Асосӣ Бойгонӣ«Россотрудничество» ба гимназияи №1 беш аз 100 номгӯй китоб тақдим намуд

«Россотрудничество» ба гимназияи №1 беш аз 100 номгӯй китоб тақдим намуд

(0 овоз, миёна 0 аз 5)

28 Август 2024

Субҳи имрӯз аз ҷониби намояндагии «Россотрудничество» дар шаҳри Хуҷанд ба гимназияи №1 ба номи Раҳим Ҷалил 100 номгӯй адабиёти бачагонаи русӣ ва теъдоди зиёди барномаву дастурамалҳои омӯзиши забони русӣ тақдим гардид.

Зимни супоридани адабиёти бачагона роҳбари намояндагии «Россотрудничество» дар шаҳри Хуҷанд Татяна Мудрова гуфт, ки ҳадафи онҳо ба роҳ мондани ҳамкории байналхалқӣ дар самти гуманитарӣ буда, мақсад аз он ҳифзу рушди забони русӣ мебошад.
Маъмурияти гимназияи №1 ба роҳбарияти намояндагии «Россотрудничество» дар шаҳри Хуҷанд барои чунин иқдом изҳори сипосгузорӣ намуд.
Ҳамзамон барои омодакунӣ ва дар оянда таҳсил намудани хонандагони  гимназияи №1 ба номи Раҳим Ҷалили шаҳри Хуҷанд дар донишгоҳу донишкадаҳои федератсияи Русия байни намояндагии «Россотрудничество» ва ин маъмурияти ин муассисаи таълимӣ табодули афкор сурат гирифт.
Бояд тазаккур дод, ки соли 1995 байни Тоҷикистону Россия Созишномаи байниҳукуматӣ оид ба ҳамкории илмию фарҳангӣ, техникӣ, маориф, тандурустӣ, иттилоот, туризм ва варзиш ба имзо расонида шуд ва он заминаи ҳуқуқиро барои рушди минбаъдаи ҳамкории илмию фарҳангӣ фароҳам овард. Дар ин росто, 15 декабри соли 2017 дар шаҳри Хуҷанд намояндагии Маркази илмию фарҳангии Россия -«Россотрудничество» кушода шуд, ки самти фаъолияти он ба тавсеаи ҳамкории гуманитарии Тоҷикистону Россия, муаррифии илму фарҳанги ин кишвар дар шаҳри Хуҷанд нигаронида шудааст.