28 Январ 2019
Дар майдони назди театри Камоли Хуҷандӣ Иди Сада бо шукуҳи шаҳомати хоса ҷашн гирифта шуд.
Раиси вилояти Суғд Раҷаббой Аҳмадзода ва Раиси шаҳри Хуҷанд Маъруф Муҳаммадзода ба идгоҳ омада, нахуст аз намоиш-фурӯши ниҳолу кӯчат, гул, тухмиии зироатҳо боздид намуданд.
Иттилоъ дода шуд, ки дар намоишгоҳ беш аз 200 ҳазор ниҳолу кӯчатҳои гуногуни ватанӣ пешниҳод шудааст, ки ба иқлими кишвар мутобиқ гардонида шудаанд.
Раиси вилояти Суғд Раҷаббой Аҳмадзода ҳангоми шиносоӣ бо дастранҷи боғдорони вилоят ба раисони шаҳру навоҳии вилоят дастур дод, ки баҳри афзун намудани кӯчати ниҳолҳои серҳосил ва содиротшаванда тадбирҳо андешанд. Роҳбари вилоят гуфт, ки дар баробари таъмини бозори дохилӣ мо бояд баҳри васеъ намудани бозори содиротӣ азм намоем. Коркарди мева дар дохили кишвар муҳим арзёбӣ карда шуд.
Ба парвариши гулу гиёҳҳои нодир ва истифодаи он дар ҳаёти хоҷагии халқ аҳамияти хоса дода шуд. Таъкид гардид, ки иқлими Тоҷикистон барои парвариши ҳамагуна гулу гиёҳҳои нодир мувофиқ буда, баҳри расидан ба он завқу кӯшиш лозим аст.
Раиси вилояти Суғд Раҷаббой Аҳмадзода ҳамзамон аз намоиш-фурӯши маҳсулоти ҳунарҳои мардумӣ, ярмака фуруши маҳсулоти кишоварзӣ ва намоиши хӯрокаю шириниҳо ошноӣ пайдо намуда, ҷиҳати рушд ва афзун намудани он дастуру супоришҳои мушаххас дод.
Сипас, Раиси вилояти Суғд Раҷаббой Аҳмадзода бо номаи табрикотии худ ҳозиринро бо Иди Сада таҳният гуфт. Таъкид гардид, ки ҷашни Сада аз ҷашнҳоест, ки аҷдодони мо бо шукӯҳу шаҳомат таҷлил мекарданд ва онро рӯзи расидан ба гармиву рӯзи нек меҳисобиданд. Туфайли Истиқлолияти давлатии Ҷумҳурии Тоҷикистон як қатор ҷашну маъракаҳо ва оину русуме, ки солиён аз байн рафта буд, дубора эҳё гардид. Маҳз бо пешниҳоди Пешвои муаззами миллати тоҷик мӯҳтарам Эмомалӣ Раҳмон ҷашни Сада амсоли ҷашни Наврӯзи дилафрӯз таҷлил карда мешавад. Ба ин маъно дар яке аз суханрониҳояшон Президенти кишвар таъкид сохтанд, ки «Миллати тоҷик, ки соҳиби ойину суннатҳои бостонӣ ва фарҳанги қадима аст, дар тамаддуни ҷаҳонӣ саҳми сазовор гузоштааст. Суннату ойинҳои нек ва ҷашнҳои миллии мо, мисли Наврӯз, Меҳргон ва Сада дар тӯли таърих барои тарғиби ахлоқу маънавиёти созанда хизмат кардаанд. Аз ин рӯ, зарур аст, ки дастовардҳои маънавию моддии мардуми шарифи мо ба феҳристи умумиҷаҳонии ЮНЕСКО ворид гарданд ва нақши тамаддунсози миллати тоҷикро минбаъд низ боло баранд».
Барномаи рангини консерти табъи ҳозиринро болида намуд.
Дафтари матбуоти Раиси шаҳри Хуҷанд