25 Декабр 2015
Бо натиҷагирӣ аз фаъолияти солонаи кумитаи иҷроияи ҲХДТ дар шаҳри Хуҷанд имрӯз дар толори кохи фарҳанги шаҳри Хуҷанд маҷлиси ҳисоботӣ доир гардид. Дар кори ҷаласа аъзои Кумитаи марказии ҲХДТ, раиси шаҳри Хуҷанд Раҷаббой Аҳмадзода, муовини аввали раиси кумитаи иҷроияи ҲХДТ Анвар Ҷалилов, аъзоёни комиҷроия ва фаъолони ҳизб ширкат доштанд.Чорабинӣ бо сухани ифтитоҳии раиси кумитаи иҷроия дар шаҳри Хуҷанд Наим Маликисломов оғоз ёфт.
Аз рӯи рӯзномаи якуми ҷаласа – ҳисобот оид ба иҷроиши самтҳои асосии фаъолияти КИ ҲХДТ дар шаҳри Хуҷанд барои соли 2015 ва вазифагузориҳо барои соли 2016 раиси кумиҷроия Наим Маликисломов баромад кард. Дар баромади ӯ аз ҷумла қайд гардид, ки ба сифати пешвои миллат эътироф шудани Президенти мардумии Тоҷикистон Ҷаноби Олӣ, мӯҳтарам Эмомалӣ Раҳмон ин амри воқеӣ буд. Зеро ин марди ҷонфидо, хирадманд ва раҳкушои миллати тоҷик замоне ба арсаи сиёсат омад, ки давлат ба ҳадди нестӣ мерасид. Маҳз хиради азалӣ, такя намудан ба нерӯи мардум, таҳаммулпазирӣ ба ин халқи куҳан имкон дод, то ба ҷанги бародаркуш хотима диҳад. Ва имрӯз Тоҷикистонро ба ҳайси кишвари ободу озод мешиносанд ва эътироф менамоянд. Мавсуф дар идомаи суханрониаш аз нуфузи бештар пайдо кардани ҳизбро дар шаҳри Хуҷанд бо мисолҳои воқеӣ фаҳмонид. Тавре аз ҳисобот бармеояд, танҳо дар давоми як сол ба сафи ҳизб 3555 нафар шомил шуда, шумораи умумии аъзоён ба 13 ҳазор нафар расидааст. Онҳо дар 158 кумиҷроия ва ташкилотҳои ибтидоӣ сарҷамъ омадаанд. Маърӯзачӣ дар баромадаш аз фаъолияти самараноки базе аз ташкилотҳои ибтидоӣ амсоли «Таваллудхонаи вилоятӣ», «Ориён», «Сомон», «Б.Ғафуров», «Муҳаммад Осимӣ» сухан карда, афзуд, ки дар такя ба ҳизбиёни ташкилотҳои мазкур омодагӣ ба интихобот дар сатҳи баланд доир гардида, ҳамаи номзадони пешбаригардидаи ҲХДТ дар интихобот пирӯз шуданд.
Номбурда аз тадбирҳои кумиҷроия дар мавриди эълон доштани соли 2015 ҳамчун Соли оила сухан ронда, таъсиси маркази «Ҳимояи оила» ва гурӯҳи кориро бо номи « Муросо» қадаме дар пеш дар мавриди пойдории оила номид.
Наим Маликисломов дар идомаи гузориш аз рафти қабулгоҳи ҷамъиятӣ ва фаъолияти вакилии вакилон дар ин маврид, аёдати пирону шахсони яккаву танҳо ва маъюбон, дасти ёрӣ дароз намудан ба ниёзмандон сухан кард.
Ҳамчунин қайд шуд, ки дар асоси дастуру супоришҳои роҳбарияти ҳизб аз ҳаёти муҳоҷирон дидан намудани раиси кумиҷроия дар вилоятҳои азими Русия сафи аъзо ва пайравони ҳизбро зиёд намуд.
Бо вазифагузориҳо барои соли нав гузориши раиси кумиҷроия анҷом пазируфт.
Фаъолони ҳизб, вакили маҷлиси шаҳрӣ Назокат Ёрматова, Ҷонишини раиси ташкилоти ибтидоии «Суғдформатсия» Азизов А аз қабул шудани Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ – Пешвои миллат» изҳори хушнудӣ намуда, қайд карданд, ки дар таърихи навини тоҷикон маҳз заҳматҳои ин марди ҷонфидо боис шуд, ки моро чун миллати тамаддунофар ва сулҳхоҳ шиносанд. Онҳо дар суханрониҳояшон аз ҳамкориҳои самарабахши кумиҷроия бо ташкилотҳои ибтидоӣ сухан карданд.
Муовини раиси кумиҷроияи вилоятӣ Анвар Ҷалилов дар баробари зикри пешравиҳо диққати ҳозиринро ба масъалаҳои низоми ҳуҷҷатгузорӣ, ҷоннок намудани фаъолияти кор бо ҷавонон ва занон ва ҷалби ҳар чи бештари тарафдорон ба сафи ташкилоти ҷамъиятии ҷавонон бо номи «Созандагони Ватан», решакан кардани зуҳуроти коррупсионӣ равона намуда, барои пешравии вазъ дастуру ҳидоятҳо дод.
Аъзои кумиҷроияи марказии ҲХДТ, раиси шаҳри Хуҷанд Раҷаббой Аҳмадзода ба фаъолияти самарабахши ҳизбиён дар чорабиниҳои гуногуни сиёсиву фарҳангии шаҳр баҳои баланд дода, иқдомҳои кумиҷроияро дар мавриди баргузории аксияҳо, аёдати ниёзмандон, ташкили марказҳо оид ба ҳуқуқи манофеи оила воситаи муҳими ҷалби аъзои нав донист. Зикр шуд, ки шаҳр бо ҳамдастии ҳизбиён сол то сол ободу зебо гардида, иҷрои қисми даромади буҷа ба 105,5 фисад расида, танҳо дар давоми як сол 45 километр роҳҳои шаҳр асфалтпӯш гардиданд.
Мавсуф яке аз роҳҳои баланд бардоштани маърифати сиёсии шаҳрвандонро дар омӯзиши бештар дониста, аз ҳизбиён даъват ба амал овард, ки бо мардум наздиктар бошанд, оқибатҳои фоҷеабори шомилшавиро ба ҳизбу ҳаракатҳои ғайриқонунӣ фаҳмонанд. Номбурда вохӯрии раиси шаҳр бо фаъолзанон ва бибиотунҳоро, ки дирӯз доир шуда буд, мисол овард.
Бо дастуру вазифагузориҳо раиси шаҳр ба гузоришаш ҳусни хотима бахшид.
Дар фуроварди маҷлис ба якчанд нафар фаъолони ҳизб сипоснома, тӯҳфаҳои хотиравӣ ва ба чанде аз аъзоёни нав дар вазъияти тантанавӣ билетҳои ҳизбӣ супорида шуд.
Абдусабур Абдуваҳҳобов,
котиби масъули рӯзномаи «Шафақ»
