07 Сентябр 2018
Дар саҳни чойхонаи Сирдарёи шаҳри Хуҷанд бо ташаббуси шуъбаи кор бо занон ва оилаи Мақомоти иҷроияи ҳокимияти давлатии шаҳри Хуҷанд маҳфили идона бахшида ба 27-умин солгарди Истиқлолияти давлатии Ҷумҳурии Тоҷикистон баргузор гардид.
Дар маҳфил намоиши ҳунари занонони маҳаллаҳои шаҳри Хуҷанд ба маърази тамошо гузошта шуд. Фирӯза Нуруллозода, муовини Раиси шаҳри Хуҷанд, Наим Маликисломӣ, раиси Кумиҷроияи ҲХДТ дар шаҳри Хуҷанд ва занони фаъоли шаҳр бо маҳсули ҳунари бонувон ошно шуданд.
Сипас, Фирӯза Нуруллозода, муовини Раиси шаҳри Хуҷанд табрикоти Раиси шаҳри хуҷанд Маъруф Муҳаммадзодаро ба самъи бонувон расонд, ки дар он аз ҷумла гуфта мешавад: «Истиқлолияти давлатӣ, ки Ҷумҳурии Тоҷикистон бисту ҳафт сол муқаддам ба он соҳиб гардид, дар таърихи халқи тоҷик нодиртарин падидаи сиёсиву сарнавиштсоз мебошад. Ин рўз, барҳақ оғози давраи комилан нав дар таърихи давлатдории тоҷикон, марҳалаи тоза дар ташаккули тафаккур ва фалсафаи давлатдорӣ маҳсуб мешавад. Дар оғози даврони соҳибистиқлолӣ таҳти сарварии Асосгузори сулҳу ваҳдати миллӣ – Пешвои миллат, Президенти кишвар, муҳтарам Эмомалӣ Раҳмон бо такя ба ҳастии таърихӣ, ақлу хирад ва иродаи қавии халқамон мо тавонистем, ки оташи ҷанги дохилии таҳмилиро фурў нишонда, парчами озодиву адолатро ба хотири ҳифзи асолату арзишҳои миллӣ ва ваҳдату ҳамдигарфаҳмии халқамон устувор гардонем. Яъне, таърих баъд аз чанд садсола бори дигар ба миллати соҳибтамаддуни мо имконияти эҳё намудани суннатҳои аҷдодии давлатдориро фароҳам овард ва дар харитаи сиёсии ҷаҳон номи давлати мустақилу соҳибихтиёри тоҷиконро сабт намуд».Дар ҷараёни маҳфил Наим Маликисломӣ, раиси Кумиҷроияи ҲХДТ дар шаҳри Хуҷанд, Биҳоҷал Раҳимова, Шаҳрванди фахрии шаҳри Хуҷанд, Нигора Ғаффорзода, сардори раёсати кор бо занон ва оилаи Мақомоти иҷрояии ҳокимияти давлатии вилояти Суғд, Саодат Аминҷонова, узви Маҷлиси миллии Маҷлиси Олии Ҷумҳурии Тоҷикистон ва дигарон баромад намуда, дар бораи арзишҳои Истиқлолият ҳарф заданд. Зикр гардид, ки дар муддати 27 соли Истиқлолият тавонистем, ки бо вуҷуди мушкилоту монеаҳои зиёд пешрафти устувори ватанамонро таъмин кунем, мақоми онро дар арсаи байналмилалӣ боло бардорем, пояҳои давлатдории мустақили худро тақвият бахшем, тамоми кӯшишу талош ва захираву имкониятҳои худро ба хотири фароҳам овардани шароити мусоид барои зиндагии шоистаи халқамон равона созем. Сарбаландиву хушбахтии мо дар он аст, ки тақдири имрӯзу фардои ватанамон дар ихтиёри худамон мебошад ва ҳар фарди бонангу номуси миллат ҳастӣ ва ҳаёти худро ба хотири озодиву пешрафти сарзамини аҷдодӣ бахшидааст.
Сипас, аз тарафи хонандагони макотиби шаҳр шеъру сурудҳо дар васфи Ватану миллат ва Истиқлолият саройида шуд.
Дафтари матбуоти
Раиси шаҳри Хуҷанд
