20 Апрел 2019
Дар Кохи фарҳанги “Суғдиён» маҳфили ёдбуди шоира Норинисои Алимуҳаммад таҳти унвони «Чароғи меҳр» бо иштироки аҳли адаб ва мухлисони шоира баргузор гардид.
Усмонҷон Юсуфӣ, мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Хуҷанд меҳрномаи Раиси шаҳри Хуҷанд Маъруф Муҳаммадзода ба самъи ҳозирин расонида, аз ҷумла афзуд, ки гиромӣ доштани шахсиятҳои арзанда, хидматҳои онон дар инкишофу пешрафти ҷомеа аз муҳимтарин рукнҳои сиёсати пешгирифтаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба шумор меравад.
Маҳз маҳсули ҳамин сиёсат аст, ки ҳамасола дар кишвари мо ҷашну бузургдошти чеҳраҳои мунаввари адабиёту фарҳанг, саноату санъат сурат гирифта, дар канори ин ҳамеша хидматҳои чунин замир шахсиятҳо арҷ гузошта мешавад. Фаъолияти собиқадорони ҷангу меҳнат, корномаҳои илмиву манфиатии аҳли башар мавриди тарғибу ташвиқ дар миёни ҷавонон қарор гирифта, аз ин роҳ сабақҳои омўзандаи пайкорҳои ин гурўҳи маърифатпарвар ва манфиатбахши ҷомеа ба унвони дарси ибрат ва намунаи олии зиндагонии шоиста муаррифӣ мегардад. Тавре Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон зикр намудаанд: «Зиндагиномаи ҳар як шахсиятҳои маъруфи Тоҷикистон як мактаби таҷрибаи ҳаёт мебошад. Аз ин лиҳоз омузиши ҳаёту фаъолияти онҳо дар тарбияи эҳсоси наҷиби ватандўстӣ, садоқату хизмат ба Ватан ва худшиносии миллӣ зарур аст».
Таъкид шуд, ки барои меҳнати софдилона ва сарсупурдаи халқу миллати арзандаи хеш буданашон аз ҷониби Президенти кишвар, сарвари давлатамон Эмомалӣ Раҳмон Норинисо соли 1998 бо Ордени “Шараф” мукофотонида шуданд.
Сипас, ровии маҳфил Саидимрон Саидов доир ба ҳаёт ва фаъолияти шоира Норинисо, эҷодиёти мавсуф ба ҳамагон маълумот дод. Дар ҷараёни маҳфил раиси бахши суғдии Иттифоқи нависандагони Тоҷикистон Шоири халқиии Тоҷикистон Аҳмадҷони Раҳматзод, Шоири халқии Тоҷикистон Фарзона, адабиётшинос Субҳони Аъзамзод, муаррих Ваҳҳоб Набиев ва дигарон баромад намуда, аз рӯзгори ибратбахши шоира Норинисо ёдоварӣ намуданд.
Таъкид гардид, ки Норинисои Алимуҳаммад муаллифи китобҳои “Дунёи умед”, “Оҳангҳои соҳил”, “Гаҳвораи меҳр”, “Садоқат”, “Сию се ғазал”, “Ҳазору сад сатр” бахшида ба ҳазору сад солагии давлати Сомониён, “Ошёни меҳр”, “Лаҳзаи дидор”, “Дарёи муҳаббат” ва “Меҳвари андеша” мебошанд. Соли 2013 бахшида ба синни мубораки шоира ашъори мунтахаб зери унвони “Дар зери чархи гардун...” бо сифати аъло ва ба таври мукаммал нашр гардид. Аъзои Иттифоқи нависандагон ва рӯзноманигорони Ҷумҳурии Тоҷикистон, Аълочии милитсияи тоҷик ва матбуоти Ҷумҳурии Тоҷикистон, Аъзои фахрии Кумитаи кор бо занон ва оилаи назди Ҳукумати Ҷумҳурии Тоҷикистон шоира Норинисо ба мисоли Гурдофариди асри 20 дар давраи нобасомониҳо ва ҷанги бародаркуши солҳои 1990-1992 дар майдони набард ҳамчун зани озодихоҳ ва ватандӯст ҳамаро ба сулҳу осоиштагӣ ҳидоят менамуданд. То соли 2015 ҳамчун намояндаи халқӣ дар Маҷлиси вакилони халқи шаҳри Душанбе дар пайи ободиву озодии мамлакат ва баҳри пешбурди иқтисодиву сарсабзии он талош меварзиданд.
Аҳли санъати вилояти Суғд аз ашъори Норинисо сурудҳо зам зама намуданд.
Фарзанди шоира Норинисо-Илҳом Сангин барои иштирок ва саҳм гузоштан дар маҳфил ба ҳамагон миннатдории аҳли хонаводаро расонд.
Дафтари матбуоти
Раиси шаҳри Хуҷанд
