12 Март 2020
Бо садо додани Суруди миллии Ҷумҳурии Тоҷикистон дар толори Мақомоти иҷроияи ҳокимияти давлатии шаҳри Хуҷанд иҷлосияи якуми Маҷлиси вакилони халқи шаҳри Хуҷанд, даъвати шашум оғоз гардид.
Раиси иҷлосия, Раиси шаҳри Хуҷанд Маъруф Муҳаммадзода баъди гузаронидани муқаррароти пешбинишуда, иттилоъ дод, ки дар кори иҷлосияи якуми Маҷлиси вакилони халқи шаҳри Хуҷанд, даъвати шашум аз 40 нафар вакилони интихобшуда ҳамагон ҳузур доранд ва ҳамчунин дар кори он роҳбарони воҳидҳои сохтории мақомоти иҷроияи ҳокимияти давлатии шаҳр, мақомотҳои ҳифзи ҳуқуқ, ташкилоту муассисаҳои шаҳрӣ, муассисаҳои таълимӣ, раисони маҳаллаҳо, сохторҳои корхонаи воҳиди давлатии коммуналии «Сарраёсати ободонӣ ва хоҷагии манзилию коммуналӣ»-и шаҳр, намояндагони воситаҳои ахбори умум даъват шудаанд ва дар толор ҳозиранд. Дар иҷлосияи мазкур муовини Раиси вилояти Суғд Анвар Яъқубӣ низ ширкат дорад.
Сипас, Хайрулло Нурматов раиси комиссияи шаҳрии интихобот аз рўи масъалаи якуми рўзнома «Оиди тасдиқи ваколати вакилони Маҷлиси вакилони халқи шаҳри Хуҷанд, даъвати шашум баромад намуда, доир ба вакилони интихобшуда маълумоти муфассал дод.
Вакилони тозатаинтихоб дар иҷлосия савганд ёд намуданд.
Раиси шаҳри Хуҷанд Маъруф Муҳаммадзода 40 нафар вакилони интихобшударо ба муносибати эътирофи ваколатҳояшон ва ба ҳайси вакили Маҷлиси вакилони халқи шаҳри Хуҷанд интихоб шуданашон муборакбод намуда, барояшон тансиҳатӣ ва дар хизмати софдилонаатон ба халқу Ватан бурдбодиҳо орзу намуд.
Вакилони иҷлосия баъди интихоб ва тасдиқи котибот ба баррасии рӯзномаи он шуруъ карданд. Ҳамин тавр вакилон масъалаҳои гуногун, аз ҷумла: «Оид ба тасдиқи Дастури Маҷлиси вакилони халқи шаҳри Хуҷанд, даъвати шашум» , «Оид ба тасдиқи Низомномаи комиссияҳои доимии Маҷлиси вакилони халқи шаҳри Хуҷанд, даъвати шашум», «Ташкил намудани комиссияҳои доимии Маҷлиси вакилони халқи шаҳри Хуҷанд, даъвати шашум ва интихоби ҳайати онҳо», «Оид ба тасдиқи қарорҳои Раиси шаҳр», «Оид ба пешбарии номзад ба аъзогии Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботии Суғд №2» ва ғайраҳоро мавриди баррасӣ қарор доданд.
Иттилоъ дода шуд, ки тибқи Фармони Президенти Ҷумҳурии Тоҷикистон аз 4 декабри соли 2019, № 1380 ва қарори Комиссияи марказии интихобот ва раъйпурсии Ҷумҳурии Тоҷикистон аз 7 декабри соли 2019, № 14 интихоботи даъвати нави аъзои Маҷлиси миллии Маҷлиси Олии Ҷумҳурии Тоҷикистон 27 марти соли 2020 баргузор мегарадад. Пешбарии номзадҳо ба аъзогии Маҷлиси миллӣ аз 11 марти соли равон оғоз ёфтааст. Дар асоси моддаи 32 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» пешбарии номзадҳо ба аъзогии Маҷлиси миллӣ дар иҷлосияҳои Маҷлисҳои вакилони халқи шаҳрҳо ва ноҳияҳо, шаҳри Душанбе, Вилояти Мухтори кўҳистони Бадахшон ва вилоятҳо дар суръати мавҷуд будани кворум пешбарӣ карда мешаванд. Қарори иҷлосия дар бораи пешбарии номзад бо аксарияти овози вакилони Маҷлиси дахлдори вакилони халқ ба таври пинҳонӣ қабул карда мешавад.
Вакили Маҷлиси вакилони халқи шаҳри Хуҷанд аз ҳавзаи интихоботии Нури Аҷам, № 26 Муъмин Шарифзода номзадии МАдина Набизода, директори Муассисаи давлатии таълимии “Мактаби Пре-зидентӣ барои хонандагони болаёқат дар шаҳри Бўстони вилояти Суғдро ба аъзогии Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботии Суғд, №2 пешбарӣ намуд. Вакилон пешниҳоди мазкурро якдилона дастгирӣ намуданд. Сипас вакилони шаҳрӣ номзадро ба аъзогии Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботии Суғд, №2 ба тариқи овоздиҳии пинҳонӣ райъ доданд.
Баъди раъй додани вакилон раиси комиссияи ҳисобӣ вакили Маҷлиси вакилони халқи шаҳри Хуҷанд аз ҳавзаи интихоботии Себзор, №7 Наим Маликисломӣ иттилоъ дод, дар бораи натиҷаҳои овоздиҳии пинҳонӣ оиди пешниҳоди номзад ба аъзогии Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботии Суғд, №2, иттилоъ дода аз ҷумлаа афзуд, ки ба тарафдории Мадина Набизода ба аъзогии Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботии Суғд, №2 40 нафар вакилон райъ доданд. Ва дар ин бора қарори дахлдор қабул карда шуд.
Сипас, муовини Раиси вилояти Суғд мўҳтарам Анвар Яъқубӣ баромад намуда, изҳори умедворӣ намуд, ки вакилони тозаинтихоб дар пешрафту ободкориҳои шаҳри бостонии Хуҷанд тибқи барномаҳои пешазинтихоботии хеш сайъю кӯшиш меваранд. Ҳамагон Наврӯзи байналмилалро бошукуҳ таҷлил хоҳем кард.
Раиси шаҳри Хуҷанд Маъруф Муҳаммадзода иҷлосияро натиҷагирӣ намуда, аз ҷумла таъкид дошт, ки ҳар кадоми моро зарур аст, ки барои боз ҳам ободу зебо гардонидани шаҳри азизамон содиқона заҳмат кашем, корҳои бунёдкориву созандагӣ, дигаргуниҳои иқтисодиву иҷтимоиро ба роҳ монда, соҳибкориву сармоягузориро такон бахшем ва ҳарчӣ бештар ҷойҳои нави корӣ фароҳам оварда, самаранокии идоракунии давлатиро таъмин гардонем. Дастуру супоришҳои Асосгузори сулҳу ваҳдати миллӣ-Пешвои миллат, муҳтарам Эмомалӣ Раҳмон ва дастуру вазифагузориҳои Раиси вилоят Раҷаббой Аҳмадзодаро барои пешрафти давлати соҳибихтиёри худ ва ба қатори кишварҳои пешрафта ва мутамаддини дунё расонидани Тоҷикистони азизамон таъмин намуда, барои ободии кишварамон, пойдории сулҳу субот дар ҷомеа, пешрафти иқтисоди миллиамон ва амалӣ гардидани ҳамаи ҳадафҳои неки давлату Ҳукумат ва истиқболи меҳмонони олиқадр бо азму талоши дучанд заҳмат мекашанд. Тамоми донишу таҷриба ва кӯшишу ғайратамонро барои зиндагии орому осуда ва босаодати халқамон сафарбар намуда, ҷашни 30 солагии Истиқлолияти давлатии Ҷумҳурии Тоҷикистонро бо дастовардҳои бузург сазовор пешвоз хоҳем гирифт.
Бо садо додани Суруди миллии Ҷумҳурии Тоҷикистон ба кори иҷлосияи якуми Маҷлиси вакилони халқи шаҳри Хуҷанд, даъвати шашумро хотима бахшида шуд.
Дафтари матбуоти
Раиси шаҳри Хуҷанд
