24 Январ 2019
Дар маҷлисгоҳи Мақомоти иҷроияи ҳокимияти давлатии шаҳри Хуҷанд бо иштироки муовини аввали Раиси вилояти Суғд Хол Ҳайдар ва Раиси шаҳри Хуҷанд Маъруф Муҳаммадзода бо роҳбарони корхонаҳои саноатии шаҳр мулоқот баргузор гардид.
Раиси шаҳри Хуҷанд Маъруф Муҳаммадзода вохӯриро ифтитоҳ намуда, аз ҷумла зикр дошт, ки ин тадбир бо мақсади иҷрои дастуру супоришҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон вобаста ба эълон намудани саноатикунонии босуръати иқтисоди миллӣ, ки ҳамчун ҳадафи чоруми стратегии Ҷумҳурии Тоҷикистон муайян гардидааст, баргузор мешавад. Дар Паёми навбатии худ Президенти мамлакат муҳтарам Эмомалӣ Раҳмон аз ҷумла зикр доштанд, ки «Мо бояд фаъолияти худро доир ба ҷалби сармояи мустақим, бунёди корхонаҳои нави истеҳсолӣ, ба кор андохтани корхонаҳои аз фаъолият бозмонда ва ташкили ҷойҳои корӣ вусъат бахшем».
Маъруф Муҳаммадзода гуфт, ки воқеан ҳам тадбирҳои ҳавасмандгардонӣ доир ба ташкили истеҳсолоти ивазкунандаи воридот имкон доданд, ки аҳолӣ аз ҳисоби истеҳсолоти ватанӣ бо молҳои асосии хӯрокворӣ, асбобҳои рӯзгор ва масолеҳи сохтмон таъмин гардида, ҳаҷми воридоти маводи ғизоӣ аз хориҷи кишвар дар давоми се соли охир қариб се миллиард сомонӣ ё 31 фоиз коҳиш дода шавад. Дар маҷлиси васеъи Ҳукумати Ҷумҳурии Тоҷикистон, ки доир ба ҷамъбастии соли 2018 санаи 21-уми январи соли ҷорӣ баргузор гардид, аз ҷониби Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон вобаста ба воридоти зиёд маҳсулоти истеъмолшаванда изҳори нгаронӣ карда шуд. Ҳамзамон таъкид шуд, ки бинобар сабаби пурра коркард нагардидани нахи пахта дар дохили кишвар содироти он ба хориҷи кишвар мунтазам афзоиш ёфта, ҳаҷми он дар соли 2018 - 93 ҳазор тоннаро бо арзиши 165 млн. доллар ташкил дод. Аз ҷумла, соли 2018 дар корхонаҳои нассоҷӣ 21 фоизи нахи пахтаи дар дохил истеҳсолгардида коркард карда шудааст. Дар ин замина ба идораҳои марбута дастур дода шуд, ки содироти нахи пахта манъ карда шуд.
Сипас, муовини аввали Раиси вилояти Суғд Хол Ҳайдар таъкид намуд, ки ҳадафи мо суръатбахши ба соҳаи саноат, афзун намудани молҳои воридотивазкунанда, таъсиси ҷойҳои нави корӣ мебошад.
Хол Ҳайдар дар ҷараёни мулоқот аз ҳар як роҳбарони корхонаҳои саноатии шаҳри Хуҷанд оид ба уҳдадориҳои истеҳсолӣ дар соли 2019 пурсиш ба амал оварда, эшонро ҷиҳати афзун намудани номгӯйи маҳсулот, бакорандозии иқтидорҳои бозмонда, самаранок истифода бурдани майдони ба истеҳсолотвобастагардида, баланд бурдани музди маош, таъсиси ҷойҳои нави корӣ вазифагузорӣ намуд.
Таъкид гардид, ки мо бояд дар самти расидан ҳадафи чоруми миллӣ- саноатикунонии босуръати кишвар, яъне ба мамлакати индустриалӣ мубаддал кардани Тоҷикистон ва бо дарназардошти афзоиши ҳиссаи саноат дар маҷмӯи маҳсулоти дохилӣ ва аҳаммияти соҳаи саноат дар ҳалли масъалаҳои иқтисодиву иҷтимоӣ ва таъсиси ҷойҳои корӣ аз тамоми имконоту захираҳо истифода карда, дар ободӣ ва шукуфоии ватани азизамон саҳмгузорӣ намоем.
Мулоқот дар фазои озод ва ҳамдигарфаҳмӣ ҳусни анҷом ёфт
Дафтари матбуоти Раиси шаҳри Хуҷанд