15 Ноябр 2018
Дар маҳаллаи Суғдиёни шаҳри Хуҷанд бо иштироки Раиси шаҳр Маъруф Муҳаммадзода ва кордори Сафарати ИМА дар Тоҷикистон Кевин Коверт Маркази Амрико ифтитоҳ гардид.
Иттилоъ дода шуд, ки дар ин ҷо хонандагон ва донишҷӯён ройгон забони англисӣ омӯхта, ҳамзамон дар маҳфилҳои гуногуни омӯзишӣ ва баҳсӣ иштирок хоҳанд намуд.
Дар ин «Маркази Амрико» ба тариқи таҷрибавӣ ба 10 нафар занони ҳунарманди беҳтарини шаҳр забони англисиро омӯзонидаанд, то ин ки бо сайёҳони хориҷии ба кишвар омада, озодона муошират намоянд.
Раиси шаҳри Хуҷанд Маъруф Муҳаммадзода ин иқдомро фоли нек арзёбӣ намуда, ба масъулини дахлдор дастур дод, ки ҷиҳати фарогирии тамоми ҳунармадони шаҳр ба омӯзиши забони англисӣ мусоидати фаъол намоянд.Дар Марказ имконоти фарохи техникию техологӣ ва шаоити мусоди фароҳам оварда шудааст.
Раиси шаҳри Хуҷанд Маъруф Муҳаммадзода дар маросими ифтитоҳии «Маркази Амрико» гуфт, ки рушди равобити ҳасанаю ҳамаҷониба бо Иёлоти Муттаҳидаи Амрико дар сиёсати хориҷии кишвари мо таҳти роҳбарии Асосгузори сулҳу Ваҳдати миллӣ Пешвои миллат, Президенти мамлакат муҳтарам Эмомалӣ Раҳмон ҷойгоҳи хосса дорад. Зеро Тоҷикистон ба тавсеаи минбаъдаи ҳамкориҳои иқтисодию тиҷоратӣ бо Иёлоти Муттаҳидаи Амрико манфиатдор аст. Мувофиқи маълумотҳои расмӣ то имрӯз миёни ду кишвар зиёда аз 30 санади ҳамкориҳои дуҷониба ба имзо расидааст, ки то андозае асосҳои ҳуқуқии муносибатҳои моро тақвият мебахшад. Мо аз ҳамагуна иқдомоту пешниҳодоти нек ва созандаи шарикони байналмилалиамон, ки Иёлоти Муттаҳидаи Амрико дар қатори муҳимтарини онҳо қарор дорад, ба хушӣ истиқбол менамоем.
Маъруф Муҳаммадзода гуфт, ки ифтитоҳи «Гӯшаи Амрико» дар шаҳри Хуҷанд, дақиқ-тараш дар Китобхонаи оммавии вилоятии ба номи Тошхоҷа Асирӣ ҳанӯз соли 2005 амалӣ шуда буд. Имрӯз бо назардошти талабот ва тавсеъаи робитаҳои дуҷониба он васеъ гардида, ба ин мавзеъ оварда шуд. Таъсис ёфтани Маркази Амрико дар ин мавзеъи шаҳри Хуҷанд ба ҷавонони болаёқати мо, яъне насли даврони истиқлолият имконият фароҳам меорад, ки ҳарчи бештар соҳиби донишҳои мукаммал ва муосир гарданд. Наврасону ҷавонони мо, дар навбати худ, бояд хуб дарк намоянд, ки барои соҳиб шудан ба донишҳои муосир Ватани муқаддаси худ – Тоҷикистони соҳибистиқлолро самимона дӯст доранд, рафтору кирдори намунавӣ дошта бошанд ва ҳамеша дар пайи ҷустуҷӯи илму дониш саъю талош кунанд. Танҳо дар чунин сурат мо метавонем кадрҳои баландихтисос, соҳиби илму дониши замонавӣ ва ватандӯсту ояндасозро ба воя расонем ва минбаъд тақдири давлати худро ба дасти онҳо супорем.
Кордори Сафорати ИМА дар Тоҷикистон Кевин Коверт зимни суханронии худ ба роҳбарияти шаҳр барои ташкили чунин шароит ва ташриф миннатдорӣ баён намуда, аз ҷумла таъкид дошт, ки ҳадаф аз ифтитоҳи «Маркази Амрико» ин додани маълумот дар бораи Иёлоти муттаҳидаи Амрико ба воситаи китоб, интернети ройгон ва барномаҳои омӯзишие, ки имконияти аз худ кардани забони англисиро медиҳанд, мебошад. Лоиҳаи Маркази Амрико аз тарафи Сафорати Иёлоти муттаҳидаи Амрико дар Тоҷикистон дастгирӣ ёфта, соле як маротиба байни Сафорат ва садорати ташкилоти ҷамъиятии «Ҷаҳони мо» шартномаи ҳамкорӣ баста мешавад. Бояд қайд намуд, ки тӯли 13 сол инҷониб «Гӯшаи Амрико» ба тамоми табақаҳои аҳолии шаҳри Хуҷанд ва навоҳии гирду атрофии он хизматрасонӣ намуда, дар афзун шудани дониши ҷавонон мусоидат намуда истодааст.
Таъкид шуд, ки аз зарфиятҳои ин Марказ фаъолияти тарафайн ба таври назаррас густариш хоҳад ёфт.
Дафтари матбуоти
Раиси шаҳри Хуҷанд
