25 Сентябр 2018
Чанд лаҳза қабл, Раиси шаҳри Хуҷанд Маъруф Муҳаммадзода ба таваллудхонаи шаҳрӣ рафта, тифлоне, ки дар Рӯзи шаҳри Хуҷанд, яъне имрӯз санаи 25.09.2018. таваллуд шудаанд, аёдат намуда, ба онҳо маблағҳои пулӣ тақдим намуд.
Ҳамин тавр, Парвина Қаюмова дар валодати 5-уми худ писар ба дунё оварда, Фарзона Ҷӯраева, Ситора Ҷӯраева ва Маҳастӣ Бузургова бори аввал духтар таваллуд намудаанд. Ҳамагон сокинони шаҳри Хуҷанд мебошанд.
Тибқи иттилои духтурон вазъи саломатии кӯдакон солим буда, дар зери нигоҳубини табибон қарор доранд.Маъруф Муҳаммадзода аз вазъи саломатии кӯдакон ошноӣ пайдо намуда, ба модарон тавсия кард, ки барои тифлон номҳои асили тоҷикӣ ва ашхоси шӯҳратёру таърихии шаҳри бостонии Хуҷандро гузоранд. Зеро дар давоми таърихи бисёрҳазорсолаи худ ин шаҳри бостонӣ хеле фарзандони фарзонаро ба камол расонидааст, ки шуҳрати эшон дар ақсои олам паҳн шудааст.
Ин иқдоми шаҳрдорӣ, яъне аёдати кӯдакони дар Рӯзи шаҳри Хуҷанд таваллуд шуда, аз ҷониби модарони эшон истиқболи гарм пайдо намуд.
Маҳастӣ Бузургова, истиқоматкунандаи маҳаллаи 19-уми шаҳри Хуҷанд дар Хадамоти оташнишонии шаҳр дар вазифаи нозири назорати давлатӣ оид ба сӯхтор фаъолият дошта, соҳиби рутбаи лейтенанти калони хизмати дохилӣ аст. Мавсуф барои чунин ғамхорӣ ва аёдат ба Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон ки пеш аз ҳама барои занону модарон шароитҳои беҳтаринро муҳайё намудаанд, арзи миннатдорӣ баён сохта, таъкид дошт, ки шукронаи оромию шукуфоии Давлату миллати азизамон, ки дар замони амну осоиштагӣ хизмат ба мардум менамоем.
Бояд қайд намуд, ки давоми 9 моҳи соли ҷорӣ дар таваллудхонаи шаҳри Хуҷанд 2934 нафар кӯдак таваллуд шудааст.
Дафтари матбуоти
Раиси шаҳри Хуҷанд
