Фаридун Нуруллозода, ёрдамчии калони прокурори шаҳри Хуҷанд роҷеъ ба мазмуну моҳияти қабул шудани Қонуни ҶТ “Дар бораи танзими ҷашну маросим дар Ҷумҳурии Тоҷикистон” ва таъғироти охир ба он маълумот дода, аз ҷумла афзуд, ки мардуми тоҷик аз замонҳои қадим то ба имруз соҳиби расму оин ва маросимҳои гуногун буданд, ки аксари онҳо дорои хусусияти ахлоқию маънавӣ ҳастанд. Боиси тааасуф аст, ки мардум ба қадри ин расму оинҳо нарасида, дар тӯли асрҳо ба онҳо тағийроте зиёде ворид карданд, ки дар натиҷа асолат ва моҳияти онҳо аз байн рафта, ба маросимҳои мушкил, маъракаҳои исрофкорӣ ва худнамоӣ табдил ёфт.

Бинобар ин, Ҳукумати Ҷумҳурии Тоҷикистон бо мақсади беҳтар намудани вазъи иҷтимоию иқтисодии мардум лоиҳаи Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон”-ро омода намуда, ба муҳокимаи умумиҳалқӣ пешниҳод намуд.

Аз ҷониби шаҳрвандони мамлакат беш аз 6 ҳазор таклифу пешниҳод ҷиҳати танзими анъана ва ҷашну маросим манзур гардид ва аксари мардум ин иқдомро ба пурраги дастгирӣ намуданд.

Ниҳоят санаи 8 июни соли 2007 Қонуни Ҷумҳуриии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” бо дарназардошти таклифу пешниҳодҳои мардум қабул гардида, муддати зиёда аз 17 сол аст, ки мавриди амал қарор дорад. Чанде қабл ба қонуни мазкур таъғирот ворид карда шуд.

Фаридун Нуруллозода гуфт, ки дар ин муддат қонуни мазкур воқеан ҳам исбот намуд, ки қабули он саривақтӣ ва ба нафъи мардум буда, чандин маъракаҳои серхароҷот ва нозарурӣ аз байн бурда шуда, давомнокии маросим, шумораи даъватшавандагон ва дигар масъалаҳоро марбут ба гузаронидани ҷашну маросим ба танзим дароварда шуданд.

Амали Қонуни мазкур ба мақомоти давлатӣ, ташкилоту муассисаҳо ва корхонаҳо, сарфи назар аз тобеияти идоравӣ ва шакли моликият, ҳамчунин ҳамаи шахсони воқеӣ, новобаста ба вазъи иҷтимоӣ ва мансубияти миллиашон, сурат мегирад.

Фаридун Нуруллозода зимни суханронии худ чанд мисол аз парвандаҳои тафтишотӣ овард.

Сипас ёрдамчии прокурори шаҳри Хуҷанд Сайхан Шералиев роҷеъ ба муҳтавои Қонуни ҶТ “Дар бораи масъулият барои таълиму тарбияи кӯдак” маълумоти муфассал дода, аз ҷумла афзуд, ки Қонуни мазкур муносибатҳоро оид ба масъулият дар таълиму тарбияи кӯдак бо мақсади таълиму тарбияи кӯдак дар руҳияи инсондӯстӣ, ифтихори ватандорӣ, эҳтиром ба арзишҳои миллӣ, умумибашарӣ ва фарҳангӣ танзим намуда, ба ҳифзи ҳуқуқу манфиатҳои кӯдак равона гардидааст.

Иттилоъ дода шуд, ки тибқи талаботи моддаи 15-и қонуни мазкур уҳдадориҳои падару модар дар таълими кӯдак муайяну мушаххас шудааст, яъне падару модар таълим гирифтани кӯдакро таъмин намоянд; ба гирифтани таҳсилоти миёнаи умумии кӯдак монеъ нашаванд; кӯдакро бо воситаҳои зарурии таълимӣ таъмин карда, барои таълими ӯ шароит муҳайё намоянд; риояи пӯшидани либосҳои дахлдори муассисаи таълимиро аз ҷониби кӯдак дар ҳамаи зинаҳои таҳсилот таъмин ва назорат карда, донишомӯзӣ ва иштироки кӯдакро дар раванди таълим назорат карда, бо маъмурияти муассисаи таълимӣ, омӯзгорон ва кормандони дигари соҳаи маориф оид ба таълими кӯдак мунтазам ҳамкорӣ намоянд; ба омӯзиши забони давлатӣ, инчунин забонҳои хориҷӣ мусоидат намоянд; дар ҷаласаҳои падару модар ва чорабиниҳои дигари муассисаи таълимӣ фаъолона иштирок намоянд; талаботи дахлдори қоидаву тартибот ва санадҳои дохилии муассисаи таълимиро, ки кӯдак дар он таълим мегирад, риоя намоянд; дар ҷашну маросим ва таҷлили зодрӯзи кормандони муассисаҳои таълимӣ пешниҳоди туҳфаҳои молию пулиро аз ҷониби кӯдак манъ намоянд; гирифтани таълими ғайриқонунӣ, аз ҷумла таълими ғайриқонунии диниро аз ҷониби кӯдак роҳ надиҳанд ва ғайраҳо.

Ҳамчунин дар қонуни мазкур уҳдадории волидайн дар самти тарбияи кӯдак мушаххас оварда шудааст.

Қонун волидайнро вазифадор намудааст, ки ба рафтори фарзандонашон диққати ҷиддӣ диҳанд, зеро тарбия аз оила оғоз мешавад ва рафтору гуфтори падару модар барои фарзанд бояд намунаи ибрат бошад. Барои амалишавии ин ҳадаф нақши оила бузург буда, муҳити солим ва созандаи оилавӣ метавонад дар тарбияи ворисони содиқи Ватан саҳми босазо дошта бошад.

Дар боби 5 Қонуни мазкур роҷеъ ба ҳуқуқу уҳдадориҳои муассисаи таълимӣ ва омӯзгор мушаххасот баён шудааст.

Дар маҷмуъ Қонуни ҶТ “Дар бораи масъулият барои таълиму тарбияи кӯдак” барои тарбияи насли хештаншинос, кам шудани ҷинояткорӣ дар байни ноболиғон ва ояндаи дурахшони фарзандон нақши калидӣ гузошта, ба таҳкими худшиносиву донишманд шудани наврасон заминаи мусоид фароҳам овардааст.

Дар мулоқот сарвари гимназияи №24 Замира Алиева низ иштирок ва баромад намуд.