъёрҳои иҷтимоӣ ва нақши дин дар таҳкими маънавиёти ҷомеа изҳори андеша намуд.
Сардори Агентии меҳнат ва шуғли аҳолии шаҳр Султон Ғафуров доир ба имкониятҳои ҷойдошта барои таъмини сокинон бо ҷойи кор, омӯзишҳои касбӣ ва курсҳои ройгони омӯзишӣ суханронӣ намуда, ҷавононро ба омӯзиш ва фаъолият дар дохили кишвар ташвиқ кард.
Мулоқоти мазкур бо саволу ҷавоб ва муҳокимаи озоди сокинон идома ёфта, як қадами муҳим дар роҳандозии робитаи бевоситаи мардум бо мақомоти давлатӣ ва тақвияти ҳамкориҳои ҷомеа бо сохторҳои марбута гардид.
Ин иқдом бозгӯи таваҷҷуҳи роҳбарияти шаҳр ба рушди иҷтимоӣ, баланд бардоштани сатҳи маърифати шаҳрвандӣ ва таъмини суботи сиёсиву иқтисодӣ дар маҳаллаҳо мебошад.
