10 Март 2018
Дар толори Мақомоти иҷроияи ҳокимияти давлатии шаҳри Хуҷанд бо иштироки васеъи кормандони ВАО чорабинии тантанавӣ ба ифтихори Рӯзи матбуоти тоҷик баргузор гардид.
Таъкид шуд, ки дар як сол ду маротиба баргузор гардидани нишастҳои матбуотӣ, фармони Президенти Ҷумҳурии Тоҷикистон «Дар бораи вокуниши шахсони мансабдор ба маводи интиқодии Васоити ахбори омма» ва фароҳам овардани шароити муcоид барои тамоми намуди расонаҳои хабарӣ аз тадбирҳои муҳими Роҳбарияти давлату ҳукумат дар ин самт арзёбӣ мегардад.
Раиси шаҳр гуфт, ки таваҷҷуҳи хосса ва шинохту эътирофи рӯзноманигорон, баргузор намудани озмунҳои ҳавасмандӣ аз ҷониби иҷрокунандаи вазифаи Раиси вилояти Суғд мӯҳтарам Раҷаббой Аҳмадзода нишони волои арҷгузорӣ ба фаъолияти аҳли қалам арзёбӣ мегардад.
Маъруф Муҳаммадзода иттилоъ дод, ки дар ҳудуди шаҳри Хуҷанд, ғайр аз шабакаҳои давлатӣ, ҳамзамон ширкатҳои телевизион ва радиои мустақил–“СМ-1”, “Азия”, “Ҷаҳоноро”, “Диёр”, “Танин”, “Салом”, “7-ситора”, телевизионҳои ноқилии “Ант”, “Сомониён”, “Мавҷи ориёно” ва радиоҳои “Пайванд”, “Садои Хуҷанд”, “Радио-Тироз”, “Тирози ҷавонӣ”, “Шаҳри ман”, “Лав радио” ва “Салом” фаъолият доранд. Ин худ гувоҳи он аст, ки дар шаҳри Хуҷанди бостонӣ барои фаъолияти хуби васоити ахбори омма шароитҳои зарурӣ фароҳам оварда шудааст ва ин яке аз нишондодҳои беҳтарин дар қаламрави мамлакат арзёбӣ мегардад. Инчунин рўзномаи “Тирози ҷаҳон”, ки нашрияи мақомоти иҷроияи ҳокимияти давлатии шаҳр мебошад, фаъолияти пурсамар дорад. Ҷоиз ба зикр аст, ки рўзномаи “Тирози ҷаҳон” 25 сол инҷониб дар фазои иттилоотии шаҳр фаъолияти назаррас дорад.
Таъкид гардид, ки Мақомоти иҷроияи ҳокимияти давлатии шаҳри Хуҷанд бо мақсади инъикоси масоили мавҷудаи ҷомеа ва иртиботи доимӣ будан бо мардум силсилаи тадбирҳоро андешида меояд. Зеро матбуот ва воситаҳои ахбори омма ҷузъи асосии маънавият маҳсуб мешавад ва чун баёнгари афкори умум, воқеанигори зиндагӣ дар пешбурди ҳаёти ҷомеа, тарбияи маънавии инсонҳо ҳамеша хизмат мекунад. Рисолати аҳли қалам ва кормандони воситаҳои ахбори умумӣ низ маҳз аз ҳақиқатнигорӣ, инъикоси воқеъии ҳаводис ва баҳои ростин додан ба ҷараёни ҳаёти ҷамъиятӣ сарчашма мегирад. Қобили таваҷҷуҳ ва таҳсин аст, ки аҳли қалам ин рисолати касбиашонро сарбаландона ва муваффақона ба сомон мерасонанд.
Раиси шаҳри Хуҷанд Маъруф Муҳаммадзода дар анҷоми суханронии хеш қаламкашон, аҳли матбуоти шаҳрро бори дигар ба Рӯзи матбуоти тоҷик табрику муборакбод намуда, изҳор боварӣ намуд, ки воситаҳои ахбори омма дар амалӣ гаштани ҳадафҳои нек ва иқдомҳои созандагӣ, беҳтар шудани сатҳи зиндагии мардум саҳми амиқ ва назаррас мегузоранд.
Сипас Раиси шаҳри Хуҷанд Маъруф Муҳаммадзода ба зиёда аз 40 нафар журналистон ва кормандони фаъоли расонаҳои хабарӣ сипоснома ва тӯҳфаҳои хотиравӣ тақдим намуд.
Ҷовиди Аштӣ, хабарнигори рӯзномаи “Ҷумҳурият” дар вилояти Суғд, Дилбар Самадова, мудири кафедраи журналистика ва назарияи тарҷумаи ДДХ ба номи академик Бобоҷон Ғафуров ва Абдулмаҷид Бобоҷониён, собиқадори матбуот аз иқдомоти шоистаи шаҳрдорӣ ҷиҳати роҳандозии ҳамкории мутақобилаи судманд бо расонаҳои хабарӣ тавсиф намуда, ҳамзамон даъват ба амал оварданд, ки ин шеваи фаъолиятро густариш бояд дод.
Дафтари матбуоти
Раиси шаҳри Хуҷанд
