07 Март 2019
Дар тарабхонаи “Ҷавонӣ”-и шаҳри Хуҷанд бо иштироки Раиси шаҳри Хуҷанд Маъруф Муҳаммадзода ва муовини Раиси вилояти Суғд Назира Ғаффорӣ чорабинии идона бахшида ба Рӯзи Модар баргузор гардид.
Муовини Раиси вилояти Суғд Назира Ғаффорӣ номаи табрикотии Раиси вилояти Суғд Раҷаббой Аҳмадзодаро ба муносибати Рӯзи модар ироа намуд, ки дар он аз ҷумла гуфта мешавад: “Дар фарҳангу тамаддун ва анъанаву суннатҳои халқу миллатҳои гуногуни ҷаҳон хираду заковат ва бузургии модар ҳамчун олиҳаи покиву садоқат, нигаҳдорандаи чароғи хонадон, мураббии ғамхору меҳрубон ва ҳидоятгари некиву накӯкорӣ бо меҳру муҳаббат арҷгузорӣ ва ситоиш ёфтааст. Зани тоҷик ҳамеша толиби сулҳу ваҳдат, ободӣ ва оромии диёр буду ҳаст. Ин рисолат раҳнамои рўзгори бонувони мост. Мо бояд ба он муваффақ шавем, ки кулли занон худогоҳу бомаърифат бошанд. Бо дарназардошти хусусиятҳои хоси фарҳанги оиладории шарқӣ, аз ҷумла суннату ойинҳои неки тоҷикон ҳар як модари тоҷик вазифадор аст, ки дар хусуси ба ҳаёти мустақилона омода намудани фарзандон, хусусан духтарон, дар шуури онҳо тарбия кардани фарҳанги оиладорӣ, одобу ахлоқи ҳамида ва сабру таҳаммул кӯшиши доимӣ дошта бошад”.
Сипас, Раиси шаҳри Хуҷанд Маъруф Муҳаммадзода модарони меҳрубон, бонувон ва хоҳарони Хуршедшаҳрро ба муносибати Рӯзи Модар таҳният гуфта, аз ҷумла афзуд, ки Зан - модар ба мисли баҳор пурнакҳату муаттар таҷассумгари фардои обод буда, бо нияту орзуҳои нек фарзанди худро ба камол мерасонад ва ўро дар роҳи хизмат ба халқу Ватан ҳидоятгару насиҳатгар мебошад. Шахс нахустин дарси одамияту худшиносиро аз модар меомўзад ва тавассути суханони пурҳикмати ў соҳиби маърифат мегардад. Бинобар ин, аввалин омўзгори беминнати инсон модар буда, ба фарзанд на танҳо сухан гуфтанро меомўзонад, балки беҳтарин амалу рафтор ва адабу хислатҳои ҳамидаро дар зеҳну шуури ў тарбия мекунад. Бузургии зан - модар, пеш аз ҳама, дар он таҷассум меёбад, ки ў посдори забон ва таъриху фарҳанги миллӣ мебошад. Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон дар яке аз суханрониҳои худ таъкид доштаанд: “Нақши модарону занон дар таҳким ва рушди ҷомеа, бунёди оилаи хушбахт, таълиму тарбияи фарзандон ва афзоиши эътибори хонадон ниҳоят муҳиму арзишманд аст”. Ин масъулияти бузург модарону бонувонро водор месозад, ки дар баробари нигоҳубину парасторӣ ва камолоти ҷисмонии фарзандон, онҳоро дар рўҳияи ватандўстиву ватанпарастӣ ва ҳисси баланди миллӣ тарбия намоянд. Зеро нақши модар, махсусан, дар раванди таълиму тарбия, омўхтани забон, таъриху фарҳанг ва умуман, камолоти маънавии фарзанд барҷаста мебошад.
Ба таъкиди Маъруф Муҳаммадзода агар ободиву суботи ҷомеа аз осоишу оромии ҳар як оила вобаста бошад, пас ободии ҳар як хонадон аз рўҳияи солиму созанда, сатҳи маънавиёту маърифат ва тандурустии зан - модар вобаста аст. Модарони арҷманди мо дар ҳифзу нигоҳдошти расму ойинҳои миллӣ ва суннату анъанаҳои ниёгон нақши муҳим доранд. Ин аст, ки Пешвои муаззами миллат пайваста дар суханрониҳои худ ба нерўи занону модарон ва ҷавондухтарон такя карда, онҳоро борҳо «Нигини пурҷилои тоҷи миллат» гуфтаанд. Дар сатҳи давлатӣ ҷашн гирифтани Рўзи модар нишонаи эътибору эҳтироми зиёди давлат ва Ҳукумати кишвар нисбат ба модарону занон ва гувоҳи равшани дар даврони соҳибистиқлолии кишвар ба мақому манзалати хосса соҳиб гаштани онҳо мебошад.
Шаҳрдор гуфт, ки мақому манзалати занон дар ҷомеаи мутамаддини мо ҳамеша болост ва дар ин маврид ғамхориҳои рўзафзуни давлату Ҳукумат, таваҷҷўҳи Пешвои муаззами миллат, Президенти кишварамон муҳтарам Эмомалӣ Раҳмон, Раиси вилоятамон, муовини аввали Раиси Маҷлиси миллии Маҷлиси Олии Ҷумҳурии Тоҷикистон муҳтарам Раҷаббой Аҳмадзода, диққату эътибори доимии мақомоти иҷроияи ҳокимияти давлатии вилояту шаҳр нисбати занону духтарон, баланд бардоштани мавқеъ ва мартабаи зан дар ҷомеа дарку эҳсос мешавад. Қабули Барномаҳои дарозмуддати давлатӣ дар мавриди баланд бардоштани мақоми зан дар ҷомеа, таъмини баробарии ҳуқуқии марду зан гувоҳи дар сатҳи давлатӣ ҳаллу фасл шудани чунин як масъалаи ҳаётан зарурӣ ва дорои стратегияи сиёсӣ мебошад.
Маъруф Муҳаммадзода қайд кард, ки модарону бонувони хирадманди шаҳри бостонии Хуҷанд бо қалби ҳассоси худ набзи ҷомеаи имрўзаро хуб дарк менамоянд ва бо истифода аз рисолати пурмасъули хеш барои таҳкими сулҳу субот, тарбияи фарзандони худогоҳу хештаншинос ва ватандўсту ватанпараст, инчунин, риояи муқаррароти қонунҳои миллиамон – “Дар бораи танзими анъана ва ҷашну маросим дар Ҷумҳурии Тоҷикистон” ва “Дар бораи масъулияти падару модар дар таълиму тарбияи фарзанд” саҳми арзандаи худро мегузоранд. Густариш додани соҳибкории хурду миёна барои бонувон яке аз самтҳои асосии сиёсати давлат оид ба дастгирии занону духтарон мебошад. Барои амалӣ сохтани ин ҳадаф ва дастгирии занону модарони соҳибкор грантҳои Раиси шаҳри Хуҷанд ва дигар имтиёзҳои зарурӣ ба роҳ монда шудаанд, ки бонувон бо истифода аз чунин ғамхориҳои давлату Ҳукумат ба соҳибкорӣ машғул гардида, дар ин самт ба пешрафту дастовардҳои назаррас ноил шуда истодаанд.
Таъкид гардид, ки бо пешниҳоди Асосгузори сулҳу ваҳдати миллӣ – Пешвои миллат, Президенти кишвар, муҳтарам Эмомалӣ Раҳмон солҳои 2019-2021 “Солҳои рушди деҳот, сайёҳӣ ва ҳунарҳои мардумӣ” эълон гардид. Ҳадафи асосии ин иқдом эҳё намудан ва густариш додани ҳунарҳои аҷдодӣ, ташаккули фарҳанги хонавода, боло бурдани сатҳи зиндагии мардум ва таъмини ҷойҳои кории нав, алалхусус, барои бонувону ҷавондухтарон мебошад. Нигоҳдоранда ва тараққидиҳандаи ҳунарҳои милливу мардумӣ маҳз модарону занону бонувони соҳибмаърифатамон мебошанд.
Раиси шаҳри Хуҷанд Маъруф Муҳаммадзода дар анҷоми табрикоти худ изҳори боварӣ намуд, ки модарону хоҳарони азизи мо минбаъд низ дар амалӣ гардидани нияту ҳадафҳои пешбиникардаи давлату Ҳукумати мамлакат ва тарбияи фарзандони солеҳу соҳибмаърифат, ободии Ватан ва пешрафти давлат саҳми худро мегузоранд.
Барномаи фарҳангии устодони санъати шаҳри Хуҷанд табъи ҳозиринро болида намуд.
Дафтари матбуоти
Раиси шаҳри Хуҷанд
