14 Май 2018
Субҳи дирӯз Раиси вилояти Суғд Раҷаббой Аҳмадзода бо мақсади иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни мулоқоташон дар Кохи Борбади пойтахт бо намояндагони ҷомеаи кишвар ба муносибати фарорасии моҳи шарифи Рамазон ироа доштанд, аз бозори марказии «Панҷшанбе»-и шаҳри Хуҷанд боздид ба амал овард.Роҳбари вилоят ба масъалаи корҳои ободонии атрофи мавзеъи бозори «Панҷшанбе», бахусус назди Арт галерияи «Сомониён», масҷиди Шайх Муслиҳҳиддин таваҷҷуҳ зоҳир намуда, баҳри ободу ороста намудани он ба Раиси шаҳри Хуҷанд Маъруф Муҳаммадзода ва масъулин дастуру супоришҳои мушаххас дод.
Раҷаббой Аҳмадзода то ҳол аз таъмир нашудани даромадгоҳи бозори «Панҷшанбе» аз роҳбарияти ин маркази бузурги савдо пурсон шуда, баҳри иҷрои он як моҳ мӯҳлат дод.
Таъкид шуд, ки бозори марказии «Панҷшанбе» симои шаҳр аст, аз он меҳмонону сайёҳон боздид намуда, ба маданияти шаҳрдории миллати мо баҳо медиҳанд. Нигоҳ доштани шаҳомати гузаштаи начандон дури ин бозор масъулияти ҷиддиро тақозо менамояд. Бозори мазкур дар қаламрави Осиёи Марказӣ ҳамто надошта, бо санъати хоси меъморӣ бунёд шудааст. Таъмиру таҷдиди он вазифаи ҷонии роҳбарияти имрӯзаи бозор аст.
Дар даромадгоҳи бозори мазкур Раиси вилояти Суғд Раҷаббой Аҳмадзода бо фурӯшандагон ва харидорон сӯҳбати озоду самимӣ ва ошкоро намуд. Роҳбари вилоят бо ёдоварӣ аз мулоқоти дирӯзаи Пешвои миллат мӯҳтарам Эмомалӣ Раҳмон бо ҷомеаи шаҳрвандӣ аз ҳозирин даъват ба амал овард, ки шукронаи ин давлату миллат намуда, баҳри ободу хуррамии он сайъ намоянд.
Зикр гардид, ки бахусус, дар моҳи шарифи Рамазон, ки Офаридгор дар каломи осмонии худ онро айёми иҷобати дуо, қабули тавба ва амалҳои хайру савоб донистааст, кӯшиш намоем, ки фазилатҳои парҳезу накӯкориро бештар риоя кунем, аз аъмоли зишт худдорӣ намоем, фарзандонро ба роҳи рост ҳидоят созем, эшонро ба кору таҳсил машғул намоем, ба аёдати беморону муҳтоҷон равем. Ашхоси дорою тавонманд бо истифода аз имконоти хеш ба ятимону маъюбон ва камбизоатону дармондагон дасти мададу ёрмандӣ расонанд.
Раҷаббой Аҳмадзода гуфт, ки Роҳбарияти Мақомоти иҷроияи ҳокимияти давлатии вилояти Суғд бо истифода аз тамоми василаҳо дар ин моҳи шариф барои мардум нархҳоро дастрас ва маҳсулотро сероб намуда, баҳри ҷилавгирӣ аз афзоиши нархи маҳсулоти ниёзи аввалия чораҳо хоҳад андешид. Ва дар ин самт ба роҳбарияти Мақомоти иҷроияи ҳокимияти давлатии шаҳри Хуҷанд ва садорати бозори марказии «Панҷшанбе» дастуру супоришҳои мушаххас дода шуд.
Роҳбари вилоят ва ҳайати ҳамроҳонаш ба нархи фурӯши маҳсулоти ниёзи аввалия дар бозор марказии «Панҷшанбе» мароқ зоҳир намуда, бо он шинос гардиданд.
Маълум шуд, ки нархи як кило гӯшти гов 33 сомонӣ, гӯшти гӯсфанд 35-38 сомонӣ, биринҷ 4,5-6 сомонӣ, пиёзу сабзӣ 1 сомонӣ, картошка 2 сомониву 50 дирам арзиш дошта, навъҳои гуногуни нону маҳсулоти қаннодӣ дар бозор фаровон буданд.
Раиси вилояти Суғд Раҷаббой Аҳмадзода аз вазъи нигоҳдории бозор изҳори нигаронӣ намуда, ба муовини Раиси вилоят Анвар Яъқубӣ дастур дод, ки бо таъсиси комиссияи вижа давоми 1 моҳ симои зоҳирии бозор ба куллӣ дигаргун карда шавад. Дар сурати иҷро нагардидани он чораҳои мушаххаси амалӣ андешида мешавад.
Дафтари матбуоти
Раиси шаҳри Хуҷанд
