28 Декабрь 2020
Дар толори хурди Кохи “Суғдиён”-и шаҳри Хуҷанд ҷаласаи навбатии Шўрои кор бо ҷавонони назди Раиси шаҳри Хуҷанд баргузор гардид.
Фирдавс Шарифзода нахуст ҷавнонро бо фарорасии Соли нави мелодӣ таҳният гуфта,онҳоро барои фараҳманд гардиданашон ба стиендияи Раиси шаҳр муборакбод намуд.
Фирдавс Шарифзода, иҷрокунандаи вазифаи Раиси шаҳри Хуҷанд, Раиси Шўрои кор бо ҷавонони назди Раиси шаҳри Хуҷанд ҷаласаро ифтитоҳ намуда, ҳозиринро бо рӯзномаи он ошно сохт.
Иттилоъ дода шуд, ки дар Шўро ду масъала: “Дар бораи рафти иҷрои дастуру супоришҳои Президенти Ҷумҳурии Тоҷикистон, Пешвои миллат, Раиси Шўрои миллии кор бо ҷавонон дар назди Президенти Ҷумҳурии Тоҷикистон муҳтарам Эмомалӣ Раҳмон, ки зимни баргузории ҷаласаи Шўрои миллии кор бо ҷавонон баён гардидаанд” ва “Тасдиқи Нақшаи кори Шўрои кор бо ҷавонони назди Раиси шаҳри Хуҷанд барои соли 2021” мавриди баррасӣ қарор дода мешавад.
Фирдавс Шарифзода гуфт, ки фаъолияти Шўрои кор бо ҷавонон дар назди Раиси шаҳри Хуҷанд ва ҷаласаи имрўза бори дигар шаҳодат аз он медиҳад, ки сиёсати давлатии ҷавонон дар меҳвари сиёсати Ҳукумати Ҷумҳурии Тоҷикистон қарор дорад. Аз ин лиҳоз, масъулинро зарур аст, ки бо ин қишри созандаи ҷомеа ба таври мунтазам, самарабахш ва бо истифода аз усулҳои муосиру таъсирбахш чорабиниҳои мақсаднок амалӣ намоянд. Маҷмўи тадбирҳои андешида дар доираи сиёсати давлатии ҷавонон бояд аз нигоҳи манфиатнокӣ ва касбӣ ба таври ҷиддӣ тарҳрезӣ гардида, баҳри беҳтар намудани шароити зиндагӣ, таҳсил ва фаъолияти меҳнатию ҳаёти фарҳангии ҷавонон мусоидат намояд.
Сипас, аз руйи масъалаи аввал: “Дар бораи рафти иҷрои дастуру супоришҳои Президенти Ҷумҳурии Тоҷикистон, Пешвои миллат, Раиси Шўрои миллии кор бо ҷавонон дар назди Президенти Ҷумҳурии Тоҷикистон муҳтарам Эмомалӣ Раҳмон, ки зимни баргузории ҷаласаи Шўрои миллии кор бо ҷавонон баён гардидаанд” мудири бахши кор бо ҷавонони шаҳри Хуҷанд Абдувосит Ғафуров баромад намуда, аз ҷумла афзуд, ки дар ин самт якҷоя бо сохторҳои дахлдор баҳри иҷрои нақшаи чорабиниҳои мақомоти иҷроияи ҳокимияти давлатии шаҳр оид ба иҷрои дастуру супоришҳои Президенти Ҷумҳурии Тоҷикистон, Пешвои миллат, Раиси Шӯрои миллии кор бо ҷавонон муҳтарам Эмомалӣ Раҳмон чораҳои амалӣ андешида шуданд. Воқеан ҳам ҷавонон қувваи бузург ва пешбарандаи ҷомеа ба ҳисоб рафта, шумораи умумии ҷавонони шаҳри Хуҷанд дар соли ҷорӣ ба 61 ҳазору 900 нафар расид, ки аз ин миқдор 30 ҳазору 900 нафари онҳоро духтарон ташкил медиҳанд.
Иттилоъ дода шуд, ки бо мақсади расонидани мазмуну моҳияти Паёми Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон дар муассисаҳои таҳсилоти миёна ва олии касбии ҳудуди шаҳр, мактабҳои варзишӣ, кўчаву маҳаллаҳо, маркарҳои савдо ва қисмҳои низомӣ мулоқоту вохўриҳо, корҳои таблиғотиву ташвиқотӣ ва фаҳмондадиҳи баргузор гардиданд, ки дар ҳар як чорабинӣ аз 150 то 300 нафар ҷавонон ва сокинон фаро гирифта шуданд. Ҳамзамон 40 аксияҳову ҳамоишҳои тарғиботӣ – ташвиқотӣ ва иттилоотӣ таҳти унвони “Мо ҷавонон амалҳои ифротгароиро маҳкум мекунем!”, “Тарзи ҳаёти солим – интихоби мо ҷавонон!”, “Танзим баракати зиндагӣ!”, “Барои Ватани маҳбубамон хизмат мекунем!”, “Ба Пешвои худ содиқ мемонем!” ва “Ҷавонон – пайрави Пешвои миллат!” баргузор гардида, 14650 нафар дар аксияҳои мазкур иштирок ва 9800 дона маводҳои тарғиботӣ ва варақаҳои иттилоотӣ дастраси аҳолӣ гардид. Бо мақсади таъмини иштироки фаъолонаи ҷавонон дар ҳаёти сиёсӣ аксияи тарғиботӣ - ташвиқотӣ таҳти унвони “Ширкат дар интихобот масъулияти ҳар як шаҳрванд аст!” бо доираи васеи ҷавонони касбу кори гуногун ташкил ва баргузор гардид. Волонтёрон ва ҷавонони фаъол корҳои фаҳмондадиҳиро миёни навинтихобкунандагон, сокинон ва ҷавонони касбу кори гуногун ба роҳ монда, варақаҳои иттилоотӣ, маълумотномаҳо ва дастурҳои истифодаи умумро ба тақсим ва дар ҷойҳои серодам насб намуданд.
Абдувосит Ғафуров таъкид намуд, ки бо мақсади ҷалби ҷавонон ба корҳои ободонию хуррамгардонӣ, ба ин васила тарбия намудани онҳо дар рўҳияи меҳнатдўстию созандагӣ, сазовор таҷлил намудани 30 солагии Истиқлолияти давлатии Ҷумҳурии Тоҷикистон ва дар доираи эълон гардидани 1300 рўзи ободонӣ, 100 рўзи ниҳолшинонӣ таҳти унвони “Мо ҷавонон ин Ватанро сабзу хуррам мекунем!” 26 маротиба шанбегиҳо, ҳашарҳои дастаҷамъона ва корҳои тозагиву ободкорӣ бо иштироки зиёда аз 2400 нафар ҷавонону варзишгарон баргузор гардида, оромгоҳҳо, боғҳои фарҳангӣ – фароғатӣ, кўчаву хиёбонҳо, ҳудуди муассисаҳои варзишӣ, соҳили дарё ва ҷўйбору майдонҳо тоза карда шуданд.
Сипас, оид ба масъалаи мазкур мудири шуъбаи кор бо ҷавонони Донишгоҳи давлатии ҳуқуқ, бизнес ва сиёсати Тоҷикистон Мирзоҷон Мирзобоев, табиби ҷавон аз таваллудхонаи шаҳри Хуҷанд Фарида Ҳасанзода, докторанти Донишгоҳи Давлатии Хуҷанд ба номи академик Бобоҷон Ғафуров Шодмон Нурматов ва гирандаи Стипендияи Президентӣ Фарангис Атохўҷаева ва дигарон баромад намуда, андешаҳои хешро баён доштанд.
Бо мақсади таъмини самаранокии кори Шўро аъзои он нақшаи мушаххаси кориро барои соли 2021 баъди баррасӣ тасдиқ намуданд.
Фирдавс Шарифзода, иҷрокунандаи вазифаи Раиси шаҳри Хуҷанд, Раиси Шўрои кор бо ҷавонони назди Раиси шаҳри Хуҷанд ҷаласаро ҳусни анҷом бахшида, таъкид дошт, ки ҷавононро лозим аст, ки бо истифода аз тамоми имконият ва шароите, ки давлат ва Ҳукумати мамлакат барояшон дар таҳсил, кору фаъолият, фароғату беҳдошти сатҳи зиндагӣ омода ва пешниҳод менамояд, самаранок истифода намуда, пеш аз ҳама сатҳи дониш ва маърифатнокии худро боло бардоред, ташаббускору созанда бошанд. Пайваста дар роҳи ташаккули ҳаматарафа ва солимии ҷисмониву маънавии худ кўшиш ба харҷ дода, бо ҷидду ҷаҳди комил дар роҳи дуруст тарбия ва ба камол расед. Дар ин раванд лозим аст, ки тамоми ҳастӣ ва нерўи ҷавонии худро барои саодати миллат ва ободии диёр равона намудан кӯшиш намоед. Ҷиҳати мунтазам баргузор намудани озмунҳо доир ба баланд бардоштани сатҳи тарбияи ватандўстии ҷавонон ва таъмини фаъолонаи иштирокчиёни он саҳмгузорӣ карда шавад.
Дафтари матбуоти
Раиси шаҳри Хуҷанд
