30 Апрел 2022
Ба ифтихори Рӯзи илми тоҷик дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд бо иштироки устодон, муҳаққиқони ҷавон, докторантон ва донишҷӯёни соҳибистедод конференсияи илмӣ амалӣ доир гардид.
Чорабиниро муовини директор оид ба илм ва инноватсия, номзади илмҳои иқтисодӣ Усмонҷон Ахмедов оғоз намуда, номаи муборакбодии директори донишкада Дилафрӯз Саидиро ба аҳли нишаст расонд.
Мавсуф аз ҷумла зикр дошт, ки тарбияи маънавии ҷавонон дар руҳияи хештаншиносӣ, бедор намудани шавқ ва завқи онҳо нисбати фанҳои дақиқ, риёзӣ ва техникаву технология дар сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон ҷойгоҳи хосса дорад. Сарвари давлат дар ин ҷода таъкид медоранд, ки “Роҳбарону кормандони соҳаи маорифро зарур аст, ки назорати азхудкунии донишҳои замонавиро пурзӯр гардонида, наврасону ҷавононро ба мутолиаи китобҳои бадеиву илмӣ ташвиқ намоянд, қобилияти эҷодии онҳоро тақвият бахшанд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд”.
Иттилоъ дода шуд, ки баҳри дар амал татбиқ намудани дастуру ҳидоятҳои Сарвари давлат дар Донишкадаи политехникии Донишгоҳи техникии Тоҷикистон дар шаҳри Хуҷанд бо роҳбарии директори донишкада Дилафрӯз Саидӣ аз тамоми имконияту воситаҳо истифода бурда мешавад. Таъсиси лабораторияҳои муҷаҳҳази замонавӣ, вусъат бахшидан ба фаъолияяти парки технологӣ, дар сатҳи баланд доир шудани озмунҳои ҷумҳуриявии “Фурӯғи субҳи доноӣ китоб аст”, “Илм фурӯғи маърифат”, ширкати фаъолона дар озмунҳои Ҷоизаҳои давлатӣ дар риштаи илмҳои дақиқ, ба номи Султон Умаров, “Ихтироъкорон”, фаъолият намудани беш аз 30 маҳфилҳо дар донишкада бозгӯи гуфтаҳои болоиянд.
Дар идомаи кори конференсия ҳозирин маърузаҳои илмии сардори раёсати идораи рақамии донишкада доктор (PhD) Низомитдинов А.А. дар мавзӯи “Перспективные направления использования искусственного интеллекта в разных сферах”, докторанти курси 2-юм Осимӣ Турсунова Ш.Т. дар мавзӯи “Рушди нерӯи инсонӣ заминаи асосии саноатикунонии босуръати кишвар”, докторанти курси 3-юм Дадобоева Н.А. дар мавзӯи “Хусусиятҳои тарроҳии либоси махсуси кормандони тиб бо назардошти талаботи эргономикӣ”, омӯзгори калони кафедраи молия ва қарз Оқилҷонова Ш.Ю. дар мавзӯи “Вопросы стратегического планирования инвестиционного развития в региональной экономике”, донишҷӯи курси 4-уми ихтисоси 400101 ДПДТТХ ба номи академик М.С. Осимӣ Ниёзбадалов А. дар мавзӯи “Использование моделей Gensim для анализа таджикского текста: модель Word 2 Vec”, донишҷӯи курси 4-уми ихтисоси 400101 ДПДТТХ ба номи академик М.С. Осимӣ Ниёзбадалов А. дар мавзӯи “Использование моделей Gensim для анализа таджикского текста: модель Word 2 Vec” ва донишҷӯи курси 3 ихтисоси 570101 Маҳмудова Ф. дар мавзӯи “Оценка влияния погодных условий на урожайность сельскохозяйственных культур”- ро шуниданд.
Дар қисмати дуюми кори конференсия дар бахшҳои “Саноатикунонии босуръати мамлакат ҳамчун ҳадафи стратегии миллӣ”, “Рушди соҳаҳои саноати хӯрока, саноати сабук ва кишоварзӣ дар партави саноатикунонии кишвар (саноати сабук)”, “Рушди соҳаҳои саноати хӯрока, саноати сабук ва кишоварзӣ дар партави саноатикунонии кишвар (саноати хӯрока ва кишоварзӣ)”, “Нақши сохтмон ва нақлиёт дар саноатикунонии кишвар”, “Нақши илмҳои риёзию табиатшиносӣ дар омода намудани кадрҳои муҳандисӣ” 48 маърӯзҳои илмӣ шунида шуд.
Бояд қайд намуд, ки конфронси мазкур бахшида ба эълон гардидани солҳои 2020-2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф”, солҳои 2022 – 2026 эълон шудани “Солҳои рушди саноат” баргузор ва интизор меравад, ки маърӯзаҳои беҳтарин муайян ва қдаршиносӣ мегарданд.
Дафтари матбуоти
Раиси шаҳри Хуҷанд
