31 Август 2021
ФАТҲИ ҚУЛЛАҲОИ БАЛАНДИ ДОНИШ НАСИБАТОН БОД!
Устодону омӯзгорони мӯҳтарам!
Донишҷӯёну хонандагони азиз!
Шуморо ба муносибати фарорасии соли нави таҳсил ва Рӯзи дониш самимона табрику муборакбод менамоям.
Дар ҳама давру замон илмомӯзию маърифатпарварӣ яке аз омилҳои тақдирсози ҳар миллату кишвар дониста мешавад ва рушди он кафолати боэътимоди пешрафт ва ояндаи дурахшони ҷомеа маҳсуб меёбад.
Мусаллам аст, ки Асосгузори сулҳу ваҳдати миллӣ - Пешвои миллат, Президенти кишвар мӯҳтарам Эмомалӣ Раҳмон ба рушди илму фарҳанг ва маънавиёти ҷомеа, махсусан ба таълиму тарбияи насли наврас эътибори аввалиндараҷа дода, барои пешрафти мактабу маориф ва тайёр намудани мутахассисони соҳиби донишу малакаи баланди касбӣ ҳамаҷониба мусоидат менамоянд.
Давлату ҳукумат таълиму тарбияи насли бомаърифату соҳибилм ва мутахассисони баландихтисосро яке аз самтҳои асосии сиёсати иҷтимоии худ қарор дода, ҷиҳати инкишофи соҳаи маориф пайваста кӯшиш менамояд.
Баробари таъмини пешрафти иқтисодиву иҷтимоии кишвар барои ба сатҳи талаботи замон баровардани соҳаи маориф, ислоҳоти он, гузаштан ба усулҳои муосири таълиму тарбия, таҳкими заминаҳои моддиву техникии таълимгоҳҳо тадбирҳои мушаххас амалӣ карда мешаванд.
Яке аз масъалаҳои муҳиме, ки Ҳукумати кишвар ба он таваҷҷӯҳи хоса дорад, баланд бардоштани сифати таълиму тарбия дар кулли муассисаҳои таълимӣ мебошад. Зеро, таҷрибаи таърихӣ шаҳодат медиҳад, ки афроди босаводу донишманд барои ҳар давлату миллат сарвати бебаҳо ва нерӯи тавонои зеҳнӣ ба шумор меравад. Бинобар ин, дар асоси таҷрибаи таърихиву арзишҳои фарҳанги миллӣ тарбия намудани насли наврас ва омода кардани мутахассисони соҳибкасб, яке аз вазифаҳои муҳими соҳаи маориф ба шумор меравад. Барои расидан ба ин ҳадаф ба шумо, устодону омӯзгорон пирӯзиву комёбиҳо орзу дорем.
Тазаккур бояд дод, ки дар соҳаи маориф пешравиҳо ба вуқӯъ пайваста истодаанд. Ҳамаи ин дастовард аз файзу баракати истиқлолияти кишвари азизамон мебошад, ки мову шумо 30-юмин солгарди онро имрӯзҳо таҷлил намуда истодаем.
Толибилмони азиз!
Айни ҳол рисолати шумо – насли ҷавони кишвар, иштироки фаъолона дар машғулиятҳо, омӯзиши илму дониш ва касбу ҳунар аст. Зеро ояндаи давлати соҳибистиқлоли Тоҷикистон ва миллати тамаддунофари мо дар дасти шумост.
Итминони комил дорам, ки ҳар яки шумо, бо истифода аз шароити фароҳамовардаи давлат хуб таҳсил карда, барои соҳибмаърифату соҳибкасб шудан азму талош менамоед.
Мо аз шумо – устодони гиромӣ, умедворем, ки барои ба сатҳи сифатан нав баровардани таълиму тарбияи наврасон ва донишҷӯён маҳорату малакаи хешро дареғ нахоҳед дошт.
Бори дигар устодону омӯзгорон, донишҷӯёну хонандагони азизро аз номи Мақомоти иҷроияи ҳокимияти давлатии шаҳри Хуҷанд бо фарорасии соли нави таҳсил, Рӯзи дониш самимона табрик намуда, тансиҳатӣ, рӯҳи қавию азми матин, фатҳи қуллаҳои баланди илму дониш ва комёбиҳои беназирро таманно менамоям.
