06 Июн 2018
Имрӯз бо иштироки Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, Раиси вилояти Суғд Раҷаббой Аҳмадзода ва дигар ашхоси расмӣ ба мумфаршкунии роҳи хиёбони Исмоили Сомонӣ аз қисмати бонки «Арванд» то буриши кӯчаи Камоли Хуҷандӣ ҳусни оғоз бахшида шуд.
Раҷаббой Аҳмадзода гуфт, ки дар қаламрави вилояти Суғд сохтмони иншооти гуногуни таъиноти иҷтимоию иқтисодӣ ба анҷом расида истодааст, ки дар рӯзҳои наздиктарин ба истифода дода мешавад.
Роҳбари вилоят гуфт, ки ин амали хайри мумфаршкунии роҳ дар заминаи дастури Пешвои миллат мӯҳтарам Эмомалӣ Раҳмон мебошад, ки чанде қабл бо аҳли ҷомеаи шаҳрвандӣ мулоқот анҷом дода, аз ҷумла таъкид доштанд, ки «Бахусус, дар моҳи шарифи Рамазон, ки Офаридгор дар каломи осмонии худ онро айёми иҷобати дуо, қабули тавба ва амалҳои хайру савоб донистааст, мардуми мо кӯшиш мекунанд, ки фазилатҳои парҳезу накӯкориро бештар риоя кунанд, аз аъмоли зишт худдорӣ намоянд, ба аёдати падарону модарони худ ва беморону ранҷурон раванд ва шахсоне, ки тавону имконашон бештар аст, ба ятимону маъюбон ва камбизоатону дармондагон дасти мададу ёрмандӣ мерасонанд».
Абдуҷаббор Раҳмонзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа зимни баромади хеш таъкид дошт, ки субҳи имрӯз мо аз иншооти муҳими сохташудаи ҷашнии шаҳру навоҳии Бӯстон, Бобоҷон Ғафуров ва Хуҷанд дидан намуда, аз ободкориву созандагии мардум бархӯрдор шудем. Тавре, ки мо иттилоъ дорем дар заминаи фармони Презеденти Ҷумҳурии Тоҷикистон доир ба таҷлили 30 солагии Истиқлолияти давлатии Ҷумҳурии Тоҷикистон дар вилояти Суғд 1300 рӯзи ободонию созандагӣ тибқи қарори Раиси вилоят эълон ва маҷмуъи зиёди корҳо анҷом дода шудаанд.
Боиси ифтихор ва сарфарозист, ки шаҳри Хуҷанди бостонӣ низ дар баробари пойтахти мамлакат-шаҳри Душанбе рӯз аз рӯз хурраму зебо ва обод шуда истодааст. Ин ҳар як сокини шаҳри бостонӣ, устодону донишҷӯёни макотиби олии Хуҷанд, хонандагони муассисаҳои таълимиро водор месозад, ки бо ташкили гуруҳҳои ризокорӣ ҳар ҳафтаи шанбею якшанбе ба ободии маҳалли зисту корашон камари ҳиммат банданд. Бошандагони пуршарафи маҳаллаҳои шаҳрро лозим аст, ки хонаву дар ва кӯчаю маҳаллаҳои хешро бо тарҳи милливу муосир обод намоянд, то ин ки сайёҳони хориҷӣ аз қадимию фарҳангӣ будани миллати кӯҳанбунёди мо бештар маълумот баранд.
Абдуҷаббор Раҳмонзода гуфт, ки сокини пуршарафи шаҳри Хуҷанд ҳамарӯза ҳазорҳо нафар сайёҳонро қабулу меҳмоннавозӣ намуда, бо муҳаббат, меҳрубонӣ, самимият ва эҳтирому сарфарозӣ гусел менамоянд, ки мояи ифтихорамон аст.
Дилшод Исматуллозода, муовини аввали Роҳбари Дастгоҳи ичроияи Президенти Ҷумҳурии Тоҷикистон аз раванди ободокорӣ ва созандагӣ дар вилояти Суғд таҳти роҳбарии Раҷаббой Аҳмадзода изҳори хушнудӣ намуда, аз ҷумла таъкид дошт, ки бояд ҳар якеи мо ҳувияти миллӣ ва ҳисси баланди ватандӯстиву ватанпарастӣ дошта бошем, бо сабру таҳаммул ва иттифоқу сарҷамъӣ ба амалҳои хайрхоҳонаю бунёдкорона даст зада, сарҷамъона Ватанамонро обод намоем.
Сипас, Нодирҷон Солиҷонов, раиси бахши суғдии Ассамаблеяи «Дӯстии халқҳо» ва Бароат Махкамова, сокини шаҳри Хуҷанд аз раванди бунёдкориву созандагӣ дар шаҳри Хуҷанд тавсиф намуда, аз сокинони шаҳри бостонӣ даъват ба амал оварданд, ки баҳри ободиии маҳал, шаҳр ва кишвари худ саҳмгузорӣ намоянд.
Сипас, дар вазъияти тантанавӣ ба мумфаршкунии хиёбони Исмоили Сомонӣ аз қисмати бонки «Арванд» то буриши кӯчаи Камоли Хуҷандӣ ҳусни оғоз бахшида шуд, ки дарозии роҳ 620 ва бараш 12 метрро ташкил медиҳад.
Дафтари матбуоти
Раиси шаҳри Хуҷанд
