09 Октябрь 2020
Бахшида ба 700-солагии Шайх Камоли Хуҷандӣ «Девон»-и ин шоири маъруф тавассути нашриёти Хуросон аз чоп баромад. Девон ҳадяи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба аҳолии кишвар буда, бо сарсухан ва соядасти Пешвои миллат ба зевари табъ ороста шудааст.
Таҳиягарони матни "Девон", муаллифони тавзеҳот ва охирсухан Баҳром Раҳматов ва Оқилбой Оқилов буда, "Девон" зери назари Шоири халқии Тоҷикистон Аҳмадҷони Раҳматзод омода шудааст.
Матни «Девон» дар асоси нусхаи хаттии №2103-и Китобхонаи Отиф Афандии Истамбули Туркия, ки соли 872/1468 китобат шудааст, мураттаб гардида, бо қадимтарин нусхаи хаттии девони шоир, ки дар Китобхонаи Остони Қудси Разавии Машҳади Эрон таҳти №4739 нигаҳдорӣ мешавад ва нусхаи хаттии №1236, ки дар Маркази мероси хаттии Академияи миллии илмҳои Ҷумҳурии Тоҷикистон маҳфуз аст, мавриди қиёсу муқобала қарор гирифт.
Ҳамчунин, матни «Девон» бо матни 6 нашри девони илмӣ-интиқодие, ки аз ҷониби Азизи Давлатободӣ, – Табрез, 1958; Козим Шидфар, – Маскав, 1975; Шарифҷон Ҳусейнзода ва Саъдулло Асадуллоев, – Душанбе, 1986-1987; Аҳмади Карамӣ, – Теҳрон, 1993; Эраҷи Гулисурхӣ, – Теҳрон, 1995; Азизи Давлатободӣ, – Табрез, 1996 муқоиса гашта, ихтилофи нусхаву нашрҳои илмӣ-интиқодӣ дар поварақ нишон дода шудааст. Бояд қайд кард, ки «Девон» дорои тавзеҳот буда, дар ҳудуди 100 саҳифа ғазалҳои тозаёфтшуда, байтҳои душворфаҳм, байтҳои дорои баҳсҳои матншиносӣ, байтҳои дорои матни арабӣ ва ғ. шарҳу тавзеҳ дода шудааст.
Девони мазкур аз 4 қасида, 1097 ғазал, 1 маснавӣ, 3 мустазод (фақат дар бахшҳои гуногун), 66 рубоӣ, 114 қитъа, 48 муаммову фард, ҷамъан 8254 байт ва бо иловаи 100 байти поварақ 8354 байтро ташкил медиҳад.
Ҷоиз ба зикр аст, ки ин иқдом бо ташаббуси Шуъбаи суғдии Иттифоқи нависнадагони Тоҷикистон ва кормандони Муассисаи давлатии «Маркази илмии Камоли Хуҷандӣ» ва дастгирии бевоситаи Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода рӯйи кор омадааст.
Дафтари матбуоти
Раиси шаҳри Хуҷанд
