13 Сентябр 2017
Дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ вохӯрӣ ҷиҳати шарҳи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ва дигар санади меъёрии ҳуқуқии дахлдор бо иштироки ҳайати гурӯҳи кории Ҳукумати Ҷумҳурии Тоҷикистон, роҳбари гурӯҳ дар шаҳри Хуҷанд Мирзошоҳрух Асрорӣ раиси Кумитаи иҷроияи Ҳаракати ҷамъиятии ваҳдати миллӣ ва эҳёи Тоҷикистон, Гулбаҳор Назирӣ вакили Маҷлиси намояндагони Маҷлиси Олии Ҷумҳурии Тоҷикистон, Хусрав Турсунов, корманди Суди Конститутсионии Ҷумҳурии Тоҷикистон, Саодат Аминҷонова, узви Маҷлиси миллии Маҷлиси Олии Ҷумҳурии Тоҷикистон, Сарфароз Фаттоҳзода, раиси Кумиҷроияи Ҳизби халқӣ-демократии Тоҷикистон дар вилояти Суғд ва инчунин намояндагони мақомоти ҳифзи ҳуқуқ сурат гирифт.
Раъно Ҳошимзода, муовини Раиси шаҳри Хуҷанд чорабиниро ифтитоҳ намуда, доир ба муҳимият ва рӯзмарра будани он андешаронӣ намуд.Сипас, Мирзошоҳрух Асрорӣ раиси Кумитаи иҷроияи Ҳаракати ҷамъиятии ваҳдати миллӣ ва эҳёи Тоҷикистон баромад карда аз ҷумла афзуд, ки дастовардҳои Истиқлолияти давлатӣ рӯз аз рӯз афзун гардида, сатҳи зиндагии мардум боло рафта истодааст. Маҳз ба шарофати қабули Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» буд, ки мардум зиндагии шоистаро ба даст оварданд. Ҳадаф аз тағйиру иловаҳои навбатӣ низ танҳо ба хотири сарфа намудани маблағҳои мардум ва пешгирӣ намудан аз зиёдаравиҳо мебошад. Асоси тағйиру иловаҳо бо пешниҳоди мардум сурат гирифтааст. Ва бархе имрӯз иддао доранд, ки ҷашу маросимҳо аз байн рафта истодаанд, вале ин нодуруст аст, ягон ҷашн, оин ва маросимро қонунгузор манъ накардааст, вале гузаронидани маъракаи ин ё он ҷашну маросим, ки боиси харҷи зиёд ва худнамоиҳо шудаанд танзим ва ё манъ шудаанд.
Гулбаҳор Назирӣ вакили Маҷлиси намояндагони Маҷлиси Олии Ҷумҳурии Тоҷикистон зимни баромади худ таъкид намуд, ки Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» дар кишварҳои минтақа ҳамто надоранд ва ҳамкасбони парлумонии мо кӯшиш доранд, ки аз таҷрибаи 10 солаи мо дар ин самт омӯзанд. Гулбаҳор Назирӣ дар шарҳи Қонун афзуд, ки гузаронидани маъракаҳои номгузорӣ, гаҳворабандон, чиллагурезон, мӯйсаргирони тифл ва дигар маъракаҳои ба таваллуди кӯдак вобаста дар доираи оила, бе забҳи чорво ва хизматрасонии санъаткорон иҷозат дода мешавад. Гузаронидани маъракаи ақиқа, ки аз урфу одати мо берун аст, манъ карда шудааст.
Ҳамаи ин чорабиниҳо бо мақсади сарфа намудани маблағҳои падару модарон ва пешгирӣ намудани пастшавии сатҳи зиндагонии мардум пешбинӣ карда мешаванд. Дар як вақт ба падару модарон ва дигар шахсони онҳоро ивазкунанда ҳуқуқ дода мешавад, ки аз маблағҳои сарфашуда то расидан ба синни балоғат дар бонкҳо ба номи писаронашон суратҳисобҳо кушоянд.
Ба шахсони воқеӣ ва ҳуқуқӣ, ки имконияти молиявӣ доранд, ҳуқуқ дода мешавад, ки бо риояи тартиби муқарраркардашуда ва бо иштироки комиссияҳои доимии маҳаллӣ хатнасури хайриявии писарони бепарастор ва аз оилаҳои камбизоатро баргузор намоянд.
Хусрав Турсунов, корманди Суди Конститутсионии Ҷумҳурии Тоҷикистон зимни маърӯзаи худ доир ба тағйиру иловаҳои вобаста ба Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» дар дигар санаду меъёрҳои ҳуқуқии кишвар андешаронӣ намуда, аз ҷумла таъкид кард, ки мувофиқи тағйиру иловаҳое, ки ба моддаи 481 Кодекси ҳуқуқвайронкунии маъмурии Ҷумҳурии Тоҷикистон пешниҳод гардидааст, барои риоя накардани талаботи қонунгузории Ҷумҳурии Тоҷикистон дар бораи танзими анъана ва ҷашну маросим ҷавобгарии шахсони мансабдор ва шахсони ҳуқуқӣ пурзӯр карда шуда, андозаи ҷарима нисбати шахсони мансабдор аз 250-270 нишондиҳанда барои ҳисобҳо, яъне аз 12500-13500 сомонӣ то 500 нишондиҳанда барои ҳисобҳо ё 25 ҳазор сомонӣ баланд бардошта шудааст. Нисбати шахсони ҳуқуқӣ низ андозаи ҷарима аз 500-520 нишондиҳанда барои ҳисобҳо, яъне 25 -26 ҳазор то 700 нишондиҳанда барои ҳисобҳо ё 35 ҳазор сомонӣ баланд бардошта шудааст.
Хусрав Турсунов афзуд, ки барои содир намудани ҳамин кирдор аз ҷониби соҳибкорони инфиродӣ, ходимон ва уламои дин бошад, нисбати онҳо ба андозаи 700 нишондиҳанда барои ҳисобҳо ё 35 ҳазор сомонӣ ҷарима таъйин карда мешавад. Барои дағалона ё такроран вайрон намудани тартиби гузаронидани анъана ва ҷашну маросим низ ҷавобгари пешбинӣ гардида, ҳангоми содир намудани онҳо ба шахсони воқеӣ ба андозаи шашсад нишондиҳанда барои ҳисобҳо ё 30 ҳазор сомонӣ, ба шахсони мансабдор ба андозаи ҳаштсад нишондиҳанда барои ҳисобҳо ё 40 ҳазор сомонӣ ва ба шахсони ҳуқуқӣ ба андозаи ҳазор нишондиҳанда барои ҳисобҳо ё 50 ҳазор сомонӣ ҷарима таъйин карда мешавад.
Шоири халқии Тоҷикистон Фарзона дар мулоқот иштирок намуда, андешаҳои хешро доир ба Қонуни мазкур иброз дошта, онро ба манфиати умум арзёбӣ кард.
Мулоқот бо саволу ҷавоб ва пешниҳодоти судманд ҳусни анҷом пазируфт.
Дафтари матбуоти
Раиси шаҳри Хуҷанд
