03 Июл 2019
Тавре, ки иттилоъ дода будем, дар толори Муассисаи давлатии “Кохи фарҳанги Суғдиён” даври шаҳрии озмуни ҷумҳуриявии “Тоҷикистон – Ватани азизи ман” бо мақсади иҷрои Амри Президенти Ҷумҳурии Тоҷикистон аз 10 ноябри соли 2018 таҳти №АП-1127, оид ба баргузории озмуни ҷумҳуриявии “Тоҷикистон – Ватани азизи ман” аз ҷониби мутахассисони варзидаи соҳаи саъат ва ҳунар гузаронида шуд.
Дар даври интихобии довталабон аз рӯи 4 номинатсияҳои дар Низомномаи озмун зикргардида, 157-нафар шахсони синну сол ва касбу кори гуногун иштирок намуда, истеъдоду маҳорати ҳунариву эҷодии худро манзури мутахассисон гардониданд.
Бо назардошти талаботҳои низомномаи озмун, 95 – нафар довталабон ва аъзоёни дастаҳои ҳунарӣ ҷиҳати иштирок ба даври шаҳрии озмун пешниҳод ва пазируфта шуданд.
Дар рафти чорабинӣ номинатсияҳои ба озмун пешниҳодшударо 9 – нафар аъзоёни ҳакамони озмун баҳогузорӣ ва ғолибонро муайян намуданд.
Бояд қайд намуд, ки дар чорабинӣ намояндаи Вазорати фарҳанги Ҷумҳурии Тоҷикистон, роҳбари оркестри симфонии назди Дастгоҳи иҷроияи Президенти Ҷумҳурии Тоҷикистон Олимҷон Солиев, муовини раиси Иттифоқи композиторони Тоҷикистон Сангалӣ Ҳомидов, директори Маркази илмӣ-методии Раёсати фарҳанги вилояти Суғд Олимҷон Юсупов ва намояндагони воситаҳои ахбори омма иштирок ва рафти озмун пурра сабт карда шуд.
Боиси зикр аст, ки дар озмун ба ғайр аз сарояндагону навозандагон, шоирону ровиён гурӯҳи ҳамсароён, ансамбли созҳои миллӣ, оркестри асбобҳои халқӣ низ фаъолона иштирок намуда, бо иҷрои асарҳои баландмазмун ва суруду оҳангҳо ба озмун ҳусни тоза зам намуданд.
Баъд аз пурра ба иҷро расидани баромад ва асарҳои ба озмун пешниҳодшудаи довталабон, ғолибон аз рӯи номинатсияҳои зерин муайян карда шуданд. Дар номинатсияи “Сарояндаи академикӣ”: ҷои аввал суруди умумии ҳамсароён “Як дона гул”, мақоми дуюм гурӯҳи “Трио” ва ҷойи сеюмро Шерзод Абдуллозода ба даст оварданд. Дар номинатсияи “Навозандаи академикӣ”Ширин Ҳамдамова, Дилрабо Убайдулоева ва Бобоев Нурмуҳаммад мутаносибан ҷойи ифтихориро ишғол намуданд. Аз рӯйи номинатсияи “Навозандаи анъанавӣ” ҷои аввал насиби Фарҳод Ёрматов, ҷои дуюм луҳаммадюнус Эргашев ва насиби ҷои сеюм Содирхон Убайдуллоев гардид.Сардор Солиев, ансамбли наврасон ва ҷавонони санъати мусиқии “Шашмақом” ва Гулноза Ғаффорӣ дар номинатсияи “Сарояндаи анъанавӣ” мақомҳои ифтихориро соҳиб шуданд. Дар номинатсияи “Сарояндаи эстрадӣ” Дилноза Каримова ҷойи аввал, ансамбли “Навои ҷавонӣ” мақоми дуюм ва Шерози Камол зинаи сеюмро ишғол карданд. Нозила Каримова, Наврӯз Масаидов ва Муродҷон Неъматҷонов аз рӯи номиннатсияи “Ровӣ” ғолибият ба даст оварданд. Дар номинатсияи “Оҳангсоз”Назира Ҳамдамова ва Зайниддин Каримов дастболо гардиданд. Аз рӯйи номинатсияи “Шоир” Толиби Луқмон, Азимҷони Алӣ ва Бузургмеҳри Мутрибӣ беҳтаринҳо дониста шуданд.
Дар рафти ҷамъбасти озмун аз ҷониби ҳакамон ғайр аз ғолибон ҷиҳати иштирок ба даври вилоятии озмун 7-нафари дигар аз ҷумла: дар қатори мутрибон: Анвар Норматов, Нозим Болтиев ва ансамбли чангнавозон, аз ҳисоби навозандагони академикӣ: Фирдавс Маҳмудов, Абдукарим Абдураҳимов, Ансамбли рубобнавозон ва Дилмурод Каримов пешниҳод гардиданд.
Ансамбли созҳои миллии “Дилнавоз” Шоҳҷоизаи озмунро ба даст овард ва соҳиби 5000 сомонӣ гардид.
Дар қисмати ҷамъбастии озмун Раиси шаҳри Хуҷанд Маъруф Муҳаммадзода ҳамаи ғолибонро аз номи Мақомоти иҷроияи ҳокимияти давлатии шаҳри Хуҷанд табрику таҳният намуда, аз ҷумла афзуд, ки мақсади асосии озмун дарёфти истеъдодҳои нави соҳаи санъат, баланд бардоштани мақому маҳорати касбӣ, тақвият бахшидан ба касбияти баланди ҳунари иҷрокунандагӣ ва эҷоди мусиқии нав, инчунин таълифи ашъори баландғояи ватандӯстона, дарёфти беҳтарин намунаҳои оҳанг ва сурудҳои тараннумгари дастовардҳои замони Истиқлолияти давлатӣ саҳми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар эъмори давлатдории навини тоҷикон ва тарғибу ташвиқи анъанаҳои арзишманди миллию меросӣ иборат мебошад. Озмуни имрӯза собит намуд, ки дар шаҳр чеҳраҳои нави санъат вуҷуд доранд, ки то ҳол муаррифӣ нагардидаанд. Ин гуна озмунҳо имконият медиҳад, ки истеъдодҳои ҷавон дар ин заминаи хешро муаррифии шоиста намоянд.
Сипас ба ғолибон диплом ва мукофотҳои пулӣ тақдим карда шуд.
Дафтари матбуоти
Раиси шаҳри Хуҷанд
