24 Октябрь 2024
Недоступен ни однин перевод.
Имрӯз Раиси вилояти Суғд Раҷаббой Аҳмадзода директори бахши обтаъминкунӣ ва рушди сохтмони шаҳр дар Бонки Осиёии Рушд Сринивас Сампат ва ҳайати ҳамроҳонашро ба ҳузур пазируфт.
Зимни мулоқот ҷонибҳо дурнамо ва ҳолати кунунии рушди соҳаи сайёҳӣ, зарфиятҳои соҳа ва аҳамияти ҳамкории мутақобилан судманд дар соҳаи сайёҳиро мавриди таҳлиу баррасӣ қарор доданд.
Раиси вилояти Суғд дар оғози суҳбат таъкид намуд, ки дар Тоҷикистони биҳиштосо ба рушди соҳаи сайёҳӣ таваҷҷуҳи махсус равона гардида, бо дастгирӣ ва ғамхориҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон инфрасохтори муҳими соҳаи сайёҳӣ бунёд, мавзеъҳои таърихиву фарҳангӣ дубора барқарор ва шароити арзанда барои ҷабули сайёҳон фароҳам оварда шудааст.
Дар вилояти Суғд давоми солҳои соҳибистиқлолӣ тамоми соҳаҳо, бахусус соҳаи сайёҳӣ рушд намуда, зарфиятҳои мавҷуда мақсаднок истифода мегардад. Ҳоло дар вилояти Суғд 45 ширкати сайёҳӣ, 97 субекти хизматрасонии сайёҳӣ, 24 осрохона ва дигар иншооти муҳими соҳа фаъолият доранд. Дар нуҳ моҳи соли равон тавассути гузаргоҳҳои сарҳадӣ ҳудуди 800 ҳазор нафар меҳмонони хориҷӣ ба вилояти Суғд ворид гардидаанд, ки нисбат ба ҳамин давраи соли гузашта 206 ҳазор нафар зиёд аст.
Гуфта шуд, ки бо маблағгузории Бонки Осиёии Рушд оид ба таҳияи “Нақшаи генералии сайёҳии ҳамгироишудаи вилояти Суғд” ба маблағи беш аз 1 миллион доллар бо ширкати машваратии "Киос" ба имзо расида, руйхати 25 лоиҳаи сармоягузорӣ вобаста ба рушди соҳаи сайёҳӣ дар вилояти Суғд омода шудаанд. Вилояти Суғд дорои имконоти зиёд дар соҳаи сайёҳӣ буда, дар оянда метавонад барои рушди сайёҳии куҳнавардӣ, экологӣ, шикорӣ, аграрӣ, таботабтию солимгардонӣ ва таърихию фарҳангӣ мусоидат намояд.
Сринивас Сампат, директори бахши обтаъминкунӣ ва рушди сохтмони шаҳр дар Бонки Осиёии Рушд аз пазироӣ ва таассуроташ аз маконҳои сайёҳиву таърихии вилояти Суғд бо хушҳолӣ ёдоварӣ намуда, ҳавасмандии Бонки Осиёии Рушд дар самти сармоягузорӣ барои рушди соҳаи сайёҳӣ баён дошт.
Қайд карда шуд, ки Тоҷикистон яке аз кишварҳои сайёҳӣ буда, ба рушди ин соҳаи муҳим таваҷҷуҳ раовна шудааст. Бонки Осиёии Рушд омода аст, ки дар ҳамкорӣ бо Ҳукумати Ҷумҳурии Тоҷикистон барои боз ҳам рушд бахшидани соҳаи сайёҳӣ, амалӣ шудани лоиҳаҳои муҳим сармоягузорӣ намояд. Зимни мулоқот ҷонибҳо бори дигар ҳавасмандии худро барои тақвияти ҳамкорӣ ва густариш бахшидани он изҳор дошта, дар ин самт шиносоии ҳайати меҳмонон бо маконҳои таърихиву фарҳангӣ ва сайёҳии вилояти Суғд муҳим арзёбӣ карда шуд.
